Зеленски пристигна на погребот на папата Франц – повторно без одело?

Претседателот на Украина, Володимир Зеленски, утрово пристигна на плоштадот „Свети Петар“ во Ватикан, само неколку минути пред почетокот на погребната церемонија за папата Франц. Но, она што веднаш го привлече вниманието на јавноста не беше само неговото присуство, туку и неговиот избор на облека.

Зеленски и овојпат не носеше класично одело, што според протоколот за вакви настани се смета за задолжително. Украинскиот претседател беше фотографиран во црни панталони, темна кошула и црна јакна – комбинација што се смета за неформална во ваков контекст.

Католичката црква е позната по строгите правила на облекување, особено кога станува збор за официјални церемонии како што е погребот на папата. За мажи се очекува да носат темно одело, бела кошула и долга црна вратоврска. Технички се дозволени и други темни нијанси како сива или темно сина, но речиси сите светски лидери на денешниот настан беа облечени во класично црно со бела кошула, според очекуваните стандарди.

Протоколот исто така предвидува и црни чевли, чорапи, палта и чадори. На левиот ревер е дозволено да се носи црно копче, а единствени дозволени украси се официјалните папски почести. Сите други модни додатоци кај мажите – како прстени, нараквици и часовници – треба да бидат крајно ненападни.

Жените, пак, се должни да носат црна облека, при што фустанот мора да биде под колената, со затворени црни чевли со ниска потпетица, црни ракавици и, по желба, тенок црн вел. Торбичката мора да биде мала и црна, а од накитот е дозволена само едноставна бисерна огрлица.

Иако Зеленски не го испочитува целосно протоколот, неговото присуство на церемонијата сепак беше одбележано како гест на почит.

Пекинг размислува за укинување царини на американски производи: олеснување на трговските тензии?

Кинеската влада разгледува можност за укинување или намалување на царините на дел од американските производи, меѓу кои се и медицинска опрема и индустриски хемикалии, пренесе утринава новинската агенција Ројтерс, повикувајќи се на извори блиски соработници на процесот.

Според информациите, Министерството за трговија на Кина формирало работна група која веќе собира листи на производи што би можеле да бидат ослободени од дополнителни царини. Специјалниот извештај на кинескиот магазин „Caijing“ наведува дека меѓу опциите се и осум производи поврзани со полупроводници, иако чиповите за меморија засега не се во игра.

Во јавноста кружи и наводна листа со 131 категорија производи кои се разгледуваат за изземање – меѓу нив се вакцини, хемикалии и дури и млазни мотори – но Ројтерс наведува дека сѐ уште не може да ја потврди автентичноста на таа листа.

Додека САД веќе обезбедуваат одредени трговски олеснувања, особено за електронски компоненти, ваквиот потег од страна на Кина може значително да ги ублажи тековните трговски тензии и да го намали економскиот притисок врз двете страни, велат економски експерти.

Ако дојде до реализација, оваа иницијатива може да биде значајно олеснување за американската економија, но и политичко засилување за Белата куќа, која во последно време се соочува со сѐ поголем притисок во однос на својата трговска политика.

Засега нема официјална потврда од кинеските власти, ниту одговор на медиумските прашања, па останува да се види дали и кога овие мерки ќе стапат на сила.

Во Ватикан денес се одржува погребот на папата Франциск

Во Ватикан утрово во 10 часот по локално време започна погребната церемонија за папата Франц, кој почина во понеделникот на 89-годишна возраст. Илјадници верници и почитувачи се собраа да му оддадат последна почит на духовниот водач.

Организаторите очекуваат околу 200.000 луѓе да присуствуваат на самата церемонија, додека се проценува дека над еден милион ќе се обидат да ја следат погребната поворка низ улиците на Рим.

Во пресрет на огромната посетеност, италијанските и ватиканските власти преземаа извонредни мерки за безбедност. Над 4.000 полицајци се ангажирани за обезбедување на настанот, а во логистичката поддршка се вклучени и илјадници војници, медицински служби и околу 4.000 волонтери.

Ватикан денес е под засилено обезбедување, со воздушни и копнени контроли, додека плоштадот „Свети Петар“ е преполн со верници од целиот свет кои дојдоа да се простат од папата Франц.

Следете го погребот на папата во живо: