Градоначалникот на Општина Кисела Вода, Орце Ѓорѓиевски, денес присуствуваше на свеченото одбележување на христијанскиот празник Богојавление – Водици, кое годинава традиционално се одржа со положување на Светиот Крст во осветените води на општината.

„Бог се јави, браќа и сестри! Ова е величествен ден за сите православни верници, ден кога го славиме крштевањето како една од Светите тајни на Христијанството и кога го чествуваме прочистувањето на душата и зачетокот на животот во верата,“ истакна Ѓорѓиевски.

Настанот започна со литија од храмот „Св. Ѓорѓи“ до местото каде беше положен Светиот Крст, а во него учествуваа голем број граѓани, верници и културно-уметничкото друштво „Китка“, кое придонесе за свечената атмосфера.

Најсреќниот годинава беше Илија Мелоски, кој успеа да го извади Светиот Крст. Градоначалникот му честиташе и му посака здравје, среќа и благословена година.

„Особено сум горд што овој настан повторно стана дел од нашата општина, симболизирајќи ја силата на верата и заедништвото на нашиот народ. Благодарност до сите што денес беа дел од овој чин, а посебно до Илија за неговата хуманост – одлуката да ги донира наградите на оние кои имаат вистинска потреба заслужува голема почит,“ додаде Ѓорѓиевски.

На крај, тој упати порака до граѓаните: „Да ги чуваме верата и традицијата, да останеме сплотени и да ја градиме иднината на нашата заедница со љубов и почит.“

Настанот во Кисела Вода се одржа во присуство на голем број верници, кои со заедничка молитва го прославија празникот, исполнувајќи го денот со радост и духовна обнова.

Теодор Јовевски го фати светиот крст што денеска беше положен во водите на реката Вардар во Скопје од владиката Јосиф. 

Јовевски рече дека првпат се фрла по крстот и се надева дека ќе му донесе среќа, а на другите верници им порача да веруваат во Бога.

Одбележувањето на празникот Богојавление почна во 9 часот во храмот „Рождество на Пресвета Богородица“, каде што чиноначалствуваше владиката Јосиф. По завршување на литургијата владиката Јосиф, заедно со свештенството во поворка се упати кон мостот „Слобода“ каде почна „Водосветот“, а потоа го положи крстот во реката Вардар.

Како што изјавија од Скопската православна епархија, годинава во Скопје беа пријавени над 220 граѓани.

Според верувањата, оној кој ќе го фати крстот, ќе го следи среќа и благослов цела година. Фаќањето на крстот значи соединување на човекот со Христа, а се верува дека со положувањето на крстот, водите стануваат лековити. 

Старата измама брои нови жртви во Македонија.

Последна е 76-годишна скопјанка која го пријавила случајот во МВР. И’ се јавиле машко и женско лице, кои и’ кажале дека нејзината ќерќа предизивикала сообраќајна несреќа – прегазила дете, и за да не оди во затвор, требала да им даде пари.

„Пријавителката, по претходен договор со сторителите, на подрачјето на Драчево им предала 130.000 денари, но набргу сфатила дека била измамена“, велат од МВР.

Се преземаат мерки за расчистување на случајот.