Еден месец по првиот телефонски разговор, американскиот претседател Доналд Трамп откри дека имал и втор контакт со рускиот претседател Владимир Путин.

Според Трамп, разговорот бил продуктивен и добар, а тој истакнал дека постојат шанси за ставање крај на војната. Меѓутоа, како што наведе на социјалните мрежи, од Путин категорично побарал да се поштедат илјадници украински војници, за да се спречи катастрофален масакр. Трамп не ги наведе точните локации каде што се тие опколени, но проценките сугерираат дека станува збор за регионот на Курск, каде што руската војска започна офанзива.

„Во овој момент, илјадници украински војници се целосно опколени од руската војска и се наоѓаат во многу тешка ситуација. Јас категорично побарав од претседателот Путин да ги поштеди нивните животи. Тоа би било ужасен масакр, каков што не сме го виделе од Втората светска војна“, напиша Трамп.

Рускиот претседател Путин, пак, на вчерашната прес-конференција ги предупреди украинските војници да се предадат или да се соочат со смрт. Путин исто така посочи дека го поддржува 30-дневното примирје, договорено меѓу претставниците на Вашингтон и Киев во Саудиска Арабија, но со предуслови, особено за мировниците кои ќе го следат примирјето.

„Ситуацијата во Курск е целосно под наша контрола. Групата која изврши инвазија на нашата земја е во изолација. Тие се целосно опколени и под огнена контрола. Ако физичката блокада се случи во следните неколку дена, ќе имаат само две опции – да се предадат или да загинат“, изјави Путин.

Портпаролот на Кремљ, Дмитриј Песков, потврди дека рускиот претседател се сретнал со специјалниот американски пратеник Стив Виткоф, кој му пренел порака од Трамп. Песков истакна дека кај руските власти постои претпазлив оптимизам, а според него, двете страни имаат разбирање дека се потребни директни разговори меѓу двајцата претседатели. Посетата на Виткоф во Москва следува по средбите на американските и украинските претставници во Саудиска Арабија.

Советникот за национална безбедност на Трамп, Мајк Валц, кој беше дел од преговорите во Џеда, за прв пат откри дека на маса се ставени и територијални отстапки.

„Украинската делегација беше многу отворена, имавме одлични разговори. Во еден момент дури отворивме мапа и почнавме да цртаме како да ја завршиме војната“, изјави Валц.

Украинскиот претседател, Володимир Зеленски, истакна дека нема намера никогаш да ги признае окупираните делови од Русија. Според него, иако САД и Украина се договорија за 30-дневно примирје, Москва намерно ја одолговлекува одлуката, бидејќи не сака да му соопшти на Трамп дека има намера да ја продолжи војната. Како што додаде Зеленски, Путин разгледува идеја за прекин на огнот со предуслови кои нема да бидат прифатливи за никого.

Путин очигледно ја воочил слабоста во американскиот предлог за прекин на огнот и сега ја искористува за да ја префрли одговорноста на Трамп, наведува BBC во својата анализа.

Рускиот претседател нагласува дека не е возможно „веднаш“ да се постигне прекин на огнот без претходен договор за условите, што го опструира барањето на Трамп за почеток на примирје, а потоа преговори.

Иако Путин тврди дека ја поддржува идејата за завршување на војната за да не биде обвинет за кочење на мировниот процес, јасно е дека сака прекин на огнот по негови правила. Тој ги враќа на маса деталите за предлогот за прекин на огнот, особено во однос на повлекувањето на украинските сили.

Клучното прашање на кое во Вашингтон нема одговор се територијалните концесии. Путин упорно бара признавање на анексијата на четирите региони, што украинскиот претседател, Володимир Зеленски, категорично го одбива, не сакајќи да го легитимира украденото украинско земјиште. Покрај тоа, советникот на Зеленски ја исклучи можноста за замрзнат конфликт, што дополнително ја комплицира положбата на Трамп.

На претходниот состанок на министрите за надворешни работи на Г7 самитот во снежниот Квебек, американскиот државен секретар, Марк Рубио, избегнал да го коментира одговорот на Кремљ. Очигледно е дека одлучил да молчи додека специјалниот пратеник на Трамп не донесе информации во Вашингтон за тоа што рекол Путин во доверливите разговори.

Разговорот помеѓу Стив Виткоф и Трамп сега станува клучен за тоа како американскиот претседател ќе реагира – топката повторно е на неговата страна.

Американскиот претседател Доналд Трамп во Белата куќа изјави дека САД ќе се побараат од Русија да не ги нападне американските сојузници, истакнувајќи дека не верува дека ќе има напад врз членките на НАТО.

„Тоа нема да се случи. Ќе се погрижиме да не се случи“, изјави Трамп.

Тој го отвори состанокот со генералниот секретар на НАТО, Марк Руте, кого го нарече пријател. Трамп напомена дека во моментов се водат сериозни преговори со Русија, и се надева дека Украина ќе се согласи на прекин на огнот.

Руте исто така изрази обврска за зголемување на трошоците за одбраната, вклучувајќи и поголемо производство на оружје. Трамп пофали дека НАТО е во подобра позиција благодарение на Руте, додавајќи дека тоа било важно за зајакнување на воената алијанса.

„НАТО се подобрува благодарение на овој човек. Тој знае како да ги подигне работите на следното ниво. Ние ја имаме истата цел – сакаме војната да заврши, а тој си ја врши работата“, изјави Трамп.

Претседателот повтори дека САД трошат премногу на одбрана, но истакна дека новиот договор за минерали со Украина ќе донесе многу во замена. Тој, исто така, изрази разочарување дека Европејците не се секогаш праведни кон САД.

Трамп зборуваше и за преговорите за прекин на огнот, истакнувајќи дека се разгледуваат детали за територијата што ќе остане под контрола на Украина и Русија, како и важни прашања како што е електраната. Тој рече дека се надевал дека Русија ќе биде дел од договорот, но дека ако не го направи тоа, ќе биде разочарувачки за светот.

„Би сакал да се сретнам со Путин, но мораме брзо да го решиме ова. Ако постигнеме мировен договор, тоа може да доведе до траен мир. Никој не сака повторно да војува“, додаде Трамп.

Трамп повтори дека ја зајакнал американската поддршка за Украина и го запрел гасоводот Северен поток 2, додека истовремено ја истакна важноста на одговорноста на другите земји за нивната одбрана.

На крајот, Трамп заклучи дека кога овој конфликт ќе се реши, сите ќе сакаат да се повлечат и да се одморат, што ќе значи крај на напнатоста.