Македонија

Каква банана држава – Нема пари ни за посмртнина за пензионерите!

Повеќе од 3000 семејства на починати пензионери не добиле надомест за посмртнина – солидарниот фонд кој се полни од пензионерите секој месец – испразнет, податоците од Заводот за ревизија покажуваат дека многу семејства минатата година останале без посмртна помош за починатите, бидејќи во фондот недостигале уште 1,6 милиони евра.

Согласно добиени информации од Фондот во текот на 2021 година заклучно со месец октомври извршени се исплати во вкупен износ од 416.550.000 денари, при што поради зголемената стапка на смртност како резултат на тековната пандемија останале неисплатени уште 3.355 барања за исплати во вкупен износ од 100.650.000 денари (1,6 милиони евра н.з.) како резултат на недостаток на средства – стои во извештајот од Заводот за ревизија.

Им ја намалија посмртнината на пензионерите од 30 000 на 25 000 и им го покачија учеството во солидарниот фонд од 120 на 150 денари за месец, но залудно, и натаму недостигаат пари во солидарниот фонд.

„Со оглед на тоа што висината на задршката е еднаш веќе зголемена од 120 на 150 денари, потребно е да се пронајде извор на приходи кој нема да ги оптоварува нето пензиските примања, особено на најзагрозените категории на приматели на пензии“, забележале ревизорите – стои во извештајот од Заводот за ревизија.

Надлежните се правдаат дека поради зголемената смртност кај оваа група граѓани, трошоците за посмртнина биле поголеми, но уверуваат дека заклучно со јули, ќе бидат обесштетени сите семејства, односно посмртнината ќе изнесува 30.000 како и претходно. Оваа одлука инаку ја донесе Сојузот на здруженија на пензионери, а без претходна најава беше објавена во Службен весник.

Нема доволно средства во солидарниот фонд за исплата на посмртна помош за членовите на семејството на починатиот пациент, заради што, со пандемијата, бројот на смртност се зголеми за повеќе од 50 %. Членарината во овој фонд пензионерите ја плаќаат доброволно, и сега изнесува 150 денари. но тоа е времена мерка. Времена мерка е и намалената посмртнина на 25.000 денари и ќе трае до јули – вели Ментор Ќоку од Сојуз на здруженија на пензионери, одбор за Солидарен фонд.

Од Фондот за пензиско осигурување пак, се прогласија за ненадежни, бидејќи Солидарниот фонд бил независно тело од институцијата

Македонија

Андоновски најави: Доаѓа единствениот електронски идентификациски број за сите граѓани

Иако технолошката основа постои, македонските институции функционираат како „засебни острови“ и го кочат дигиталниот развој на државата, порача министерот за дигитална трансформација, Стефан Андоновски, денеска во Скопје. На годишната конференција на Американската стопанска комора, тој отворено ја критикуваше администрацијата и најави радикални мерки за искористување на заспаниот потенцијал на Платформата за интероперабилност.

„Не се доволни 2,6 милиони трансакции месечно на оваа платформа, може и мора да има десет пати повеќе“, беше јасен Андоновски. И покрај огромниот раст од 274% во ноември 2024 година во споредба со просекот, министерот смета дека тоа е само почеток. Проблемот не е во ИТ-то, туку во менталитетот и однесувањето на институциите.

„Вчера од еден од покрупните директори слушнав ваква констатација – тоа е мој податок што го прибирам по мои закони и немам зошто да го споделувам со друга институција од друг сектор. Проблемот е системски во размислувањето на администрацијата.“

Во насока на поврзување на податоците и заштита на граѓаните, Андоновски откри дека вчера Владата ги прифатила измените на Законот за Централен регистар на население, со што се воведува единствен електронски број на граѓанинот.

Овој број ќе биде анонимизиран матичен број. Ќе биде реплициран и во единствениот даночен број за граѓаните. Целта е да се поврзат податоците за секој граѓанин без да се загрози неговата приватност.

Иако Платформата за интероперабилност е задолжителна за сите 400 државни институции, досега се приклучени само 78. Министерот вели дека ова мора да се промени.

За првпат, со законски измени се воведува инспекциски надзор и се формира сектор за контрола. Конечно се предвидени казни и санкции за институциите кои одбиваат да се приклучат и да разменуваат податоци. Се очекува наскоро да се приклучат и коморите на нотарите, извршителите и адвокатите, како и приватните компании, кои сè уште се само десетина.

Андоновски истакна дека Македонија, за разлика од многу други држави, веќе ја има технолошката основа за комуникација меѓу институциите. „Има и поразвиени држави од нас кои ја немаат оваа платформа и за секоја услуга развиваат билатерални врски една со друга институција. Тоа кај нас е олеснето“, рече тој.

Министерството веќе работи на инсталирање на набавената нова хардверска инфраструктура за забрзување на размената и зголемување на безбедноста.

„Секоја нова електронска услуга нема да ја поддржуваме сè додека нема информација дека ја користи платформата во вистинска смисла.“

Најавени се и активности за дигитализација и приклучување на клучни регистри како Регистарот за адреси и новиот Интегриран информациски систем за управување со финансии (ИФМИС) во Министерството за финансии.

Македонија

Сиљановска: Јавниот обвинител треба да биде отпорен на политички влијанија

Претседателката Гордана Сиљановска Давкова денеска истакна дека јавниот обвинител треба да биде бескомпромисен во почитувањето на законот, заколнат борец за владеење на правото и отпорен на партиски и политички влијанија, нагласувајќи дека тоа е клучно за успешни судски реформи.

Сиљановска Давкова коментираше и за последната одлука на Владата за продолжување на постапката за разрешување на државниот јавен обвинител Љупчо Коцевски, потсетувајќи дека постојат јасни законски процедури за избор и разрешување на обвинител. Таа нагласи дека целосната транспарентност и професионалност во работењето на обвинителите е неопходна за намалување на корупцијата и криминалот, кои се глобален проблем според последниот Евробарометар.

Претседателката оцени дека законските измени што Владата ги испрати на Венецијанската комисија претставуваат значаен чекор кон подобро регрутирање и функционирање на Судскиот совет и судскиот систем, со цел да се зајакне владеењето на правото и транспарентноста во правосудството.

Македонија

Нов чекор во зачувувањето на традицијата: Промовирани македонските машки носии од Преспа во Пустец

Во гимназијата „Трајан Ѓорѓиовски и Митре Колевски“ во Пустец денес се одржа промоција на новоизработени македонски машки народни носии од Преспанскиот регион. Носиите се создадени во рамките на проектот „Создавање традиционални носии на македонското, влашкото и ромското национално малцинство во Корчанскиот регион“, кој го спроведува Македонското друштво „Сонце“ во партнерство со неколку организации и со поддршка на Комитетот за национални малцинства на Албанија.

По ланската реконструкција на четирите женски носии, денешната презентација на машките носии го комплетира целосниот фолклорен ансамбл на Македонците од Преспа, што ќе може да се претставува на домашни и меѓународни културни манифестации.

Претседателот на друштвото „Сонце“ од Корча, Васил Стерјовски, изјави дека овој проект е значаен чекор во зачувувањето и унапредувањето на македонската традиција во Албанија.
„Со ова, македонската културна ризница добива уште посилен и подостоинствен претставник и дома, и на меѓународната сцена,“ нагласи Стерјовски.