Министерството за здравство ја информира јавноста дека медицинските тимови на здравствените установи и денеска се целосно ангажирани во обезбедување соодветна медицинска нега за сите пациенти. Состојбата на пациентите се следи внимателно, а понатамошните медицински постапки се спроведуваат врз основа на конзилијарни одлуки.

Во текот на денешниот ден, пациентите се распределени по здравствените установи низ земјата, и тоа:

Клинички центар – 52 пациенти
ГОБ „8 Септември“ – 17 пациенти
Универзитетска клиника „Св. Наум Охридски“ – 12 пациенти
Клиника за токсикологија – 10 пациенти
Аџибадем Систина – 7 пациенти

Покрај обезбедувањето медицинска нега во земјата, дел од пациентите се транспортирани во здравствени установи во странство, благодарение на меѓународната поддршка и соработката со партнерските земји:

Литванија – 4 пациенти
Австрија – 2 пациенти
Словенија – 2 пациенти
Република Србија – 12 пациенти
Република Бугарија – 1 пациент

Во текот на ноќта и утрешниот ден се очекува медицински транспорт од Австрија, Грција и Хрватска, со авиони и хеликоптери за натамошен трансфер на пациенти.

Министерството за здравство информира дека сите пациенти кои се префрлени во странство се во стабилна состојба и под континуирана медицинска нега.

Дополнително, во соработка со ЈЗУ Психијатриска болница-Скопје и Клиниката за психијатрија се формирани мобилни тимови составени од психијатри и психолози, кои обезбедуваат психолошка поддршка за пациентите и нивните семејства.

За сите кои имаат потреба од психолошко советување или помош, достапна е телефонската линија 078 378 754, каде што стручни лица обезбедуваат поддршка.

Министерството за здравство останува во постојана комуникација со сите надлежни институции и меѓународни партнери за натамошна координација и поддршка.

Крис Павловски, Македонец по потекло, основач и сопственик на компанијата Рамбл и еден од клучните луѓе во „Тимот Трамп“ изрази сочуство до семејствата на починатите и повредените во трагедијата во Кочани.

Тој, преку Црвениот Крст донираше 1 милион денари за поддршка на семејствата и жртвите.

Столе Боев, член на обезбедувањето на дискотеката „Пулс“, вечерва изјави дека не чувствува вина. Тој е осомничен заради тоа што во дискотеката се пуштени малолетници, што е противзаконски.

„Јас ги спасив сите што можев и многу ми е криво за тие што не успеав да ги спасам. Со голема болка и тага изразувам сочувство до семејствата на починатите. Голем дел од нив се мои пријатели и другари кои лично ги извадив. Не знаете како ми е, но тоа е тоа“, изјави Боев.

Тој додаде дека гневот на Кочани не е насочен кон нив.

„Луѓето кои протестираат доаѓаат од нашиот круг, бараат правда за нас и слобода. Ние успеавме да ги извадиме сите преживеани. Јас сум дел од обезбедувањето кое успеа да ги спаси“, рече Боев.

Во трагедијата која се случи во дискотеката, загинаа 59 лица, меѓу кои и малолетници. 20 лица се во тешка здравствена состојба.