Ден по најавата на премиерот Мицкоски дека ќе се стопира постапката за разрешување на Коцевски, за да се овозможи време за обвинителите да работат на предметот за трагедијата во Кочани, Советот на јавни обвинители остана без кворум кога требаше да се издаде мислење за предлогот на државниот обвинител.

Генералниот секретар на Советот на јавни обвинители ги информираше новинарите дека седницата е одложена, а претседателката на Советот, Душица Димитриевска, зад камерите објасни дека утрово дознала дека тројца членови нема да присуствуваат поради здравствени и семејни причини. Според неа, не се работи за никакво тактизирање или скриена позадина, туку тоа што се случило е случајно, односно отсуството на членовите се совпаднало со моментот кога требало да се даде мислење за владиниот предлог за разрешување, по најавата на Владата да го повлече предлогот.

Седниците на Советот ги следат не само новинарите, туку и невладините организации. Коалицијата „Сите за правично судење“ го оцени како проблематично однесувањето на Советот на јавни обвинители, истакнувајќи дека ако отсуството на членовите било претходно најавено, тоа требало да биде констатирано на седницата и официјално да се објави на веб-страницата на Советот, заедно со причините за одложувањето.

Законскиот рок за да се даде мислење за предлогот за разрешување е до 3-ти април, а Советот за сега не добил официјално известување од Владата дека ќе биде стопирана постапката за разрешување на Коцевски. Од Владата велат дека и со мислењето на Советот, постапката ќе биде прекината.

Коцевски беше подложен на постојани критики од страна на властите, особено од премиерот Мицкоски, кој тврдеше дека тој работел неефикасно, правел професионални грешки и го нарушил угледот на обвинителството. Меѓутоа, по трагедијата во Кочани, реториката на премиерот се промени и го пофали обвинителството за соработката со МВР во истрагата. Некои експерти ја оценуваат оваа тактика како уцена и порака до Коцевски.

Судењето за грозоморното убиство на Вања и Панче со засилена динамика, првообвинетиот во обид да одолговлекува

На денешното судење немаше време да се започне со одбраната на обвинетиот Влатко Кешишев, човекот кој буквално му слугувал на Палевски во партијата Десна, му готвел, му го шетал кучето, ама и човекот кој ја однесе полицијата до местото каде што е егзекутирана и закопана Вања Ѓорчевска. Првообвинетиот Љупчо Палевски речиси еден час влезе во расправа со обвинителките и судот, барајќи им непостоечки доказ, наводна снимка од движењето на „рено-кангуто“, кое го вози токму тој и им дава инструкции на останатите на денот на убиството на девојчето

Судењето за двојното убиство на Вања Ѓорчевска и Панче Жежовски се прекина бидејќи првообвинетиот Љупчо Палевски речиси еден час бараше доказ за кој подоцна обвинителката кажа дека таква видеоснимка, на која инсистира обвинетиот, не постои.

– Таков доказ, односно видеозапис, наводно од камера број 67, не постои, сите податоци се добиени согласно наредбите за препознавање на таблиците преку системот на МВР за возилата „цитроен“ и „рено“, кажа обвинителката Жаклина Крстевска. Обвинетиот и неговиот бранител бараа некакво це-де од видеокамерите на проектот „паметен град“ за движењето на „рено-кангуто“, откако претходно пак инсистираа на записници во печатена форма. Очигледна е нервозата кај првообвинетиот, како што се доближува завршницата на процесот, па во еден момент си дозволи, обраќајќи му се на судијата Ивица Стефановски со зборовите „Го опоменувам Судот“… по што судијата му забележа на однесувањето. Палевски цело време креваше рака и бараше процедурално, па немаше време да се почне со одбраната на обвинетиот Влатко Кешишев, човекот кој буквално му слугувал на Палевски во партијата Десна, му готвел, му го шетал кучето, ама и човекот кој ја однесе полицијата до местото каде што е егзекутирана и закопана Вања Ѓорчевска.

Но, она што му одеше во прилог на денешното судење беше негирањето на вина од страна на обвинетиот Боре Видевски. Нему Палевски, за разлика од соочувањето со Велибор Манев, му постави само три прашања. – Дали сте се возеле во „цитроенот“ на Жежовски? – Кажав дека немам врска со случајот, одговори Боре. – Дали го негирате обвинението во целост? – Да. – Дали полицијата ве праша дали поседувате оружје? –Не, кусо одговори Видевски.

Претходно, обвинителките наизменично ги читаа двете изјави на обвинетиот Видевски дадени во истрагата во Јавното обвинителство. Во првата, веднаш по неговото приведување, на 04-12-2023 година признал дека во групата влегол поради финансиска криза, а на предлог на Велибор, кој му кажал дека им треба човек за собирање пари со изнуда. За разлика од Велибор, кој тврдеше дека планот бил да грабнат повозрасна жена, Боре кажал пред обвинителот дека по планот и сликите што му ги покажувал Палчо, станува збор за киднапирање на девојче за кое се знае точно во колку часот излегува од дома, по информации добиени од нејзиниот татко. Велибор ја отворил влезната врата од зградата на Ѓорчевски со шрафцигер, ја чекале во ходникот половина час. Според првата изјава на Боре, за која сега тврди дека била насила изнудена по полицискиот ќотек, тој ја турнал Вања, а Велибор ја качил на рамо завиткана во зелена вреќа за спиење и ја ставил во ѓепекот од „цитроенот“ на Панче. Мобилниот телефон на девојчето Велибор го искршил со чекан. Со врзани раце и нозе, Вања кусо била жива во местото викано Оризови Дупки, во една дупка ама претходно ископана од обвинетите.

„Палчо ги уби (Панче и Вања) со истиот пиштол, откако ја праша што ѝ работат родителите, а таа кажа дека мајката ќе даде сè што ќе побараат и оти имаат станови. Потоа слушнав како Палчо ѝ пука во главата, а кога го прашав зошто ја уби, тој само ги крена рамениците”, кажал обвинетиот во првиот исказ и признал дека Палевски планирал да бара пари од семејството и откако ја убил.

Во втората изјава, која Боре ја давал во обвинителството на 21-12-2023 година, исто како и сега на судењето, негирал сè што претходно рекол, односно каква било поврзаност со случајот. Соочувајќи го со доказите на обвинителството, судијата инсистираше кај Видевски да појасни неколку работи.

– Ги видовте снимките. Зошто клекнувавте со Кешишев зад колата пред дворот на Велибор кога поминува едно возило? – праша судијата. – Не сум се криел од нешто или некого. Немам поим зошто сум клекнал, можеби ми пречело нешто на главата, па сум се поднаведнал – одговори обвинетиот.

– На снимките се гледа дека на одреден датум доаѓате кај Велибор дома со вашата „шкода фелиција“, со изгаснати светла, во раните утрински часови, се гледа како ставате ракавици. Така ли е и зошто ставате ракавици? – праша судијата. – Не сум сигурен за саатницата и за датумите, мислам дека тоа не е во раните утрински часови, туку е навечер. Не знам ни сам која беше причината, мислам дека ми се јави Велибор да дојдам и ми рече ајде да се спуштиме надолу по патот и ми ги даде ракавиците. Без да размислам ги ставив и продолживме, но се вративме за десетина минути, бидејќи не видов никаква цел каде да се оди, одговори Боре. – Каде е вашиот пиштол? – го запраша судијата, на што овој рече дека не може да се сети каде го ставил, можеби бил изнесен некаде надвор. По нејасниот одговор на Видевски, судијата Стефановски нервозно бараше одговори.

– Го изнесе некој комшија или вие? – Јас го изнесов, но не се сеќавам каде го дислоцирав – рече Боре. – Надвор од куќата го изнесовте? – праша судијата.– Мислам дека да – рече Боре и додаде дека не може да се сети каде го однел.– Изнесовте пиштол и не се сеќавате каде е? – праша судијата.

Судијата закажа вкупно шест термини за рочишта на кои треба да се заврши со одбрана на останатите обвинети, следен да сведочи е Влатко Кешишев, па Александар Ѓорчевски и крајот е резервиран за Палевски. Тој денеска го отповика сведокот, кој според него требаше да потврди дека на денот на убиството на Вања заедно чекале ред во банка, бидејќи ја одбил поканата на Судот да дојде да сведочи. Судењето продолжува на 2 април.

Извор: Вечер

Министерството за внатрешни работи спроведе претрес во домот на Дејан Јованов, познат како Деко, како и во неговиот автомобил „Инсигниа“ и два угостителски објекти – дискотеката „Пулс“ и кафе барот „Класик“.

Претрес беше извршен и во канцеларијата на Државниот пазарен инспекторат во Кочани, поврзан со документацијата за неговите фирми.

Вчера, на распит беа повикани и неговата сопруга и ќерка.

„Во домот на Д.Ј. пронајдени и одземени се лаптоп компјутери, повеќе мобилни уреди, документација и други предмети. Одредени предмети беа одземени и од возилото и од угостителските објекти, како и финансиска документација. Во канцеларијата на ДПИ во Кочани беше пронајден и одземен компјутер, лаптоп и таблет, како и целокупната документација поврзана со правните субјекти во сопственост на Д.Ј.“, соопштија од МВР.

Инаку, кафе барот „Класик“ беше демолиран за време на протестите, еден ден по пожарот во Кочани, во кој загинаа 59 лица, а над 150 беа повредени.