Унгарија денеска официјално ја одби можноста Европската унија да издаде еврообврзници за финансиска поддршка на Украина, што според „Политико“ го поништи потенцијалниот план Б на Унијата доколку не се постигне договор за употреба на замрзнатите руски државни средства за заем од 165 милијарди евра.

Европската комисија бара земјите-членки на Самитот овој месец да одобрат модел на поддршка базиран на руските резерви на централната банка, но Белгија е најголемиот противник на овој пристап бидејќи го држи поголемиот дел од средствата и стравува од правни последици доколку Москва покрене тужба.

Еврообврзниците се разгледуваа како алтернатива, но Будимпешта ја отфрли идејата за заедничко задолжување врз основа на седумгодишниот буџет на ЕУ, соопштиле двајца дипломати за „Политико“.

Одлуката следеше само неколку часа пред вечерата во Брисел меѓу германскиот канцелар Фридрих Мерц и белгискиот премиер Барт де Вевер, на која требаше да се разговара токму за финансискиот пакет. Мерц изјави дека сака да ги увери белгиските власти дека предложениот модел е исправен, нудејќи германска гаранција за 25 отсто од средствата. Но Де Вевер бара поширока гаранција од сите земји-членки, која би ја покрила целата потенцијална штета – или повеќе.

Комисијата ги предложи еврообврзниците како една од двете опции за избегнување на можниот финансиски пресушен период за Украина уште од април следната година, но задолжувањето преку европскиот буџет бара едногласие, кое со унгарското вето станува невозможно.

Брз напредок не се очекува ниту поради силната белгиска опозиција кон „репарацискиот заем“, иако Комисијата тврди дека правните и финансиските ризици се минимизирани.

Според предлогот, 115 милијарди евра би се насочиле кон украинската одбранбена индустрија во наредните пет години, а дополнителни 50 милијарди евра за буџетските потреби на Киев.

Потпретседателот на Советот за безбедност на Русија, Дмитриј Медведев, предупреди дека користењето на руските замрзнати средства од страна на ЕУ би било „casus belli“, односно причина за војна.

Во најновата Национална безбедносна стратегија на Соединетите Американски Држави, администрацијата на претседателот Доналд Трамп изнесува остри критики кон Европската Унија, миграциските политики и политичките процеси на континентот, предупредувајќи на можни длабоки културни и општествени промени во наредните 20 години.

Документот од 33 страници наведува дека економските тешкотии со кои се соочува Европа се „засенети од далеку посериозната можност за цивилизациски пад“. Во него се посочува дека ЕУ и други транснационални институции, преку ограничување на политичките слободи и суверенитетот, креираат услови за продлабочување на кризите.

Како главни проблеми се издвојуваат миграциските политики што „го трансформираат континентот“, падот на наталитетот, загрозувањето на националните идентитети и, како што се наведува, зголемениот притисок врз слободата на говор и политичката опозиција.

Според медиумот „Политико“, ваквата реторика е блиска до ставовите на неколку европски крајнодесничарски партии, со кои администрацијата на Трамп воспоставила сѐ поголема идеолошка синхронизација. Во стратегијата директно се охрабрува „растечкото влијание на патриотските европски партии“, кое се опишува како „извор на оптимизам“.

Во документот се повторуваат и тези поврзани со т.н. теорија за „Голема замена“, предупредувајќи дека дел од европските земји „би можеле да станат претежно неевропски“ во следните децении.

И покрај предупредувањата, стратегијата истакнува дека Европа останува „културно и стратешки важна“ за САД. Претседателот Трамп во воведната белешка документот го опишува како „мапа на патот“ за зацврстување на американската глобална позиција.

Новата стратегија, како една од ретките формални надворешнополитички презентации на администрацијата, може да влијае врз распределбата на буџетите и дефинирањето на приоритетите во американските државни институции во следниот период.

Извор: Локално.мк

Синоќа вистинска драмa се одвиваше над поморската база Île Longue, едно од најчуваните стратешки упоришта на француската нуклеарна одбрана, кога пет дронови го нарушија воздушниот простор и ги активираа алармите за вонредна опасност. Морнаричките единици веднаш отворија оган во обид да ги пресретнат леталата, јавува Le Parisien, а целиот инцидент моментално е под истрага.

Дроновите биле забележани околу 19:30 часот, кога бил активиран специјалниот систем за борба против беспилотни летала. Портпаролот на поморскиот префект на Атлантикот, капетанот Гијом Ле Расл, соопшти дека станува збор за мали, ненаоружани модели кои „не биле во воен контекст“, но потврди дека прелетот претставува сериозно кршење на безбедносниот протокол. Тој додаде дека најверојатно целта била „вознемирување на локалното население“, а не напад врз чувствителната инфраструктура.

Инцидентот се случил во ноќ на супермесечина, кога видливоста била исклучително висока – што дополнително го олеснило откривањето на беспилотните летала.

Базата Île Longue е центар на француската нуклеарна моќ и дом на четири балистички нуклеарни подморници (SNLE), од кои барем една е постојано на море, подготвена за одвратен удар. Комплексот го чуваат околу 120 поморски жандари и специјализирани морнарички стрелци.

Иако вакви упади се строго забранети и ретки, воените служби признаваат дека ова не е прв случај. Пред неколку недели, дрон бил забележан над полуостровот Крозон, но тогаш не навлегол во забранетата зона.

Министерката за вооружени сили, Кетрин Вотрен, потврди дека случајот е предаден на военото обвинителство во Рен. Се води истрага со цел да се идентификуваат лицата кои стојат зад овој смел и потенцијално опасен упад во најчуваната воена зона во Франција.

Јавноста со нетрпение ги очекува резултатите од истрагата – и одговорот на прашањето: кој и зошто испрати дронови над нуклеарно „светилиште“?