Во меѓувреме, додека Дмитриј Песков најавува топли односи помеѓу Вашингтон и Москва, руските сили ги заострија веќе засилените борбени активности во источна Украина.

Главниот портпарол на Кремљ, Дмитриј Песков изјави во телевизиско интервју дека неодамнешните телефонски разговори помеѓу рускиот претседател Владимир Путин и американскиот претседател Доналд Трамп, значат дека Москва и Вашингтон отсега ќе разговараат за мир, а не војна.

“Тие испратија силна порака дека отсега ќе се обидуваме да ги решаваме проблемите со дијалог. И отсега ќе зборуваме за мир, а не војна.

Според Песков, ставовите на Трамп треба да се прифатливи за секоја личност со здрав разум. Изјави и дека целосно недостасувала комуникација со претходната американска администрација.

Путин и Трамп во претходен телефонски повик разговараа за запирање на непријателството во Украина, билатералните односи и некои други теми. Претседателите се согласија да останат во контакт и договорија состанок лице во лице.

Во меѓувреме, Русија ги засили нападите во Украина

Руските сили ги заострија веќе засилените борбени активности во источна Украина, а главните напади биле фокусирани во близина на важенниот логистички јазол Покровск, соопшти украинската војска.

Руските трупи веќе со недели напредуваат кон Покровск во склоп на целосен продор низ регионот Доњецк во источна Украина, зазимајќи низа села.

Речиси третина од сите борби биле концентрирани во близина на Покровск. Руските сили ги напаѓаат украинските позиции од сите страни во обид целосно да ги отсечат.

Специјалниот пратеник на американскиот претседател Доналд Трамп за Украина и Русија Кит Келог изјави дека мировниот план за Украина би можел да биде завршен за неколку дена или недели.

“Морате да ни дадете малку простор и време, но не мислам на шест месеци, туку неколку дена или недели”, изјавил тој во Минхен.

Келог изјавил дека моментално постои двоен пристап кон мировните преговори, со претставници на САД кој се во врска со Русија, и претставници на САД со Украина и сојузните нации, пренесуваат странските медиуми.

Келог напомена дека работи во името на други групи и додаде, спротивно на претходните сугестии на САД, да Украина и Европа мора да бидат дел од тие преговори.

Специјалниот пратеник додаде дека САД се уште не се подготвени да ги изнесат барањата за обезбедување на безбедносните гаранции на Украина во рамките на преговорите.

“Морате да ги поведете сојузниците со себе. Дали тие (Украина и Европа) ќе играат улога? Секако дека да. Не можете тоа да го направите без било кој”, изјави тој.

Келог потоа појаснил дека претставниците од ЕУ можеби физички нема да бидат на масата во текот на мировните преговори, но дека интересите на регионот ќе бидат земени во предвид.

“Сакаме да обезбедиме тоа да биде траен и одржлив мир”, заклучи Келог.

Европските политичари повеќе пати барале да бидат вклучени во преговорите за ситуацијата со Украина.

Германската министерка за надворешни работи Аналена Бербок во четвртокот изјави дека мирното решение на конфликтот мора да ги вклучи и претставниците од Европа.

Кандидатот за канцелар од опозиционата партија Фридрих Мерц, преговорите денес ги нарече неприфатливи доколку се случат без присуство на претставници од ЕУ и Киев.

Италијанскиот министер за надворешни работи и заменик премиерот Антонио Тајани исто така изјави дека Европа не треба да игра споредна улога во моќните преговори.

Претседателите на Русија и САД, Владимир Путин и Доналд Трамп во средата одржаа телефонски разговор кој траеше речиси час и половина.

Според зборовите на прес-секретарот на рускиот претседател Дмитриј Песков, лидерите разговарале за прашања кои се однесуваат на размена на државјани на двете земји, како и решавањето на ситуацијата во Украина. Тој истакна дека Вашингтон е главнната конекција со Москва, кога е во прашање прекинувањето на конфликтот.

Истовремено, после разговорот помеѓу Путин и Трамп, ниту Кремљ, ниту Белата Куќа не спомнаа било каква улога на Европа или Украина во идните преговори.

Лидерите се сложија да го продолжат личниот контакт, вклучувајќи и организирање на личен состанок.

Според зборовите на Песков, Ријад е спомнат како можна локација за состанокот помеѓу Путин и Трамп во текот на нивниот телефонски повик.

Украинскиот претседател Володомир Зеленски изјави во саботата дека билатералниот договор за клучни минерали за што било разговарано со САД, сѐ уште не е подготвен и дека не содржи одредби со коишто Киев сака да ги заштити своите интереси.

Договорот за кој Зеленски почна отворено да зборува по доаѓањето на власт во Вашингтон на Доналд Трамп, се смета за клучен за настојувањето на Киев да ја придобие поддршката на републиканецот додека американскиот претседател бара брзо завршување на војната во Украина. Притоа Киев бара безбедносни гаранции за да се заштити од нова инвазија доколку биде постигнат мир.

„Сѐ уште не е подготвен да ги заштити нашите интереси“, изјави Зеленски на прес-конференцијата на маргините од годишната безбедносна конференција во Минхен која ги собира политичките и воени челници од светот.

Зеленски ги изнесе контурите на евентуалниот таков договор во интервју за Reuters минатата седмица, распостилајќи мапа којашто прикажува бројни наоѓалишта на минерали, велејќи дека нуди „заемно полезно партнерство за нивен заеднички развој а не нивно подарување“.

Минералите за кои станува збор би вклучувале ретки минерали и метали како титан, ураниум и литиум. Меѓутоа, експертите порачуваат дека таквите најголемите украински наоѓалишта се во регионот Донбас кој од 2014 година го контролираат проруските бунтовници, како и близу линијата на фронтот.

На пример, кон средината на јануари наоѓалиштето на литиум во областа на селото Шевченковско на границата на одметнатата доминантно руска област Доњецк, со кое Киев се обиде да тргува со западот уште многу пред руската инвазија, беше заземено од руската војска. Резервите на литиум во Шевченковско, едно од најголемите во Европа, е откриено во 1982 година. Резервите на литиум се проценети на 13,8 милиони тони. Покај тоа, се смета дека таму има и резерви од други вредни ретки ресурси како ниобиум, берилиум, тантал…

На почетокот од февруари, Трамп кој не се согласи за продолжување на воената помош за Украина, изјави за новинарите во Белата куќа дека сака 500 милијарди долари во ретки земни минерали од Украина за да се обезбеди огромната поддршка од САД.

Трамп тогаш рече дека Украина е подготвена за тоа, додавајќи дека сака „изедначување“ од Украина за помошта на Вашингтон од „речиси 300 милијарди долари“.

„Ние ѝ кажуваме на Украина дека имаат многу вредни ретки земји. Сакаме да склучиме договор со Украина каде што тие ќе го обезбедат она што ќе им го дадеме за нивните ретки земни метали и други ресурси“, рече Трамп.

Ретките земји се група од 17 метали кои се користат, меѓу другото, за правење магнети кои ја претвораат енергијата во движење за електрични возила, мобилни телефони и друга електроника. Во моментов нема познати замени за нив.

Геолошкиот институт на САД смета дека 50 минерали се критични за економијата и националната безбедност на земјата, вклучувајќи неколку видови ретки земји, никел и литиум.

Украина има големи наоѓалишта на ураниум, литиум и титаниум, иако ниту едно од нив не е меѓу петте најголеми во светот по количество а некои од нив прејдоа и под контрола на руската војска, а САД имаат свои неискористени резерви на овие и други клучни минерали.

САД имаат само еден оперативен рудник за ретки земја и многу ограничен капацитет за обработка, иако неколку компании работат на развој на проекти во земјата. Кина е најголемиот светски производител на ретки земји и многу други клучни минерали.