Македонија

Вo EУ нe сe oди кaкo дрвo бeз кoрeн

Македонскиот претседател Стево Пендаровски го започна годишното обраќање со едноминутен молк за жртвите од трагичната автобуска несреќа во Бугарија, за настраданите во модуларната болница во Тетово, како и за сите оние што годинава ја загубија битката со ковид-19, посакувајќи повеќе да не се случуваат вакви несреќи, истовремено повикувајќи овие настани да ја разбудат совеста во македонското општество и кај надлежните институции.

Тој понатаму се осврна на владеењето на правото, истакнувајќи дека правдата треба да биде неселективна, а сите процесирани случаи да имаат судска завршница во разумен рок. Уште апелираше со законите што се носат да не се привилегираат оние што не го почитуваат поредокот, наспроти оние што го почитуваат.

– Неселективноста во владеењето на правото и одговорноста е најдобриот начин да ја надминеме општествената апатија што се шири и разочарувањето, особено меѓу помладите, кои не веруваат дека некогаш во оваа држава може да има правда. Многу истражувања потврдуваат дека емиграцијата на нашите сограѓани, во голема мера, не е предизвикана само од егзистенцијални причини, туку и од квалитетот на животот – истакна Пендаровски, притоа додавајќи дека не смее да се остава впечаток дека во земјава владее култура на неказнивост.

Претседателот предупреди да се внимава со привлекувањето странски инвестиции и побара сите најави за големи странски вложувања да се проверуваат од безбедносен аспект, колку и да изгледаат примамливи во прв момент. Напомена и дека е потребна департизација на институциите во сферата на одбраната и безбедноста.

Осврнувајќи се на спорот со Бугарија, македонскиот претседател посочи дека нема потреба од брзање во изнаоѓањето решенија.

– ЕУ е најдобрата опција за нас и едвај го чекам денот кога ќе ги почнеме преговорите, а уште повеќе денот кога ќе ги завршиме. Но во актуелниот контекст, со нашите црвени линии, не треба да бидеме преокупирани колку време ќе им треба на другите да се соочат со вистината за нас. Ние треба да се посветиме на подобрување на квалитетот на животот на нашите граѓани. Брзањето не е секогаш најдобар сојузник – рече Пендаровски.

Тој ги негираше тезите што се наметнуваат во јавноста дека евентуалното подолго останување во чекалницата на ЕУ ќе ја дестабилизира земјава, притоа предупредувајќи на посериозна опасност од демократско назадување ако бугарското вето остане подолго.

– Нашите граѓани можат да бидат спокојни, и да потрае блокадата нема никаква безбедносна закана. Можно е нешто друго, демократско назадување и облици на авторитарно владеење на поединец или партија, но одговорноста за тоа нема да лежи кај граѓаните туку кај нас политичарите – нагласи Пендаровски.

Преголемата фокусираност на преговорите со ЕУ, смета претседателот Пендаровски, го фрлиле во втор план она што е суштина во меѓународните односи, процесите на градење добри билатерални односи, пред сѐ, како што рече, со земјите со кои споделуваме исти цели и вредности.

– Оттука, во наредниот период ќе биде неопходно со новата влада со забрзано темпо да пристапиме кон пополнување на испразнетите амбасадорски места и со здружени напори да посветиме поголемо внимание на билатералните релации, кои опфаќаат многу повеќе аспекти, отколку само поддршка за членство во Европската Унија – рече Пендаровски во обраќањето.
Тој потсети и на проектот „МКД 2030“, кој беше замислен да ја постави стратегиската рамка за развој на државата во следните 10 години, а чие финализирање се очекува кон средината на следната година.

Пендаровски во говорот повика и на поголема грижа за македонскиот јазик, за нашите стожерни културни институции, за нашите паметници, како и за виталните белези на македонскиот идентитет.

– Во Европската Унија членуваат земји со уникатен социокултурен развој, таму не се оди како ничија земја, како дрво без корен – истакна Пендаровски.

Претседателот се осврна и на проблемот со падот на поддршката на европските интеграции во земјава, подвлекувајќи дека овој тренд оди по линија на етничка припадност и дека тоа е загрижувачки во една мултиетничка средина како нашата.

– Иако се јасни мотивите за таквата промена на расположението, имено, ниту еден европски народ не бил изложен на такви ирационални барања како македонскиот, во своите обиди за меѓународна афирмација, треба да знаеме дека влегуваме во година во која, не само ние, туку сите држави на Западен Балкан, повторно ќе бидеме соочени со старите дилеми… Критичен предуслов за вистински одлуки е внимателно да следиме што се случува околу нас и во меѓународните центри на моќ и да реагираме разумно и навреме – истакна Пендаровски.
Тој на крајот ја повика новата влада што поскоро да се позанимава со реалните проблеми на граѓаните, кои се намножија оваа година, од пандемијата и економијата, сè до енергетската криза, која допрва ќе се продлабочува.

Related Topics:ЕУ Пендаровски

Up Next

Џафери: Конечно успеавте Заев веќе не е премиер – доби бурен аплауз (ВИДЕО)

Don't Miss

3aeв е иcтoријa – Cобранието ја констатираше неговата оcтавка и на Влaдaтa

Македонија

Се што треба да знаете за „Safe City“

Казнувањето на сообраќајните прекршоци преку системот „Безбеден град“ официјално ќе започне на 1 февруари, наместо на првично најавениот датум 1 јануари. Одложувањето е потврдено за ТВ21 од помошник-заменик министерот во МВР, Мухамет Исмаили, кој објасни дека причина за пролонгирањето е потребата од дополнителни технички проверки и усогласување на правните процедури.

„Од 01.02.2026 системот SafeCity целосно ќе биде ставен во функција во Скопје, Куманово и Тетово, како и на Коридорите 10 и 8, додека во другите градови се предвидува да започне во текот на 2026 година“, изјави Исмаили.

Од Министерството за внатрешни работи најавуваат и можност за одредена толеранција кај ограничувањата на брзината. „Треба да ги почитуваме ограничувањата – 50 км/ч за урбани подрачја значи 50 км/ч. Секако дека и ние ќе внимаваме, исто како што прават и сите европски градови каде што имаат свои параметри за толеранција – таква толеранција ќе има и кај нас“, изјави Сашо Топаловски, началник на СВР Скопје.

Системот „Безбеден град“ ќе работи со фиксни камери кои ќе регистрираат пречекорување на брзината, поминување на црвено светло, нерегистрирани возила и други прекршоци. Дополнително, специјализирани полициски возила ќе идентификуваат неправилно паркирање и останати нарушувања на сообраќајните правила.

Целта на новиот систем е до 2030 година да се преполови бројот на сообраќајни несреќи во државата.

Македонија

Витаминка со Стоби Флипс и купувачите донираат 1.000.000 денари за СОС Детско село

Кампањата „Заедно за топол дом, љубов и грижа за секое дете“ што Витаминка ја реализираше преку Стоби Флипс, успешно заврши и резултираше со донација од 1.000.000 денари за СОС Детско село. Средствата ќе бидат искористени за Советувалиште за психолошка поддршка и специјална едукација со рехабилитација на СОС Детско село. Благодарение на поддршката од граѓаните за акцијата со која од секој купен Стоби Флипс се издвојуваше дел, со собраните средства ќе се овозможи континуирана експертска едукација за шеесет деца и млади на возраст од 6 до 18 години кои растат без родителска грижа и се соочуваат со последици од трауматски искуства, емоционални и развојни предизвици, како и различни когнитивни потешкотии.

Средствата ќе бидат насочени кон проектот „Менталното здравје пред сè“, преку кој децата ќе добијат индивидуални сесии со психолози и специјални едукатори, како и терапевтски третмани во сензорна соба за оние кои имаат потреба од дополнителна поддршка во емоционалниот и когнитивниот развој. Овие услуги се од суштинско значење за нивното зајакнување, подобро справување со кризи и градење основа за здрав личен раст.

Од СОС Детско село Македонија истакнуваат дека поддршката е од огромно значење за континуитетот на нивната мисија. „Од срце им благодариме на Витаминка и на сите граѓани кои ја поддржаа кампањата. Витаминка уште еднаш покажа што значи вистинска општествена одговорност и посветеност кон децата. Благодарение на ова партнерство, можеме непречено да продолжиме да обезбедуваме стручна грижа и поддршка за секое дете, со верба во нивната подобра иднина,“ велат од организацијата.

За што поуспешно спроведување на кампањата за Стоби Флипс беше изработена и специјална амбалажа со што купувачите беа информирани за своето учество во донацијата и придонесе за подигнување на јавната свест и обезбедување поголема поддршка за децата без родителска грижа.

Од Витаминка додаваат дека се горди што кампањата успеала да ја мобилизира јавноста и да создаде реална промена. „Нашата цел беше да потсетиме дека секој мал гест на солидарност може да донесе голема разлика. Благодарни сме што потрошувачите ја препознаа важноста на оваа приказна и ни помогнаа заедно да донесеме надеж, грижа и поддршка таму каде што е најпотребно“, истакна Симона Симоновска, одговорна за маркетинг во Витаминка.

Со оваа кампања, Витаминка и Стоби Флипс уште еднаш ја потврдуваат својата посветеност кон најмладите и даваат силен пример за тоа како компаниите, заедно со граѓаните, можат да создадат поподобно, похумано и посреќно општество за секое дете.

Македонија

Рекордна година за Скопје – аеродромот со 3 милиони патници, растот продолжува до 3,2 милиони

Меѓународниот аеродром Скопје денес го дочека својот тримилионити патник во една календарска година. Среќничката, Милена Таскова, беше изненадена на нејзиниот лет Скопје – Бари.

Раководството на аеродромскиот оператор ТАВ Македонија, заедно со вицепремиерот и министер за транспорт, Александар Николоски, приредија емотивно изненадување за госпоѓа Таскова.

Милена Таскова беше облеана во подароци: бесплатни аеродромски услуги од сестринските компании на ТАВ и два бесплатни авионски билета од авиокомпанијата Виз Ер (Wizz Air).

Неџат Курт, генералниот директор на ТАВ Македонија, не ја криеше својата возбуда:

„Го достигнавме тримилионитиот патник во една година! Првпат лета за Бари, и посакав среќа на неа и нејзиното семејство.“

Курт најави дека ова е само почеток. Според оптимистичките прогнози на ТАВ, Скопскиот аеродром до крајот на годината ќе заврши со 3,2 милиони патници, додека аеродромот во Охрид се очекува да достигне 262.000 патници.

Овој успех не само што го потврдува растот на авиосообраќајот во земјата, туку и ја зацврстува позицијата на Скопје како значаен регионален воздушен центар.