Македонската фудбалска репрезентација ги стартуваше подготовките за двата натпревари во Лигата на Нации против селекциите на Летонија и Фарски Острови.

По денешниот собир и првиот тренинг изјави за медиумите дадоа напаѓачот Александар Трајковски и дефанзивецот Никола Серафимов.

Желбите и на двајцата се слични, циклусот да се заврши со две победи.

„Убаво е да се има низа на победи без примен гол. Тоа докажува дека имаме квалитет, и не само да победуваме туку и да го браниме резултатот. Се надевам дека и во овие два натпревари ќе го покажеме истото. Мислам дека ова се најважните натпревари. Верувам во нашата екипа, мора позитивно да мислиме и да го дадеме максимумот. Квалитетот не е спорен, ние веруваме во нашите способности. Но, тоа треба да го покажеме на терен. Нема подобра можност да го завршиме овој циклус со две победи пред домашната публика и да се пласираме во плеј-офот“, изјави Трајковски.

Серафимов како фудбалер од одбраната е посебно среќен што Македонија е без примен гол на три натпревари.

„Три победи по ред и тоа без примен гол звучи одлично. Јас најмногу сум среќен кога нема да примиме гол. Сигурно и останатите од одбраната. Но, тоа е резултат на тимската игра. Ни следуваат натпревари против добро познати противници против кои веќе одигравме натпревари. Противниците воопшто не се наивни, но оваа групна фаза сакаме да ја завршиме со две победи и шест бода. Ние сме професионални и без разлика во кој термин играме за Македонија секогаш го даваме максимумот“, изјави Серафимов.

Македонија натпреварот против Летонија го игра на 14 ноември, додека три дена подоцна се соочуваме со Фарски Острови. На табелата нашата селекција е првопласирана со десет бода, шест повеќе од Ерменија и Летонија и седум од Фарски Острови кои се последни во групата.

Натпреварот Скопје – Гевгелија од В-групата во Купот на Македонија за ракометарки го одбележаа скандалозни сцени. Во финишот од натпреварот ракометарки на двете екипи си постигнуваа автоголови и намерно промашуваа кога беа во напад за да не победат.

Судиите прво го прекинаа натпреварот, но по консултација со делегат дозволија истиот да заврши. На крајот Гевгелија победи со 17:16.

Министерот за спорт, Борко Ристовски, во вечерашното гостување на ТВ Сител изјави дека в понеделник на двете екипи ќе им бидат одземени лиценците за занимавање со дејност спорт.

Министерот за спорт, Борко Ристовски, остро реагираше по скандалозниот натпревар во Купот на Македонија за жени, помеѓу екипите на Скопје и Гевгелија, каде играчките намерно постигнуваа автоголови и промашуваа шутеви кон противничкиот гол.

„По прегледување на снимките, веќе в понеделник на клубовите ќе им биде одземена лиценцата за спортска дејност, што ќе ги спречи да учествуваат во домашниот шампионат. Ваков сериозен прекршок на спортските правила мора да биде ставен под контрола,“ изјави Ристовски.