Македонија

Теута им давала незаработена плата на роднините, Тетово оштетено за 7 милиони евра

Во текот на една од дебатните емисии, актуелната градоначалничка на Општина Тетово, Теута Арифи, јавно изјави дека бројот на вработените во општината е 360, но ние ќе ви кажеме дека тоа не е точно и дека самата Арифи има вработено над 300 лица со договор на дело за коишто секоја година се трошат над 900.000 евра буџетски пари, реагира Алијанса за Албанците преку соопштение.

„Во текот на осумте години на власт, Теута Арифи само за овие позиции на договор за дело има потрошено над 7 милиони евра, пари на даночните обврзници. Доколку овие пари беа потрошени таму каде што има потреба, а не за луѓе што се партиски милитанти, за членови од семејството на Теута Арифи и на вработените во нејзиниот кабинет, денес од овие пари ќе беа изградени неколку градинки за деца, улици, катчиња за играње за децата, паркови и слично. На листата којашто е јавно објавена ќе видите како години по ред Теута Арифи им давала и продолжува да им дава плати на партиските милитанти, на нејзините блиски и на блиските на лицата во нејзиниот кабинет, коишто никогаш немаат работено и не работат во општината, а некои, пак, ниту се наоѓаат во Тетово, туку живеат и работат надвор од Република Северна Македонија“, се вели во соопштението.

Од партијата на Зијадин Села ги објавија и имињата на луѓето кои добивале пари од Општина Тетово, а кои биле блиски луѓе на градоначалничката:

– Албона Меџани Синани, сопруга на Бетим Синани, роднина на Теута Арифи, со договор за дело, добива плата во износ од 15.000 денари месечно. Живее и работи во Германија.

– Руџул Сулејмани, сопруга на Вахид Сулејмани-директор на финансии во Општина Тетово, прв братучед на Теута Арифи. Никогаш нема работено во општината, добива плата во износ од 30.000 денари месечно.

– Арлинд Зечири, бивш министер и функционер на ДУИ, секој месец добива плата во износ од 17.000 денари. Никогаш нема работено во општината.

Рудина Фазлиу, сестра на Арменд Фазлиу, активист и милитант на ДУИ, вработен во кабинетот на Теута Арифи, секој месец добива плата од општината во износ од 15.000 денари, иако тој работи во компанијата Ecolog.

– Хидије Цека, сопруга на бивш директор на Јавното Комунално Претпријатие, Џелал Цека, секој месец добива плата од општината во износ од 25.000 денари, а никогаш нема работено во општината.

– Валмир Алили, сопруг на Вјолца Алили, вработена во кабинетот на Теута Арифи, секој месец добива плата во износ од 15.000 денари, иако не работи во општината туку има приватна компанија.

– Генти Исмаили, брат на Арди Исмаили, активист и милитант на ДУИ, вработен во кабинетот на Теута Арифи, секој месец добива плата од општината во износ од 30.000 денари, а никогаш нема работено во општината.

– Јетон Пустина, вработен во неколку институции, секој месец добива плата во износ од 20.000 денари од општинскиот буџет за да извршува политички и партиски активности по собирите на Теута и на ДУИ.

Од Алијанса за Албанците велат дека постојат уште многу други лица коишто добиваат плати од Општина Тетово и што се на оваа листа.

„Слични листи, со вработени со договор за дело има и во Јавното комунално претпријатие, каде што исто така има многу блиски на Теута Арифи и на неговиот сопруг, но исто така и блиски на други функционери на ДУИ, коишто примаат плата со години, а немаат никогаш отидено на работа. Многу загрижувачки е фактот дека овие фиктивни вработени со договори добиваат огромни суми, додека на вработените им доцнат платите и не им се уплаќаат здраствените и пензиски придонеси. За сите овие малверзации и злоупотреби од страната на Теута Арифи, Алијанса на Албанците ќе ги информира надлежните државни институции, како што се Основното обвинителство, Државната комисија за спречување на корупција, Државниот завод за ревизија, Финансиската полиција и меѓународните институции, амбасадите на европските држави и Амбасадата на САД“, се вели во реакцијата.

Македонија

Македонците од Албанија и Кичево со заеднички чекор напред – потпишан меморандум за соработка

Значаен чекор кон зацврстување на културните и националните врски е направен денес во Кичево. Делегацијата на Здружението на Македонците од Албанија во Македонија „Зошто“, предводена од иницијативниот претседател Панди Јани, оствари клучна средба со градоначалникот на Кичево, Александар Јовановски.

Кулминација на конструктивната средба беше свеченото потпишување на Меморандум за соработка, документ кој ги поставува цврстите темели за идна, плодна соработка!

„На средбата разменивме мислења по повеќе прашања, по што потпишавме Меморандум за соработка, со кој се поставуваат темели за заеднички активности и иницијативи насочени кон унапредување на културната размена, образовната поддршка и зајакнување на традицијата на македонскиот јазичен, културен и национален идентитет“, изјави за МИА, Панди Јани.

Ова не е изолиран настан. Само денови претходно, сличен историски документ беше потпишан и со градоначалникот на Општина Ресен, Јован Тозиевски. Според Јани, со овие договори „се отвора ново поглавје во заедничкото делување за доброто на граѓаните“.

Целта е јасна: зајакнување на заедницата преку партнерства.

„Овие чекори, кои ќе ги продолжиме и со други градови, претставуваат силна потврда дека преку партнерства, дијалог и конкретни активности може да се создадат услови за подобра поддршка, развој и инклузија на Македонците по потекло од Албанија, како и на сите граѓани кои се дел од нашата заедница“, категорично оценува Јани.

Јани изрази длабока благодарност до градоначалниците Јовановски и Тозиевски за нивната доверба и поддршка, како и до посветениот тим на „Зошто“ кој несебично работи на оваа благородна мисија: чекор по чекор, да изгради посилна, обединета и активна заедница.

Здружението „Зошто“ е основано на 25 септември 2024 година со Седиште во Ресен. Неговатам мисија е Афирмација на македонската култура и идентитет. Името е почит кон романот „Зошто“ на Стерјо Спасе, еден од најголемите писатели во Албанија со македонско потекло.

Македонија

Тошковски откри кои прекршоци ќе бидат на удар на „Безбеден град“

Министерот за внатрешни работи, Панче Тошковски, денеска истакна дека системот „Безбеден град“ ќе се спроведува со прецизно дефиниран праг на толеранција, со цел зголемување на безбедноста во сообраќајот и јавниот простор, а не казнување по секоја цена.

Тошковски појасни дека системот ќе биде насочен кон препознавање и санкционирање на сериозни и опасни прекршоци, особено оние кои директно го загрозуваат животот и безбедноста на граѓаните. „Целта е да се воспостави ред и превенција, а не репресија без разум“, рече тој.

„Ќе има јасни правила, транспарентност и точно утврдени критериуми. Граѓаните ќе знаат што се санкционира и зошто. Системот нема да биде лов на прекршители, туку алатка за заштита на човечки животи“, нагласи министерот.

Проектот предвидува користење на современи технолошки решенија, вклучително камери и софтвер за следење на сообраќајот, со цел подобрување на контрола и намалување на бројот на сообраќајни незгоди.

Министерството најави дека имплементацијата ќе се спроведува фазно, со претходна информираност на јавноста и соодветен период за прилагодување, за граѓаните да се запознаат со новиот систем и неговото функционирање.

Македонија

Пораст на нивото на реките: Пчиња, Вардар, Треска и Црн Дрим со зголемен водостој

Управата за хидрометеоролошки работи (УХМР) алармира за значително зголемување на водостоите кај клучните реки, надминувајќи го просекот за декември.

Реката Вардар, нашиот најголем воден пат, е видно „нарасната“ долж нејзиниот тек – од Јегуновце, преку Скопје и Велес, па сѐ до Демир Капија. Слична слика се бележи и на Пчиња кај Катлановска бања, Треска кај Македонски Брод, Црн Дрим кај Ложани и Сатеска кај Ботун.

Од друга страна пак, нивото на Брегалница кај Берово и Штип, Пчиња кај Пелинце и Црна Река кај Новаци, се под просечните декемвриски граници.

Во однос на природните езера, ситуацијата е стабилна и без отстапувања. Водостоите на Охридското, Преспанското и Дојранското Езеро се во рамки на просекот за овој период од годината, ветувајќи мирување и покрај раздвижениот речен систем.