Израелскиот премиер Бенјамин Нетанјаху, по неколку дена без коментар, упати кратко сочувство по повод смртта на папата Франциск.

„Државата Израел изразува најдлабоко сочувство на Католичката црква и католичката заедница низ целиот свет по повод смртта на папата Франциск. Нека почива во мир“, напиша Нетанјаху на платформата X, јавува Times of Israel.

Претседателот на Израел, Исак Херцог, изрази сочувство на социјалните мрежи неколку часа по смртта на папата, која се случи во понеделник. Меѓутоа, Министерството за надворешни работи на Израел кратко објави, а потоа ја избриша својата објава без објаснување.

„Почивај во мир, папа Франциск. Нека биде благословено неговото сеќавање“, стоеше во пораката што беше објавена.

Трамп ја објасни својата изјава за завршување на војната во Украина

Американскиот претседател Доналд Трамп го објасни своето често повторувано тврдење од предизборната кампања, според кое тој би можел да ја заврши војната во Украина веќе првиот ден по неговото враќање во Овалната соба. Трамп изјави дека оваа изјава всушност била изречена фигуративно и како претерување, во обид да ја нагласи својата позиција.

Во интервју за угледното списание „Тајм“, Трамп рече: „Го кажав тоа фигуративно, како претерување… за да истакнам нешто. Очигледно луѓето знаат дека тоа беше шега, но исто така беше и сигнал дека војната може да се заврши.“

Оваа изјава следува по неодамнешните предупредувања од Белата куќа дека Трамп е „фрустриран“ со текот на преговорите за завршување на конфликтот и дека неговото „трпение многу брзо истекува“.

Во текот на последните неколку дена, Трамп упати апели до украинскиот претседател Володимир Зеленски и рускиот лидер Владимир Путин, барајќи од нив да ја прекинат војната. Тој исто така предупреди дека може да се повлече од медијацијата ако некоја од страните „го отежнува постигнувањето договор“.

Светот се простува со папата Франциск

Рим – Папата Франциск ќе биде погребан денес во базиликата Санта Марија Маџоре во Рим, една од петте големи папски базилики, каде ќе биде пренесено неговото тело од базиликата Свети Петар. Ова ќе биде последно збогување со поглаварот на Римокатоличката црква.

Поворката, составена од верници, свештени лица, како и шефови на држави, ќе се собере денес во 10 часот на Плоштадот Свети Петар. Таму ќе се одржи и миса за покој на душата на папата Франциск.

Од Ватикан информираат дека во првите редови ќе бидат поставени високи претставници од Аргентина, татковината на папата, и од Италија, додека останатите светски лидери ќе бидат распоредени според францускиот азбучен ред.

Надгробна плоча со едноставна порака: „Franciscus“

На социјалните мрежи беше објавена фотографија од внатрешноста на базиликата Санта Марија Маџоре, каде што веќе е подготвен гробот на папата.

Надгробниот споменик е изработен од бел мермер од Лигурија – родниот крај на неговите баба и дедо. На плочата стои испишано само едно име: „Franciscus“ – во духот на неговата скромност и посветеност на верата.

Гробот е сместен во близина на олтарот на свети Франциско Асишки, чиј пат го следеше и самиот папа.

Приватна церемонија и молитва во чест на папата

Погребот на папата ќе биде приватен обред, без присуство на пошироката јавност. Вчера, во 20 часот, ковчегот беше запечатен за време на литургиски обред во базиликата Свети Петар. Со тоа официјално ќе заврши јавната изложба на неговото тело.

Вчера, во 21 часот, литванскиот кардинал Роландас Макрицкас ја предводеше и традиционалната молитва за време на болка, жалост и смрт пред базиликата каде ќе почива папата.

Девет дена молитви и нова конклава

По погребот, ќе следуваат девет дена жалост, за време на кои ќе се одржуваат мисии и молитви во негова чест. По завршувањето на тој период, Ватикан ќе свика конклава на која ќе биде избран нов поглавар на Римокатоличката црква.