Русија не планира да заврши војната во Украина пред 2026. година, а нејзината цел е да ја ослаби преговарачката позиција на САД, поттикнувајќи тензии помеѓу администрацијата на Доналд Трамп и другите земји, се наведува во таен документ од Кремљ.

Документот кој го добил „Вашингтон пост“, а кој бил напишан во февруари од влијателен московски тинк-тенк близок до руската Федерална служба за безбедност (ФСБ), ги изложува руските максималистички барања за било каков крај на војната. Во него се одбиваат почетните планови на претседателот на САД, Доналд Трамп, за мировен договор во рок од 100 дена, како „невозможни за реализација“.

Во документот се тврди дека мирно решение за војната во Украина не може да се случи пред 2026. година. Тој исто така:

Ги одбива сите предлози за испраќање мировни сили во Украина.

Инсистира на признавање на рускиот суверенитет над окупираните украински територии.

Повикува на натамошно раздвојување на украинската територија преку создавање на тампон зона на североистокот, на границата со рускиот регион Брјанск и Белгород.

Предложува формирање на демилитаризирана зона во јужните украински региони близу Крим, кој Русија нелегално го анектирала во 2014. година, вклучувајќи го и регионот Одеса.

Нагласува потребата од „целосно демонтирање“ на актуелната украинска влада.

Документот, кој го добила европската разузнавачка служба, исто така ги истакнува предизвиците со кои се соочува Трамп во обидот да постигне договор со Русија за мировен договор во Украина. „Русија не е заинтересирана за брзо решавање на ситуацијата. Тие постојано зборуваат за основните причини, кои, како што знаете, се однесуваат на внатрешната политика во Украина, а уште поважно од тоа, на европската безбедносна структура и улогата на НАТО. Обичен прекин на огнот што не го зема ова во предвид не е во интерес на Русија. Трамп тоа очигледно не го разбира“, изјавил Томас Грејем, поранешен високи функционер во Советот за национална безбедност на Белата куќа.

Документот е подготвен од тинк-тенк кој тесно соработува со Петата служба на ФСБ, која ги надгледува операциите во Украина, а бил напишан неделата пред разговорите помеѓу Русија и САД кои се одржале во Ријад на 18. февруари.

Документот понатаму предложува начин на кој Русија може да ја зајакне својата преговарачка позиција преку поттикнување на тензиите помеѓу САД, Кина и Европската унија, како и одобрување на пристапот на Америка до руски минерали, вклучувајќи ги и териториите кои Русија ги држи под окупација во Украина.

Се предлага и нормализирање на односите помеѓу Вашингтон и Москва преку дипломатски контакти, а исто така се предлага и договор за не поставување балистички ракети во Белорусија од страна на Русија, додека САД ќе се согласат да не поставуваат нови ракетни системи во Европа. Се сугерира и дека Русија треба да престане со испорака на оружје на земјите кои се сметаат за „непријателски“ кон Америка, а САД ќе престанат да ги наоружуваат Украина.

Во документот се истакнува дека без официјално признание на рускиот суверенитет над анектираните региони, „може да се очекува продолжување на вооружениот конфликт, на пример, по следната промена на администрацијата во САД“.

Документот исто така ја отфрла можноста за какви било отстапки кон Украина и нагласува дека изборите мора да се одржат така што проруски партии ќе имаат право да учествуваат.

„Во реалноста, сегашниот режим во Киев не може да се промени одвнатре. Потребно е целосно демонтирање“, се наведува во документот.

Присуството на било какви мировни сили во Украина се одбива како „апсолутно непотребно“, бидејќи било која сила ќе биде под „сериозен западен влијание“, додека американските планови за наоружување на Украина по мировниот договор се „апсолутно неприфатливи“.

Повеќе од половина од Американците, вклучително и секој четврти републиканец, веруваат дека претседателот Доналд Трамп е „премногу блиску“ до Русија бидејќи радикално ја менува надворешната политика на САД, покажува новата анкета на Ројтерс/Ипсос, пренесе БТА.

Истражувањето, завршено во средата, исто така покажа дека експанзионистичката агенда на Трамп, која говореше за стекнување на Гренланд, Канада и Панамскиот канал, не добива силна поддршка.

Околу 56 отсто од испитаниците – 89 проценти од демократите и 27 посто од републиканците – се согласуваат со изјавата дека Трамп е премногу блиску до Москва.

Четириесет проценти од испитаниците не се согласуваат со оваа изјава, а четири отсто не одговориле на прашањето.

Анкетата на Ројтерс/Ипсос, исто така, покажа дека многу Американци поддржуваат клучен елемент од неговиот пристап да и помогне на Украина. Четириесет и четири отсто од испитаниците во истражувањето рекле дека го поддржуваат планот на Трамп да ја „врзе американската воена поддршка за Украина со САД да добијат дел од рудното богатство на Украина“.

Две третини од републиканците ја поддржуваат идејата, како и секој петти демократ.

Севкупно, рејтингот на Трамп се одржува стабилен во изминатите неколку недели на 44 проценти.

Владимир Путин веројатно ќе одговори на предлогот за прекин на огнот со свое барање, изјави поранешниот советник на рускиот претседател, Сергеј Марков.

Во интервју за SkyNews, Марков изјави: „Русија се плаши дека периодот на прекин на огнот може да се искористи за целосна милитаризација на украинското општество од страна на НАТО“.

Затоа, како што тврди, Путин најверојатно ќе побара ембарго за испорака на оружје за украинската армија од други земји.

Кога новинар го прашал за можноста за испраќање мировници од европските земји, Марков се насмеал и одговорил: „Британските и француските трупи се дел од војната“. Тој додал дека мировниците обично доаѓаат од неутрални земји.

„Сите војници од европските земји ќе бидат сметани за окупатори, а руските војници ќе ги убиваат сите бидејќи дошле да ја ослободат Украина“, рече Марков.

Тензиите се зголемија кога беше прашан дали Русија ќе ги смета британските мировници за непријатели и учесници во војната.

„Да, затоа што Британија е учесник во војната“, одговори Марков, имајќи ја во предвид воената помош што Обединетото Кралство ја дава на Украина.