Претседателот на ЗЕЛС и градоначалник на Кисела Вода, Орце Ѓорѓиевски, ја истакна поддршката за иницијативата за воведување општокорисна работа како мерка за малолетни сторители на вандализам.

На последната седница на Управниот одбор на ЗЕЛС, оваа иницијатива, предложена од градоначалникот на Центар, Горан Герасимовски, беше едногласно прифатена и официјално доставена до Владата.

„Вандализмот и уништувањето на јавните добра се сериозен проблем кој бара системско решение. Наместо само санкции, потребни се и превентивни мерки кои ќе овозможат ресоцијализација на младите“, истакна Ѓорѓиевски.

Иницијативата предвидува измени во неколку закони, меѓу кои Законот за прекршочна постапка, Законот за пробација и Законот за правда за децата, со цел општокорисната работа да стане алтернативна мерка за малолетните сторители. Дополнително, се предлага разгледување измени во Законот за семејство и Законот за извршување на санкции, со што би се вклучила и одговорноста на родителите преку можност за заедничка општокорисна работа.

„Нашата цел не е само да казнуваме, туку да создадеме механизми кои ќе спречат вакви појави во иднина. Сакаме да ја подигнеме свеста кај младите за значењето на јавните добра и да им дадеме можност да се коригираат низ активности што ќе бидат од корист за заедницата“, додаде Ѓорѓиевски.

Во рамки на иницијативата се предлага формирање на стручна работна група составена од претставници на Владата, ресорните министерства, центрите за социјална работа, училиштата и невладините организации. Оваа група ќе има задача да подготви конкретни законски измени кои ќе ја зајакнат правната рамка за справување со малолетничкиот вандализам.

„Општокорисната работа има двоен ефект: им помага на младите да развијат чувство на одговорност и почит кон заедницата, а истовремено спречува повторување на ваквите негативни појави“, заклучи Ѓорѓиевски.

ЗЕЛС очекува Владата и надлежните институции да ја поддржат оваа иницијатива со цел создавање побезбедни и поуредени локални заедници.

ЗЕЛС едногласно ја усвои Иницијативата предложена од Општина Центар за меѓуинституционална соработка и воведување општокорисна работа за малолетни сторители на вандализам.

„Вандализмот зема замав во сите општини и е сериозен проблем што бара итна реакција. Малолетните сторители мора да се соочат со соодветни мерки, а одговорноста ја делат и нивните родители, истакна градоначалникот Горан Герасимовски.

Иницијативата предвидува измени на Законот за прекршочна постапка, Законот за пробација и Законот за правда за децата, со цел воведување општокорисна работа како мерка која ќе спречи вандализам и ќе придонесе кон ресоцијализација на малолетниците.

Дополнително, се предлага и разгледување измени во Законот за семејство и Законот за извршување на санкции, за да се обезбеди правна рамка која ќе ја вклучи и одговорноста на родителите преку заедничка општокорисна работа.

За спроведување на иницијативата ќе се формира стручна работна група составена од Владата, ресорните министерства, центрите за социјална работа, училиштата и невладините организации. Целта е да се креираат ефикасни законски решенија и да се спречат потешки последици од ваквите негативни појави.

Градоначалникот на општина Кисела Вода, Орце Ѓорѓиевски, заедно со својот тим, денеска официјално го пушти во употреба новоизградениот спортско-рекреативен центар во населбата Градинар. Ова е првиот ваков објект во оваа населба, кој ќе им овозможи на граѓаните место за спорт, рекреација и дружење.

Спортско-рекреативниот комплекс се простира на 2.500 квадратни метри и содржи модерно детско игралиште, кошаркарско игралиште и терен за мал фудбал. Просторот е опремен со парковско зеленило, хортикултурно уредување и урбана опрема, а дополнително, утре ќе бидат засадени нови дрвја.

Во рамки на овој проект, реконструирана е и пристапната улица „Борис Трајковски 7“, со што се подобрува безбедноста и пристапноста за жителите на Градинар.

Градоначалникот Ѓорѓиевски потсети дека во последните три години во оваа населба се реализирани повеќе значајни инфраструктурни проекти, вклучувајќи ја и изградбата на фекалната канализациона мрежа, со што се реши долгогодишен проблем на жителите.

„Овој спортско-рекреативен центар е доказ дека рамномерниот развој на сите населби во општината е наш императив. Со денешниот проект, бројот на спортско-рекреативни центри се зголеми на 15, а на детски игралишта на 20. Остануваме посветени на подобрување на животот на граѓаните преку конкретни проекти“, истакна Ѓорѓиевски.

Општина Кисела Вода продолжува со инвестиции во спортската инфраструктура, како дел од стратегијата за создавање услови за активен и здрав живот на граѓаните.