Фудбалската федерација на Македонија (ФФМ) денеска на вонредно собрание во Скопје со акламација го избра Масар Омерагиќ за нов претседател.

Успешен стопанственик и поранешен фудбалер на Вардар и шампионската генерација на Слога Југомагнат, Омерагиќ беше единствен кандидат на вонредното изборно собрание кое се одржа во Скопје.

– Јас сум човек од фудбалот, еден од вас и знам во која насока треба да го развиваме македонскиот фудбал. Како и во фудбалот, ова е тимска работа, во која треба многу трчање и многу пот за да се постигнат целите. Со работа започнуваме веќе од утре. Имам неколку клучни точки кои ќе ги применам во мојот мандат и пред сè враќање на легендите во структурите на македонскиот фудбал – изјави Омерагиќ, најавувајќи притоа нулта толеранција за корупција во фудбалот.

Изборот на Омерагиќ на вонредното собрание преку свои претставници му го честитаа УЕФА и ФИФА, посакувајќи успеси на македонскиот клупски и репрезентативен фудбал во годините кои доаѓаат.

Изборот на Омерагиќ уследи по оставката која неговиот претходник на должноста Муамед Сејдини ја поднесе на средината од ноември, четири месеци пред да му истече вториот мандат на чело на македонскиот фудбал.

Омерагиќ е седмиот претседател на ФФМ, по Алексо Кипровски, Љубисав Иванов, Ламбе Арнаудов, Харалампие Хаџи – Ристески, Илчо Ѓорѓиоски и Муамед Сејдини.

,,За почисто Кавадарци“ и ,,Произведено во Македонија” се натписите на новите возила метларки кои почнаа да го чистат Кавадарци. Општина Кавадарци набави три метларки-свипери од домашно производство, односно од марката Грин Машинс на БРАКО и со оваа набавка, машинскиот парк на комуналното претпријатие сега е зголемен со три нови возила, кои се ефикасни и економични, а предност е што одржувањето и сервисирањето го обезбедува самиот производител кој се наоѓа во Велес.

Директорот на Грин Машинс, Ангел Анѓушев, при предавањето на возилата на комуналното претпријатие во Кавадарци, се заблагодари на довербата на градот, и потенцираше дека иако Грин Машинс продава во 50 држави низ целиот свет и дека годинава само во еден голем светски град се продадени 40 возила, сепак овие три возила во Кавадарци и значат многу на компанијата и на нејзините вработени затоа што ќе работат и ќе чистат дома, во Македонија.

Градоначалникот на Кавадарци, Митко Јанчев нагласи дека општината секогаш вложува во модерни решенија за подобри услуги за граѓаните и дека е прва општина по главниот град која во 2018г започна со машинско метење на градските улици.

На 23-ти Декември (понеделник) во Тетово, по повод престојoт на официјална делегација предводена од Претседателот на големиот парламент на Република Турција, Секторот за внатрешни работи Тетово ќе воведе посебен режим на сообраќај во централното градско подрачје во периодот од 5 часот наутро до завршувањето на официјалната посета. 

Во овој период ќе биде забрането паркирање на возилата од клучка Брвеница до Тетовски универзитет, потоа на булевар ,,Илинденска“ на потегот од крстосницата со улицата „Брвенечка кривина“ до „Шарена џамија“, по улица ,,Киро Ристоски – Дрнц“, улица ,,Луботенска“, до Арабати Баба Теќе, и по улицата „Ѓорче Петров“ и улица „Браќа Миладинови“. Потоа, булевар „Видое Смилевски Бато“ од кружен тек со булевар „Илинденска“ до улица ,,Фуштанска“ и обратно. 

Возилата кои ќе бидат затекнати паркирани на обележани паркинг места ќе бидат подигнати со специјално возило пајак и сопствениците ќе може да си ги земат без никакви надоместоци, додека тие возила што ќе бидат подигнати од недозволени места за паркирање ќе се соочат со законски мерки. Исто така, на сите други улици во градот, каде е веќе забрането паркирање, ќе се санкционираат и подигнуваат возилата со цел да се обезбеди непречено и безбедно движење на другите учесници во сообраќајот.

СВР Тетово со апел до граѓаните во понеделник – 23 Декември – да не се движат со возила во централното подрачје без поголема и неодложна потреба и да ги почитуваат и да постапуваат по наредбите и насоките на полициските службеници.