Русија утрово изведе масовен ракетен и дрон-напад врз повеќе украински градови, при што повредени се најмалку три лица во Киевската област.

Украинското воено воздухопловство соопшти дека биле лансирани ракети и десетици дронови кон регионот на главниот град, поради што низ целата земја се огласија сирени за воздушна опасност. Напади беа регистрирани и во Лавовската област, додека руските сили дејствувале во повеќе последователни бранови.

Последната серија ракети била забележана непосредно пред 7 часот утрово, а експлозии одекнале во Полтава, Луцк, Одеса и Запорожје.

Гувернерот на Киевската област, Никола Калашник, информира дека 42-годишен маж бил повреден во Фастив, каде украинските железници пријавија „масовно гранатирање на железничката инфраструктура“. Во Вишгородската област биле повредени уште две жени на возраст од 46 и 40 години, од кои едната е хоспитализирана.

Градоначалникот на Луцк, Игор Пољишчук, соопшти дека биле зафатени од пожар повеќе складишта за храна.

Полска реагираше на ескалацијата – полското воено воздухопловство објави дека подигнало борбени авиони за заштита на својот воздушен простор за време на повеќечасовниот напад на западна Украина.

Овој напад следи по украинските операции изминатите денови, кога дронови погодија важни руски енергетски објекти, меѓу кои пристаништето Темрјук во Краснодар и рафинеријата во Сизран, пренесе „Киев Индепендент“.

Европските лидери му ставиле до знаење на украинскиот претседател Володимир Зеленски дека токму тие имаат последен збор во одлуките за замрзнатите руски средства, објави „Киев Индепендент“, повикувајќи се на транскрипт до кој имал ексклузивен пристап.

Во разговорот меѓу германскиот канцелар Фридрих Мерц, францускиот претседател Емануел Макрон и претседателката на Европската комисија Урсула фон дер Лајен, лидерите нагласиле дека Европа сама ќе го контролира процесот околу репарацискиот заем за Украина и дека токму ЕУ е единствено одговорна за управувањето со руските имобилизирани средства.

Според истите информации, САД наводно лобирале кај европските земји да ги блокираат плановите за позајмување пари на Киев, што уште повеќе ја вжештило атмосферата во разговорот.

Транскриптот открива дека европските лидери недвосмислено му порачале на Зеленски дека одлуките околу руските средства ќе ги носи исклучиво Европа – без притисоци, без надворешно мешање и без прекинување на веќе дефинираниот план.

На меѓународниот аеродром во Сао Пауло, најголемиот во Бразил, избувна пожар кој предизвика драматична евакуација на 169 патници од авион на Latam Airlines, соопшти авиокомпанијата. Инцидентот се случил во четврток навечер, непосредно пред летот кон Порто Алегре.

Пожарот зафатил надворешна опрема на пистата во моментот кога авионот се подготвувал за полетување. Поради густиот чад, активирани биле сите безбедносни протоколи, а патниците излегле преку приклучните мостови и по тобоганите за итни случаи.

Од Latam уверуваат дека нема повредени и дека ситуацијата била брзо ставена под контрола. Снимките на социјалните мрежи покажуваат пламен непосредно под авионот и патници кои се спуштаат по тобоганите во ноќната темница.

Според авиокомпанијата, 159 патници биле успешно префрлени и стигнале во Порто Алегре следното утро, додека 10 биле пренасочени на други летови или превезени по земја.

Аеродромскиот оператор GRU Airport објави дека заради инцидентот, полнењето гориво на другите авиони било стопирано на 10 минути.

Latam посочи дека пожарот започнал од опрема на подизведувач задолжен за товарење на авионот Airbus A320, а истрагата за причините продолжува.