Францускиот претседател Емануел Макрон предупреди дека Европската Унија може да воведе царини за кинеските производи доколку Пекинг не преземе конкретни чекори за намалување на трговскиот дефицит. Според француските медиуми, по официјалната посета на Кина, Макрон го заострил тонот и најавил дека Европа нема да остане пасивна.

Како што го цитира „Ле Фигаро“, претседателот истакнал дека ЕУ мора да размислува за протекционистички мерки доколку Кина не се обврзе да го запре економското нерамнотежје, кое го смета за „критично за иднината на Европа“.

„Им порачав дека ако не реагираат, ние Европејците ќе мораме наскоро да преземеме решителни мерки, слични на тие на САД, и да воведеме царини за кинески стоки“, изјави Макрон по враќањето од Пекинг.

Тој предупреди дека европскиот индустриски модел е под закана, особено секторите што историски се потпираат на автомобилската индустрија и машинските алати. Според него, дополнителен проблем се и високите американски царини кон Кина, воведени од претседателот Доналд Трамп, кои, како што вели, ги пренасочуваат кинеските производи кон европскиот пазар.

Макрон подвлече дека намалувањето на трговскиот јаз бара и ангажман од европска страна – преку привлекување кинески инвестиции, но под јасни правила. „Кинеските компании мора да инвестираат во Европа, но без создавање зависност или доминација“, истакна тој.

Секторите во кои се бара рамноправен пристап опфаќаат производство на батерии и електрични возила, преработка на литиум, ветерна енергија, електроника, рециклирачки технологии, индустриска роботика и современи компоненти.

Францускиот претседател смета дека ЕУ мора да ја заштити својата автомобилска индустрија од притисокот на кинеските електрични возила, истовремено вложувајќи во конкурентност и иновации. „Тоа бара поедноставување и зајакнување на единствениот пазар, вложување во нови технологии, фер заштита на границите, довршување на царинската унија и прилагодување на монетарната политика“, додаде Макрон.

Американскиот милијардер Илон Маск го критикува Европската Унија откако неговата платформа X беше казнета со 120 милиони евра за наводно кршење на правилата за транспарентност според Законот за дигитални услуги на ЕУ. Маск ја нарече казната „луда“ и нагласи дека таа е насочена не само кон платформата, туку и лично кон него.

Казната е резултат на неправилна имплементација на функцијата „сина етикета“ за верификација на корисничките сметки, како и непочитување на обврските за транспарентност во рекламирањето и ограничена достапност на податоците за регулаторите.

Маск дополнително изјави дека „ЕУ мора да се укине, а целосниот суверенитет да им се врати на земјите-членки“, додавајќи дека бирократијата на Унијата „полека ја задушува Европа“. Тој исто така предупреди дека ќе се одмазди против поединците кои стојат зад одлуката, без да даде детали за начинот на одмаздата.

Берлин – Рускиот амбасадор во Германија, Сергеј Нечаев, денес предупреди дека користењето на замрзнатите руски средства за финансирање на Украина би се сметало за „кражба“ и би носело „значајни последици“.

Нечаев го изнесе својот став пред средбата меѓу германскиот канцелар Фридрих Мерц и белгискиот премиер Барт де Вевер. Тој нагласи дека секоја трансакција која вклучува руски имот без согласност на Русија ќе биде сметана за кражба.

„Јасно е дека кражбата на руски државни средства ќе има далекусежни последици“, додаде амбасадорот, пренесе фламанската телевизија VRT.