Во Основниот кривичен суд Скопје  вчера започна повторното судење за случајот во кој загина пешакот Слободан Ангеловски кој беше прегазен на пешачки премин на мостот „Гоце Делчев“ во центарот на Скопје. Причина за новиот почеток на овој случај е тоа што Апелацискиот суд Скопје побара супервешетачење откако претходно одлучи дека другите две вештачења, онаа на оштетеното семејство и на обвинетата биле различни.

На вчерашното рочиште било договорено дека повторно ќе се испитуваат вештите лица и дека очекува судот во најкус можен рок да го заврши судењето.

„За нас првостепената пресуда што претходно беше изречена беше сосема коректна затоа што беше заснована на чиста како солза фактичка состојба во која судот утврди дека сега починатиот Слободан се движел на пешачки премин, а обвинетата возела над дозволената брзина и не застанала на пешачкиот премин. За мене никаков друг исход не е возможен“, изјави адвокатот.

Синот на загинатиот слободан, Столе Ангеловски по рочиштето изјави дека е запрепастен од тоа дека обвинетата повторно се изјаснила дека не е виновна за предизвиканата сообраќајна несреќа во која загина неговиот татко и покрај тоа што направила четири прекршоци и тоа, брзо возење, непропуштање на пешачки, возење со забрана и изјава на сведок кој кажува дека таа додека возела гледала во мобилниот телефон наместо да гледа напред.

„Се надевам дека судот овој пат ќе биде многу побрз за разлика од претходно кога процесот траеше три години и се надевам на правична одлука. Давам поддршка на семејството на Фросина Кулакова и на сите кои ги знашла ваква трагедија. Секое доаѓање на суд за мене е непријатно. Ми се враќа сликата од тој кобен и несреќен ден. Мене секое доаѓање на суд ми е измачување. Затоа се надевам дека судот овој пат многу побрзо, поефективно и правично ќе ја осуди обвинетата“, изјави Ангеловски по одржаното судско рочиште, пренесе МКД.МК.

Слободан Ангеловски беше прегазен во јануари 2022 година отако во него удри автомобил возејќи со голема брзина.

Во изминатите 24 часа најмногу дожд наврнал во Куманово 15 l/m2, а најмалку 1 литар на метар квадратен во Претор, Струмица, Гевгелија, Берово, Тополчани.

Според УХМР, 14 l/m2 наврнале во Лазарополе, 13 Маврови Анови, 11 Крушево, 10 Крива Паланка, Тетово, Пожаране, 8 Скопје-Петрове, Попова Шапка, 5 Велес, 4 Скопје-Зајчев Рид, Охрид, и 2 во Битола, Штип и Виница.

Времето денеска променливо облачно со локални врнежи од дожд и појава на грмежи. Претпладне процесите ќе бидат поинтензивни во источните делови каде ќе бидат во форма на невреме со пообилен пороен дожд (20 l/m2), силен ветер (над 60 km/h) и услови за изолирана појава на град. Попладне облачноста ќе се намали.

Максималната температура ќе биде во интервал од 17 до 24 степени.

Во Скопје, променливо облачно со умерен до засилен јужен ветер. Претпладне во делови од котлината ќе има повремен пороен дожд и услови за појава на грмежи, а попладне облачноста ќе се намали.

Максималната температура ќе достигне до 24 степени.

Министерката за енергетика, рударство и минерални суровини Сања Божиновска денеска оствари средба со својот колега од Азербејџан, Парвиз Шахбазов, во рамки на официјалната посета посветена на унапредување на енергетската соработка меѓу двете земји.

Како што информираат од Министерството, на средбата била истакната заедничката заложба за зајакнување на партнерството во областа на снабдување со гас, со фокус на можностите за долгорочни договори за снабдување со гас, како и потенцијалните инвестиции во гасната инфраструктура во Македонија.

Шахбазов истакнал дека земјава може да стане регионален центар за транспорт на гас, нагласувајќи дека Азербејџан е подготвен веднаш да се вклучи во соработка на конкретни проекти и да понуди можности за заеднички проекти доколку постои интерес.

– Македонија може да стане регионален центар за транспорт на гас, ние сме подготвени веднаш да се вклучиме во соработка на конкретни проекти и да ви понудиме и експертиза, но и сериозни можности за заеднички проекти доколку постои интерес и од ваша страна, истакнал Шахбазов.

Посебен акцент бил ставен на можната соработка меѓу државната енергетска компанија Електрани на Северна Македонија (ЕСМ) и азербејџанската државна нафтена компанија СОКАР.

Во соопштението се наведува дека партнерството помеѓу ЕСМ и СОКАР е клучно за нашата енергетска трансформација, затоа, во таа насока, било договоренa средба за интензивирање на активностите во рамки на склучениот меморандум за соработка што беше потпишан за време на КОП 29 самитот во Баку.

Шахбазов упатил и директна покана до министерката Божиновска да учествува на претстојниот министерски состанок на советодавниот совет за јужниот гасен коридор како и за третиот министерски состанок на советот за зелена енергија.

Божиновска ја нагласила подготвеноста на Македонија за активна соработка во повеќе проекти што ќе обезбедат сигурност, одржливост и енергетска независност за земјата, истакнувајќи дека оваа средба претставува значаен чекор во насока на реализација на тие цели.

„Азербејџан ни нуди конкретна соработка која ќе ни помогне да се мапираме како сериозен регионален центар за транспорт на гас. Ова е нешто што би имало стратешко значење за енергетската иднина на нашата земја и би донело поволности и за економијата, но и за граѓаните. На ова сериозно ќе работиме и се надеваме на помошта од нашите меѓународни партнери“, истакна Божиновска.

Во рамките на официјалната посета на Азербејџан, македонската делегација предводена од претседателката Гордана Сиљановска – Давкова оствари и работна средба со премиерот на Азербејџан Али Асадов и со претседателката на Националното собрание на Република Азербејџан, Сахиба Гафарова.