Повеќе од половина од Американците, вклучително и секој четврти републиканец, веруваат дека претседателот Доналд Трамп е „премногу блиску“ до Русија бидејќи радикално ја менува надворешната политика на САД, покажува новата анкета на Ројтерс/Ипсос, пренесе БТА.

Истражувањето, завршено во средата, исто така покажа дека експанзионистичката агенда на Трамп, која говореше за стекнување на Гренланд, Канада и Панамскиот канал, не добива силна поддршка.

Околу 56 отсто од испитаниците – 89 проценти од демократите и 27 посто од републиканците – се согласуваат со изјавата дека Трамп е премногу блиску до Москва.

Четириесет проценти од испитаниците не се согласуваат со оваа изјава, а четири отсто не одговориле на прашањето.

Анкетата на Ројтерс/Ипсос, исто така, покажа дека многу Американци поддржуваат клучен елемент од неговиот пристап да и помогне на Украина. Четириесет и четири отсто од испитаниците во истражувањето рекле дека го поддржуваат планот на Трамп да ја „врзе американската воена поддршка за Украина со САД да добијат дел од рудното богатство на Украина“.

Две третини од републиканците ја поддржуваат идејата, како и секој петти демократ.

Севкупно, рејтингот на Трамп се одржува стабилен во изминатите неколку недели на 44 проценти.

Владимир Путин веројатно ќе одговори на предлогот за прекин на огнот со свое барање, изјави поранешниот советник на рускиот претседател, Сергеј Марков.

Во интервју за SkyNews, Марков изјави: „Русија се плаши дека периодот на прекин на огнот може да се искористи за целосна милитаризација на украинското општество од страна на НАТО“.

Затоа, како што тврди, Путин најверојатно ќе побара ембарго за испорака на оружје за украинската армија од други земји.

Кога новинар го прашал за можноста за испраќање мировници од европските земји, Марков се насмеал и одговорил: „Британските и француските трупи се дел од војната“. Тој додал дека мировниците обично доаѓаат од неутрални земји.

„Сите војници од европските земји ќе бидат сметани за окупатори, а руските војници ќе ги убиваат сите бидејќи дошле да ја ослободат Украина“, рече Марков.

Тензиите се зголемија кога беше прашан дали Русија ќе ги смета британските мировници за непријатели и учесници во војната.

„Да, затоа што Британија е учесник во војната“, одговори Марков, имајќи ја во предвид воената помош што Обединетото Кралство ја дава на Украина.

Американскиот претседател, Доналд Трамп, вечерва ќе се сретне со генералниот секретар на НАТО, Марк Руте.

Главна тема на оваа средба ќе биде војната во Украина и актуелната ситуација во однос на предложениот едномесечен прекин на огнот. Средбата се одржува во Белата куќа и ќе биде зад затворени врати.

Претходно, Трамп и Руте накратко се појавија пред новинарите. Претседателот изјави дека „се надева оти Русија ќе постапи правилно“, додавајќи дека изјавата на Путин е „ветувачка, но не и целосна“.

Особено внимание привлекла изјавата на Трамп, пренесена од Ројтерс, кога тој беше прашан за американските напори да го заземат Гренланд. И додека Руте не сакал да коментира, Трамп одговорил: „Мислам дека припојувањето на Гренланд ќе се случи. Нашата администрација активно работи со Данска и Гренланд, ќе направиме договор. Ова е неопходно за меѓународната безбедност“, изјавил Трамп.