Турскиот претседател Реџеп Таип Ердоган поднесе кривична пријава против германскиот политичар Волфганг Кубицки, кој го нарече „канализациски стаорец“.

Адвокатот Мустафа Каплан изјави за ДПА дека поднел кривична пријава во име на Ердоган до државното обвинителство во Хилдесхајм за навреда и клевета.

Кубицки, политичар од Слободните демократи, го нарече Ердоган „мал канализациски стаорец“ додека ја коментирал имиграциската политика на турскиот лидер.

На прашање на ДПА, заменик-претседателот на партијата рече дека не е загрижен за можниот правен спор со Ердоган.

Според извештајот на магазинот Шпигел, во писмото на Каплан до јавното обвинителство се тврди дека изјавата на Кубицки е „омаловажување на засегнатото лице“ и „незаконски напад на честа на друго лице“.

Анкара веќе го повика германскиот амбасадор поради изјавата на Кубицки.

„Фактот што Ердоган имаше околу 200.000 вакви постапки покренати од почетокот на неговиот мандат во 2014 година, всушност кажува сѐ“, изјави денеска Кубицки.

Тој понатаму истакна дека стаорците од канализација се слатки, но и „паметни и лукави“. „Во секој случај, мирно го чекам можниот правен спор“, додаде Кубицки.