По повеќемесечна предистражна постапка во предмет што во Основното јавно обвинителство за гонење на организиран криминал и корупција беше оформен по иницијатива на ДКСК, а по кој по наредби на обвинителството постапуваше Одделот за сузбивање на организиран и сериозен криминал при МВР, во текот на вчерашниот ден и денес беше спроведена акција. Во акцијата што под раководство на јавен обвинител се спроведуваше на повеќе локации во Скопје, Велес и Кичево се лишени од слобода 11 лица.

-Постапувајќи по кривичната пријава поднесена од МВР, предметниот јавен обвинител денеска донесе Наредба за спроведување на истражна постапка против 13 физички и едно правно лице. Постои основано сомнение дека десет лица како созвршители или помагачи сториле кривично дело Злоупотреба на постапка за јавен повик, доделување на договор за јавна набавка или јавно-приватно партнерство. На двајца осомничени и на правното лице им се става на товар дека освен кривичното дело Злоупотреба на постапка за јавен повик, доделување на договор за јавна набавка или јавно-приватно партнерство, сториле и кривично дело Перење пари и други приноси од казниво дело, додека едно лице е осомничено за кривично дело Перење пари и други приноси од казниво дело, информираат од ОЈО и додаваат:

-Во периодот на 2021 – 2023 година двајца осомничени, во својство на основачи и управители на кривично одговорното правно лице свесно повредувајќи ги прописите за постапката за јавен повик за набавка на мазут за потребите на ТЕЦ Неготино поднеле невистинита документација. Со намера да го изиграат договорот не ги извршиле обврските и ги повредиле правилата остварувајќи корист од големи размери за кривично одговорното правно лице а на штета на државниот буџет во вкупен износ од 10.304.324.094 денари или околу 167.549.985 евра, информираат од ОЈО.

Според информациите од Обвинителство во намерата со умисла им помогнале осомничените вработени во АД Електрани на Северна Македонија – Скопје, кои се наоѓале на високи позиции од генерален директор и директори на сектори до претседатели и членови на комисии поврзани со јавни набавки, спроведувајќи постапки за јавна набавка на мазут спротивно на Упатството за начинот на спроведување на јавните набавки во АД ЕСМ. Со непочитување на начелата на сразмерност, конкуренција, еднаков третман и недискриминација на економските оператори, иако знаеле дека правното лице не ги исполнува бараните критериуми за носител на јавната набавка, помогнале да се склучат Договори за јавна набавка во корист на истото и му овозможиле да испорачува мазут се до 24.02.2023 година.

-Паричните средства кои осомничените ги прибавиле со кривичното дело, а кои претставуваат противправно остварена имотна корист од спроведена постапка по јавен повик на АД Електрани Северна Македонија – Скопје, во периодот од месец декември 2021 година до месец април 2023 година ги пуштиле во промет, промениле и пренеле на друг со цел да се прикрие изворот на потеклото. Со дел од средствата купиле две моторни возила„Mercedes Benz“, дел ги трансферирале на своите сметки во разни банки, а потоа ги подигале во готовина. Воедно, врз основа на договор за посредување и Анекс кон договорот, склучен помеѓу осомниченото правно лице и осомничен сопственик на правно лице со иста дејност, во два наврати биле префрлени средства во вкупен износ од 72.000.000,00 денари за наводно извршени работи согласно договорот кој претставувал само привидно средство за вршење на предметните трансакции. Осомничениот така примените парични средства, свесен за нивното потекло со цел да ја прикрие нивната локација ги трансферирал по основ на ,,позајмица’’ кон своето правно лице.

Имајќи ги предвид околностите и тежината на стореното дело, јавниот обвинител на Основното јавно обвинителство за гонење на организиран криминал и корупција на судијата на претходна постапка при Основниот кривичен суд Скопје му предложи на пет лица да им биде определена мерка притвор, од кои за едно лице мерката да се примени по неговото пронаоѓање. Едно лице осомничено и во предметот „Адитив“ веќе се наоѓа во притвор, додека за останатите осомничени се предложени мерки за обезбедување присуство, информираат од ОЈО.

Комисијата за заштита на конкуренцијата преку соопштение информираше дека во изминатиов период извршила повеќе дејствија во правните субјекти кои се опфатени со Законот за забрана на нефер трговски практики во синџирот на снабдување на земјоделски и прехранбени производи.

Врз основ на прибавените податоци, против две друштва кои се активни во трговијата на земјоделски и прехранбени производи преку своја малопродажна мрежа на територијата на Македонија, поведена е прекршочна постапка поради непочитување на одредбите од Законот. Доколку по завршување на прекршочната постапка се потврди постоењето на прекршок, против правните лица и одговорните лица во истите ќе бидат изречени соодветни казни заради сторените прекршоци“, се вели во соопштението на комисијата.

„Денес се случи она што по трет пат се случува, кога пред да се случи седница во Собрание, СДС најавува жестоко дебатирање, жестоко спротивставување, тоа беше случај со ребаланс на Буџет, со Буџетот, со Законот за заемот од Унгарија и еве и сега. Ако според Деловник до вчера требаше да се достави список на пријавени говорници кои ќе зборуваат по интерпелациите и СДС уредно го имаше доставено, денес се случи да ја променат одлуката, да земе збор само кооординаторот и на крајот од говорот да каже дека тие нема да учествуваат на оваа седница“, прецизираше во своето излагање пратеничката од редовите на владејачката ВМРО-ДПМНЕ, Дафина Стојаноска во гостување во емисијата „Само вистина“ на Канал 5 телевизија.

Според Стојаноска преседан е поставувањето на Дамева за член на Судски совет, додавајќи дека според Устав, Собранието предлага адвокат, универзитетски професор, или истакнат правник. Таа истакна дека Дамева без ниту еден поминат ден во судница претходно не би требало да ја оценува, или следи работата на судиите.

„Уште еднаш би повторила дека повторно ги пуштаат во вода луѓето коишто тие ги поставија, тоа се случи со СЈО, со Русковска, со Љубомир Јовевски, тоа се случи токму и денес. Луѓето коишто тие ги протнаа да бидат членови на Судски совет, за Дамева којашто беше претпоследна претседателка на Судскиот совет. Ако Уставот вели дека Собранието предлага или универзитетски професор, или адвокат, или истакнат правник, прв случај или преседан беше Дамева да стане член на Судскиот совет без ниту еден ден поминат во судница. И замислете таква личност да оценува, да ја следи работата на судиите“, децидна е Стојаноска.

Стојаноска истакна дека ВМРО-ДПМНЕ не правела упад во Судскиот совет, напротив ВМРО-ДПМНЕ имала намера да го департизира ова судско тело коешто треба да биде независно во своето делување. Таа образложи дека Судскиот совет не работел согласно закон, прекинувал судски постапки и селективно делувал и од таа причина се случиле и интерпелациите. Стојаноска испрати јасна порака дека очекува да се пробуди моралот кај петте членови на Судски совет и да поднесат оставка после изгласаните интерпелации.

„И за мене впрочем не беше упад ова денес што го направи пратеничката група на ВМРО-ДПМНЕ и Коалицијата, туку би се изразила дека Судскиот совет вршеше долго време упад врз правосудниот систем на оваа држава, со тоа што не работеше согласно законот за Судскиот совет, не постапуваше, селективно делуваше, прекинуваше судски постапки, имаше мноштво на преседани коишто денес добар дел од колегите ги напоменаа и токму затоа се случија интерпелациите. И ова е делот којшто е во рамките на можностите на она што како пратеници можеме да го направиме. Да, очекуваме да се пробуди моралот кај овие петмина коишто Собранието ги бира и Собранието денес им ги изгласа интерпелациите“, заклучува Стојаноска.