Лидерот на војската на Мјанмар, во телефонски разговор со малезискиот премиер Анвар Ибрахим, соопштил дека во земјотресот што ја погоди земјата загинале околу 1.700 лица. Тој исто така известил дека се повредени околу 3.400 лица, додека потрагата по приближно 300 исчезнати лица продолжува. Проценките укажуваат дека бројот на загинатите може дополнително да се зголеми.

Спасувачките екипи продолжуваат со работата на местото на урнатата катна зграда во Мандалеј, која се наоѓа во близина на епицентарот на земјотресот. Локалната противпожарна служба информираше дека досега 29 лица се извлечени од урнатините. Освен тоа, девет тела се веќе пронајдени. Вчера беше спасена 30-годишна жена која била затрупана околу 30 часа, но успеала да преживее.

Комплексот Sky Villa, кој се состои од 11 ката во Мандалеј, бил еден од најпознатите станбени проекти во регионот. Три од четирите згради во комплексот биле урнати од земјотресот. Претставник на Црвениот крст изјави за АФП дека повеќе од 90 лица може да бидат заробени во урнатините на овие згради.

Во меѓувреме, Тајланд објави нови податоци за трагедијата на градилиште во Бангкок, каде загинале 11 лица, од кои осум мажи и три жени. Претходно беа пронајдени девет повредени лица, а потрагата по исчезнатите лица продолжува. Денеска беше извлечено уште едно тело, а спасувачите се обидуваат да ја спасат жена која е жива, но затрупана под урнатините.

Уште еден силен земјотрес утрово е регистриран во Мјанмар, соопшти Европско-медитеранскиот сеизмолошки институт.

Епицентарот на земјотресот со јачина од 5,1 степени според Рихтеровата скала бил на 39 километри од Мандалеј на длабочина од десет километри.

Мјанмар завчера околу пладне беше погоден од земјотрес со јачина од 7,7 степени по Рихтер, проследен со бројни последователни потреси, меѓу кои и еден со јачина од 6,4 степени.

Според податоците објавени од воената хунта во Мјанмар, вкупниот број на жртви од земјотресот изнесува 1.644, повредени се 3.408, а 30 лица се водат како исчезнати.

Најмалку 18 лица загинаа во соседен Тајланд. 

Американскиот претседател Доналд Трамп во интервју за NBC News изјави дека не ја исклучува можноста за употреба на воена сила во неговите напори за анексија на Гренланд, иако верува дека постои „добра можност“ тоа да се постигне без конфликти.

Изјавата доаѓа еден ден откако потпретседателот Џеј Ди Венс, заедно со високи американски функционери, ја посети американската воена база на островот. Венс ја критикуваше Данска за недоволните инвестиции во безбедноста и ги повика граѓаните на Гренланд да се отцепат од данското владеење за да отворат простор за преговори со Вашингтон.

„Ќе го земеме Гренланд. Да, сто проценти“, изјави Трамп, повторувајќи ја својата намера за преземање на оваа стратешка територија.

Оваа изјава дополнително ги зголеми тензиите меѓу САД и Данска, која досега категорично ги отфрлаше сите обиди на Вашингтон да го стави Гренланд под своја контрола.