Американскиот претседател Доналд Трамп пред телефонскиот разговор со Владимир Путин изјави дека „многу елементи“ од мировниот договор во Украина се веќе договорени со неговиот руски колега.

Трамп на платформата Truth Social најави дека утрово ќе разговара со Путин. Тој рече дека иако се постигнати договори за некои прашања, „се уште треба да се договорат многу работи“.

„Секоја недела носи 2.500 загинати војници, од двете страни, и мора да престане СЕГА. Со нетрпение очекувам да разговарам со претседателот Путин“, напиша Трамп. 

„Ќе видиме дали можеме да постигнеме мировен договор, прекин на огнот и мир, и мислам дека ќе можеме да го направиме тоа“, изјави тој за новинарите еден ден претходно на „Ер Форс 1“.

Во своето ноќно обраќање во понеделникот, украинскиот претседател Володимир Зеленски го обвини Путин за продолжување на војната. „Овој предлог можеше одамна да се спроведе“, рече тој, додавајќи дека „секој ден во време на војна значи човечки животи“.

Францускиот претседател Емануел Макрон ја пофали „храброста“ на Зеленски во прифаќањето на предлогот за прекин на огнот и ја предизвика Русија да го стори истото. „Доста е смрт. Доста е со уништени животи. Доста е уништување. Оружјето мора да замолчи“, рече Макрон во објавата на платформата X.

Портпаролот на Кремљ, Дмитриј Песков, потврди дека утре ќе се одржи телефонски разговор помеѓу претседателот на САД, Доналд Трамп, и претседателот на Русија, Владимир Путин.

Меѓутоа, Песков не сакаше да открие повеќе детали за точниот момент на разговорот, ниту за темите што ќе се дискутираат.

„Ние никогаш не го правиме тоа, никогаш не ги откриваме деталите однапред. Разговорот навистина се подготвува. Според нашето разбирање, разговорите меѓу два претседатели не подлежат на никаква претходна дискусија за содржината – затоа тоа нема да го правиме“, изјави Песков.

Да потсетиме, претходно агенцијата Ројтерс пренесе дека американскиот лидер планира да одржи телефонски состанок со рускиот колега во вторник.

Тие известуваат дека Трамп ќе го покрене прашањето за териториите, како и за контролата над нуклеарните централи.

Американскиот претседател Доналд Трамп изјави оваа недела дека САД би можеле да „извршат разорни потези“ на руската економија за да ја натераат Русија да постигне мировен договор со Украина.

Меѓутоа, постои граница за тоа што Трамп може да направи против Русија, велат аналитичарите за Newsweek.

Тие истакнуваат дека Путин веќе три години води војна против Украина, и покрај тешките економски санкции од Западот. И вчера јасно стави до знаење дека е подготвен за примирје само ако тоа вклучува услови кои Киев многу тешко би можел да ги прифати.

Експертите веруваат дека најдобрата опција за Трамп да изврши притисок врз Москва е нешто што можеби најмалку е подготвен да го направи, а тоа е многу посилен притисок на извозот на руска нафта и гас, кои се главни извори на приходи за Русија и помагаат во финансирање на војната во Украина.

„Ако сакате побрзо решение за конфликтот во Украина, тоа е она што треба да го нападнете, континуираната продажба на руски енергенти“, изјави Емили Килкрис, виш соработник во Центарот за нова американска безбедност, додавајќи дека тоа е единственото што останало.

Но, таа верува дека администрацијата на Трамп можеби ќе се двоуми да преземе таков комплетен пристап за енергетски санкции против Русија, бидејќи тоа би предизвикало дополнителни економски потреси во САД, кои веќе се засилени поради трговската политика на Трамп.

Аналитичарите сметаат дека новото зголемување на цените на горивата предизвикано од построги енергетски санкции против Русија може да се одрази на американските гласачи поради Трамповото ветување да ги намали тие цени.

Марко Финли, експерт за енергија на Институтот Бејкер при Универзитетот Рајс, предвидува дека САД ќе бидат многу внимателни во врска со санкциите кои би можеле да го исфрлат руското нафтено производство од пазарот.

Западот во 2022 година го постави рускиот енергетски сектор како цел на поширок пакет економски санкции, координирани од САД, Европската унија и земјите-членки на Г7. Мерките вклучуваа забрана за извоз на руска сурова нафта преку море и ограничување на цената на руската нафта до 60 долари по барел.

Санкциите имаа за цел да го ограничат профитот на Москва, без да го прекинат целосно снабдувањето на земјите зависни од Русија. Но, и тогаш, Русија најде начин да ги заобиколи санкциите и продолжи да извезува нафта преку морски патишта.

Русија продолжи да извозува природен гас во делови од Европа и го зголеми снабдувањето со Кина, Индија и други земји кои не воведоа санкции.

Според извештајот на Ројтерс, руските приходи од нафта и гас се зголемиле за 26 отсто на 108 милијарди долари минатата година, а ЕУ во 2024 година потрошила повеќе на руска нафта и гас отколку што издвоила за финансиска помош за Украина.

Сега постојат неколку чекори што САД и нивните сојузници би можеле да ги преземат: намалување на горната граница на цените на руската нафта, сузбивање на извозот преку море и воведување вторични санкции за компании и трговски партнери, како што е Кина, кои продолжуваат да купуваат руски енергенси.

Експертите за енергија сметаат дека засилените санкции врз рускиот енергетски сектор ќе го разгневат Кремљ, а тоа ќе бара координација со сојузниците, што би било комплицирано, пишува Newsweek.