Патниот правец Крушево – село Долно Дивјаци – село Кочиша е небезбеден за сообраќај и претставува опасност за нормално одвивање на сообраќајот и поради тоа денеска од 15:00 часот до негово санирање ќе биде затворен за секаков вид на сообраќај, информира АМСМ.

Граѓаните од овие населени места ќе го користат регионалниот пат село Пуста Река – Крушево.

На патниот правец Валандово – Струмица, кај Костурино поради одрони сообраќајот е одвива отежнато и забавено.

Сообраќајот на државните патишта се одвивa непречено, по претежно влажни коловози. Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево. 

Времето денеска ќе биде променливо облачно со повремени врнежи од дожд, а утре ќе има услови за локална нестабилност со пороен дожд, грмежи и со засилен ветер.

Времето денеска ќе биде променливо облачно со повремени врнежи од дожд, најавува Управата за хидрометеоролошки работи.

Во Источна Македонија дождовите ќе бидат пообилни и се очекува да наврнат над 15 литри на квадратен метар. Ќе дува слаб до умерен ветер од северен правец.

Најстудено ќе биде во Маврово, со утринска температура од 1 степен, а најтопло во Гевгелија, со дневна температура до 17 степени Целзиусови.

Во Скопје времето ќе биде променливо облачно со повремени врнежи од дожд. Ќе дува слаб до умерен ветер од северен правец. Утринската температура ќе се симне до 9, а дневната ќе се искачи до 16 степени.

Утре, сабота, времето ќе биде променливо облачно со сончеви периоди и со услови за локална појава на нестабилност со пороен дожд, грмежи и со засилен ветер.

Во недела ќе има брз продор на студена воздушна маса од север и врнежи од дожд, а на планините и на повисоките места од снег. Ќе дува засилен северен ветер, а температурите значително ќе опаднат. Врнежи од снег се очекуваат и во некои од пониските места.

Во понеделник наместа ќе има провејување на слаб снег, а утринските температури на повеќе места ќе бидат негативни. Потоа следува период на стабилно и постудено време, со утрински температури кои насекаде ќе бидат по нула.

Во Скопје во сабота ќе има преодно стабилизирање на времето, а во недела ќе биде претежно облачно, ветровито и студено со повремени врнежи од дожд. Во вечерните часови во повисоките делови од котлината ќе има услови за повремен слаб снег.

Директорот на Бирото за јавна безбедност, Александар Јанев, изрази цврста посветеност на чесното, професионално и со висок интегритет извршување на полициската должност по информациите за непрофесионално однесување на одредени полициски службеници, по трагедијата во Кочани.

Во соопштението, Јанев нагласи дека секој полициски службеник, без исклучок, мора да ги почитува законите и да работи за она за што е платен – со парите на граѓаните. Тој истакна дека се проверуваат сите околности за постапувањето на полицијата во ситуациите кои јавноста ги оцени како непрофесионални.

„Полицијата е тука да ги спроведува законите фер и без исклучоци, да ги брани правата на сите, без разлика на потекло или припадност. Никој, без разлика на неговата позиција, не е над законот!“ изјави Јанев, додавајќи дека секое однесување што ја нарушува довербата на граѓаните ќе биде откриено и санкционирано.

Директорот апелираше до сите чесни и совесни граѓани да се приклучат во откривањето на несовесното или непрофесионално работење на полицијата, со цел изградба на полицијата како вистински сервис за народот, а не како сила која владее со него.