Европа

Денеска e погребот на кралицата Елизабета II, се очекуваат околу две илјади гости (ВИДЕО)

Video

Британската кралица Елизабета Втора, која ќе остане запаметена како суверен што владеел повеќе од 70 години, ќе биде погребена денеска во Лондон.

На погребот се очекуваат околу 2.000 гости, меѓу кои и неколку стотици шефови на држави и членови на различни монархии во светот. Тоа ќе биде првиот државен погреб по смртта на премиерот Винстон Черчил во 1965 година.

Полицијата изјави дека безбедноста на погребот ќе биде повисока од безбедноста на Олимписките игри во Лондон во 2012 година.

Граѓаните можеа до утрово да ѝ оддадат последна почит на кралицата во Вестминстерската сала пред да почне погребната церемонија.

Last Person in Queue Pays Respects at Queen's Lying-in-State

На погребот, меѓу другите, ќе присуствуваат и претседателите на САД и Франција, Џозеф Бајден и Емануел Макрон, претседателката на Европската комисија, Урсула фон дер Лаен и претседателот на Европскиот совет, Шарл Мишел.

Се очекува да присуствуваат турскиот претседател Реџеп Таип Ердоган, Бразилецот Жаир Болсонаро и саудискиот принц Мохамед бин Салман. Кинескиот претседател Си Џинпинг ќе биде претставен од високиот функционер Ванг Кисан.

Официјални лица од Русија, Белорусија, Северна Кореја и Мјанмар не беа поканети на погребот.

Се очекува да дојдат членовите на кралските семејства од Шпанија, Монако, Норвешка, Холандија, Данска, како и јапонскиот цар Нарухито, кој ќе го направи своето прво патување во странство по доаѓањето на тронот во 2019 година.