„Околу 5 отсто од испорачаната електричната енергија се краде! Пресметките на ЕВН покажуваат дека, според пазарните цени, годишно се краде струја за повеќе од 100 милиони евра!“ – објави информативниот портал „Пари“ во својата редакциска анализа со наслов „Крадат струја за 100 милиони евра годишно, сите ја плаќаме и никој не им може ништо“.

Покрај другото, „Пари“ пишува: „Катастрофално е што тоа сите го плаќаме. На ЕВН Електродистрибуција, во одреден процент, Регулаторната комисија за енергетика и ги признава овие кражби како дел од така наречените технички загуби и тој признат трошок влегува во цената на струјата. Но, дури и непризнатите загуби, на индиректен начин ги засегаат сите, затоа што тоа се пари кои некој ги украл и кои компанијата не може да ги вложи во енергетскиот сектор.“

„Со енергетската криза и со значителниот раст на цените на берзите, признатите комерцијални загуби (кражби) се пресметуваа и според тие огромни берзански цени, затоа што Електродистрибуција така ги плати и тој износ влезе во цената. Од ЕВН објаснуваат дека во 2022 година, во јануари и февруари струјата за покривање на загубите беше набавена на отворен пазар по цена од 280 евра за еден мегаватчас. Од март до декември годинава струјата за таа намена ќе се набавува од ЕСМ по цена од 150 евра за еден мегаватчас.“

„Со максимално мобилизирање од страна на надлежнит, за да се стават во функција сите производствени капацитети на ЕСМ, се донесе одлука со домашно, поефтино производство да се покријат техничките загуби во системот, во кој влегуваат и кражбите. Наместо да му се дадат овие киловати на стопанството по пониска цена, кое секојдневно алармира за скапата струја, што ја плаќа на отворениот пазар, тие се трошат за покривање на кражбите.“

„Од ЕВН велат дека ‘најпроблематични региони, каде што не постојат услови за работа и спроведување проекти за намалување на загуби, се Арачиново, Грчец, Сарај, Крушопек, Сингелиќ, Серава и Студеничани’. ‘Има и други региони со помалку откриени кражби, но мерките и активностите за спречување на кражбите важат еднакво за сите.’ – нагласуваат од компанијата.“

„Во Арачиново има чести напади врз вработените од ЕВН“

„Во јавноста беа објавени вџашувачки бројки за кражбите на струја во скопската населба Арачиново. Загубите по трафостаниците се движат од 56 до 96 проценти. Од ЕВН за отворено изнесуваат дека ова е место каде што не можат да се справат со крадците и оти во битката немаат доволна поддршка ниту од локалната власт, ниту од МВР.“

„Нема безбедност за вршење на редовните работни активности. Вработените постојано се соочуваат со зборовни, а често и со физички напади. Постојано има оштетување на опрема. Алармите се оштетени во сите ормари. Обидите на општинските власти не овозможија решавање на проблемот и да има нормални услови за работа на терен. Нема секогаш доволно поддршка од МВР.’ – укажуваат од ЕВН.“

„Иако крадењето струја во последно време се поврзува со ‘копање’ криптовалути, од ЕВН велат дека струја се краде и од страна на домаќинства, за индивидуални потреби, оти кражби има и од угостителски објекти и од мала индустрија… За кражба на електрична енергија, топлинска енергија или природен гас се предвидува казна до 5 години затвор, како и парични казни од 5.000 до 20.000 евра.“