Балкан

Средба на Заедничката комисија за историски и образовни прашања меѓу Македонија и Бугарија

Заедничката мултидисциплинарна експертска комисија за историски и образовни прашања меѓу Северна Македонија и Бугарија, според најавата од Министерството за надворешни работи, денеска ќе одржи средба.

МНР вчера соопшти за средбата споделувајќи информација дека Димитар Љоровски, историчар и професор во Институтот за национална историја – Скопје, е назначен за нов член на Комисијата.

-Љоровски е именуван за нов член на Комисија согласно со неговата експертиза и препораките на Комисијата за соодветни покривање области од нивната работа, информираше МНР.

Заедничката македонско-бугарска комисија за историски прашања на 15 август усвои и објави препораки кои се однесуваат на подобрување на учебниците по историја за 6-то одделение во Северна Македонија и 5-ти клас во Бугарија, како и препораки за заедничко чествување на личности од средниот век – Св. Кирил и Методиј, Св. Климент, Св. Наум и Цар Самоил. Тие препораки се усвоени од страна на Заедничката меѓувладина комисија формирана согласно со Договорот за пријателство, добрососедство и соработка меѓу Република Северна Македонија и Република Бугарија.

Копретседателот на македонскиот тим во Комисијата, Драги Ѓорѓиев по објавата на препораките, на прес-конференција говорејќи во однос на учебниците, појасни дека се оди на тоа да се менуваат работи кај кои има недоразбирање и кои можат да придонесат за нарушување на односите меѓу двата народа и двете држави, и кои можат кај младите генерации да предизвикаат тензии, омраза итн.

– Во таа смисла Комисијата работи на надминување на тие места во учебниците, што верувам е една задача која ја има и секоја комисија која работи на вакви историски прашања во однос на учебниците по историја, рече Ѓоргиев.

Како што оцени, периодот на 19 и 20 век ќе биде еден од најтешките за кои ќе расправа Комисијата.

– Ние никогаш не сме рекле дека мора да дојдеме до заеднички став и до унисоно мислење. Тој период несомнено ќе биде тежок, мачен период за којшто ќе дискутираме, дискусиите ќе траат и во крајна линија ако ние се договориме, успееме да најдеме некакво решение ќе го презентираме. Ако не успееме да најдеме, тогаш нема решение. Не мора да значи дека оваа Комисија по секоја цена мора да донесе решенија за историските недоразбирања што постојат меѓу македонската и бугарската историографија, рече Ѓоргиев на новинарско прашање.

Балкан

Вучиќ предлага сите земји од Западен Балкан истовремено да влезат во ЕУ

Белград – Претседателот на Србија, Александар Вучиќ, денеска изјави дека единствена стратегија за стабилен Западен Балкан е сите кандидати од регионот да станат членки на Европската Унија истовремено. Изјавата ја даде на форумот „BELTALKS: Белградски економски разговори“, организиран од GLOBSEC.

„Ако прифатите еден, двајца или тројца од нас, што ќе правиме со останатите? Како ќе ги решиме отворените прашања? Дајте сите да се чувствуваме добро“, рече Вучиќ, додавајќи дека само Европа без внатрешни граници може да гарантира стабилност и напредок за народите во регионот.

Претседателот истакна дека со овој колективен пристап србите, Бошњаците, Албанците и Хрватите ќе се чувствуваат подобро и дека токму тоа ќе го пренесе на средбите во Брисел со Урсула фон дер Лајен и Антонио Кошта.

Во врска со кризата околу Нафтената индустрија на Србија, Вучиќ наведе дека државата ќе ја штити својата економија и инвестициски рејтинг, наведувајќи три можни решенија, вклучително и интервенција на државата.

На крајот од говорот, Вучиќ предупреди дека светот се движи кон нова голема војна во следните осумнаесет месеци, но истакна дека Србија ќе продолжи да се однесува воздржано и одговорно, и покрај притисоците од соседите.

Балкан

Албанија станува центар за мигранти на балканот?

Албанската Влада го одобри Националниот план за непредвидени ситуации за периодот 2026-2028, со цел да ги подготви институциите за зголемените миграциски текови на територијата на земјата.

Според документот, прифатните центри нема да се концентрираат во еден град, туку ќе бидат распределени според мапата на миграциските текови и главните премини, особено во југoисточните и јужните региони – Корча, Ѓирокастро и Валона. Планот предвидува сместување на мигранти од Авганистан, Пакистан, Иран, Сирија, Либан и Газа, кои Албанија и Србија ги користат како транзитна рута кон Грција.

Националниот план ја нагласува улогата на централните и локалните институции во управувањето со кризата, вклучувајќи итно сместување, храна, здравствена заштита и психосоцијална поддршка за мигрантите. Албанските власти посочуваат дека целта е да се гарантираат правата на мигрантите и ефикасно управување со тековите на миграција.

Албанија веќе има прифатен центар во Лежа, во пристанишниот град Шнѓин, и сместувачки камп во Ѓадр, кои, и покрај изградбата пред две години, не профункционираа поради одлуки на судот во Рим. Италијанската премиерка Џорџа Мелони, сепак, најави дека нивната работа наскоро ќе биде активирана.

Националниот план стапува на сила по објавувањето во Службен весник и ќе служи како правна основа за сите теренски акции за управување со миграцијата, при што се нагласува географската улога на Албанија во балканската миграциска рута кон Централна Европа.

Балкан

Анкета: Огромни 83% од Грците уверени дека корупцијата владее во земјата

Шокантни податоци излегоа од најновата анкета на „Палмос Анализа“! Граѓаните на Грција се едногласни: Корупцијата е длабоко вкоренета. Дури осум од десет Грци (83%) сметаат дека феномените на корупција постојат во земјата во голема или прилично голема мера.

Уште подраматично, повеќе од една третина (38%) од анкетираните признале дека лично се соочиле со корупција во изминатите 12 месеци.

Анкетата, спроведена за Националниот орган за транспарентност (НТА), јасно покажува дека најчесто пријавуван сектор со 23% од испитаниците е здравството. Јавната администрација и Локалната самоуправа следат со 14%. Политиката е на трето место со 13% и Судството и Урбанистичкото планирање/Јавни работи се околу седум проценти.

Иако младите до 24 години начелно ја осудуваат корупцијата, „Катимерини“ пренесува дека таа нетолеранција избледува кога станува збор за лична потреба.

Интересно е што високообразованите граѓани имаат најмрачна перцепција: дури 64% од испитаниците со магистерски или докторски степен изјавиле дека корупцијата е присутна во многу голема мера. Само мизерни три проценти од Грците веруваат дека корупцијата е занемарлива.

Корупцијата добива најголема толеранција кога е поврзана со бизнис интереси, во односот бизнисмени-владини службеници за промовирање инвестиции и за поволни законски прописи кои „олеснуваат“ инвестиции кои ќе отворат работни места (дури и со значително влијание врз животната средина).

Се толерираат дури и интервенции за преместување на војници!

Администраторката на Националната академија на науките, Александра Рогаку, предупредува: „Овој феномен е меѓународно признат како една од главните причини за заминување на висококвалификувани млади научници од земји со висока стапка на корупција, во потрага по дестинации што нудат институционална стабилност, меритократија и еднакви можности.“

Грција се соочува со горчлива вистина: корупцијата не само што го нагризува системот, туку и ги брка најдобрите умови од земјата.