Македонија

Колку ќе заштедите доколку оваа зима се греете на инвертер клима уред?

Начинот на греење и затоплување на домот станува најважното прашање оваа зима. Како да се загрее домот и што да се користи како извор на топлина. Во овој период дилемата е меѓу греење со електрична енергија или со цврсти извори, меѓу инвертер клими и ТА печки или меѓу пелети и дрва.

Пресметките се движат од потрошена електрична енергија, киловат часови наспроти добиена топлинска енергија, вложените финансии во набавка на дрва и пелети наспроти она што се добива како топлина во домот.

Пелетите, во пресрет на зимата станаа многу барани, дури и побарани од огревното дрво, пред сè поради некогашната пристапна цена, што не е веќе иста. Ланската цена на пелетите во летната сезона беше околу 150 евра по тон, сега се движи од 350 до 400 евра. Ако се занемари поскапувањето, прашање е и дали ќе ги има доволно на пазарот, затоа што има недостаток на суровина што ќе го намали обемот на производство. Дополнително, токму поради помалиот обем на производство, можен е слободен раст на цената на пелетите. Поради сето ова, експертите не можат да проценат до каде ќе расте цената на ова цврсто гориво за огрев, а со сигурност ќе расте. Така ако за една шестмесечна грејна сезона се потребни околу 10 тони, доаѓаме до бројката дека за овие домаќинства се неопходни околу 4.000 евра да ја поминат зимата во топол дом.

Скоро иста е состојбата и со огревното дрво, цената расте а и побарувачката, што дополнително ја зголемува цената. Изминатиов месец цените поскапеа за околу 50 отсто, така што ако регуларната цена на огревното дрво се движи до 3.000 денари, неофицијално порасна на 4.500 денари за кубен метар. Просечно македонско семејство годишно користи до 10 кубни метри огревно дрво. Така, за греење оваа сезона едно домаќинство, и тоа најчесто за греење на само една просторија во домот, ќе бидат потребно од 30.000 до 45.000 денари. Но дополнително огревното дрво треба предвреме да се нарача, најчесто на крајот на изминатата грејна сезона за да биде испорачано во тековната грејна сезона. На тоа треба да се додадат пари за транспорт, сечење и за цепење и складирање на дрвата.

Сепак, според сето ова греењето на електрична енергија може да биде и најпрактично оваа зима, само доколку се изберат вистински грејни тела. Постојат уреди кои може да ви помогнат да заштедите, а чија потрошувачка на енергија е многу занемарлива. А исто така, постојат уреди кои се најголеми потрошувачи на струја во домаќинството, грејните тела како ТА печки, калорифери и разни греачи.

Додека пак, греењето со инвертер клима е најевтин начин за греење оваа сезона. Пред сè затоа што инвертер клима-уредот овозможува целосно удобно и евтино греење и во однос на потрошувачката и во однос на едноставност и леснотија на користење. Односот на потрошената електрична енергија и добиената топлинска енергија од инвертер клима уредот варира во зависност од квалитетот на уредот.

Потрошувачката на енергија се движи од 0,800kW до 1kW на час континуирано работење на уредот, а за таа количина на потрошена моќност се добива топлинска енергија од 4kW до 6,3kW. ТА (термоакумулациона печка) од 3kW троши електрична енергија за да дистрибуира 3kW топлинска енергија, и тоа препорачливо е да се загрева ноќе на евтина тарифа, во спротивно потрошувачката расте. Електричен котел од 6kW троши 6kW за добиените 6kW топлинска енергија. Со еден збор, сите грејни уреди освен инвертер клима, кои користат електрична енергија како извор на топлинска енергија, произведуваат само 1kW топлинска енергија за 1kW потрошена електрична енергија.

Предводник во технологијата за инвертер клими е Gree, затоа што користи современа технологија и метод што создаваат многу предности од нивното користење. Работат и на ниски температури што е основна карактеристика за овие клими, а посебно потребно за наши услови.

Gree климите се водечки бренд во глобалната индустрија за климатизација, пример за енергетски штедливи и за клима уреди со висока енергетска ефикасност. Ова посебно може да биде од корист за намалување на трошоците за електрична енергија, во периодот кога се најавени поскапувања на струјата.

Македонија

Се што треба да знаете за „Safe City“

Казнувањето на сообраќајните прекршоци преку системот „Безбеден град“ официјално ќе започне на 1 февруари, наместо на првично најавениот датум 1 јануари. Одложувањето е потврдено за ТВ21 од помошник-заменик министерот во МВР, Мухамет Исмаили, кој објасни дека причина за пролонгирањето е потребата од дополнителни технички проверки и усогласување на правните процедури.

„Од 01.02.2026 системот SafeCity целосно ќе биде ставен во функција во Скопје, Куманово и Тетово, како и на Коридорите 10 и 8, додека во другите градови се предвидува да започне во текот на 2026 година“, изјави Исмаили.

Од Министерството за внатрешни работи најавуваат и можност за одредена толеранција кај ограничувањата на брзината. „Треба да ги почитуваме ограничувањата – 50 км/ч за урбани подрачја значи 50 км/ч. Секако дека и ние ќе внимаваме, исто како што прават и сите европски градови каде што имаат свои параметри за толеранција – таква толеранција ќе има и кај нас“, изјави Сашо Топаловски, началник на СВР Скопје.

Системот „Безбеден град“ ќе работи со фиксни камери кои ќе регистрираат пречекорување на брзината, поминување на црвено светло, нерегистрирани возила и други прекршоци. Дополнително, специјализирани полициски возила ќе идентификуваат неправилно паркирање и останати нарушувања на сообраќајните правила.

Целта на новиот систем е до 2030 година да се преполови бројот на сообраќајни несреќи во државата.

Македонија

Витаминка со Стоби Флипс и купувачите донираат 1.000.000 денари за СОС Детско село

Кампањата „Заедно за топол дом, љубов и грижа за секое дете“ што Витаминка ја реализираше преку Стоби Флипс, успешно заврши и резултираше со донација од 1.000.000 денари за СОС Детско село. Средствата ќе бидат искористени за Советувалиште за психолошка поддршка и специјална едукација со рехабилитација на СОС Детско село. Благодарение на поддршката од граѓаните за акцијата со која од секој купен Стоби Флипс се издвојуваше дел, со собраните средства ќе се овозможи континуирана експертска едукација за шеесет деца и млади на возраст од 6 до 18 години кои растат без родителска грижа и се соочуваат со последици од трауматски искуства, емоционални и развојни предизвици, како и различни когнитивни потешкотии.

Средствата ќе бидат насочени кон проектот „Менталното здравје пред сè“, преку кој децата ќе добијат индивидуални сесии со психолози и специјални едукатори, како и терапевтски третмани во сензорна соба за оние кои имаат потреба од дополнителна поддршка во емоционалниот и когнитивниот развој. Овие услуги се од суштинско значење за нивното зајакнување, подобро справување со кризи и градење основа за здрав личен раст.

Од СОС Детско село Македонија истакнуваат дека поддршката е од огромно значење за континуитетот на нивната мисија. „Од срце им благодариме на Витаминка и на сите граѓани кои ја поддржаа кампањата. Витаминка уште еднаш покажа што значи вистинска општествена одговорност и посветеност кон децата. Благодарение на ова партнерство, можеме непречено да продолжиме да обезбедуваме стручна грижа и поддршка за секое дете, со верба во нивната подобра иднина,“ велат од организацијата.

За што поуспешно спроведување на кампањата за Стоби Флипс беше изработена и специјална амбалажа со што купувачите беа информирани за своето учество во донацијата и придонесе за подигнување на јавната свест и обезбедување поголема поддршка за децата без родителска грижа.

Од Витаминка додаваат дека се горди што кампањата успеала да ја мобилизира јавноста и да создаде реална промена. „Нашата цел беше да потсетиме дека секој мал гест на солидарност може да донесе голема разлика. Благодарни сме што потрошувачите ја препознаа важноста на оваа приказна и ни помогнаа заедно да донесеме надеж, грижа и поддршка таму каде што е најпотребно“, истакна Симона Симоновска, одговорна за маркетинг во Витаминка.

Со оваа кампања, Витаминка и Стоби Флипс уште еднаш ја потврдуваат својата посветеност кон најмладите и даваат силен пример за тоа како компаниите, заедно со граѓаните, можат да создадат поподобно, похумано и посреќно општество за секое дете.

Македонија

Рекордна година за Скопје – аеродромот со 3 милиони патници, растот продолжува до 3,2 милиони

Меѓународниот аеродром Скопје денес го дочека својот тримилионити патник во една календарска година. Среќничката, Милена Таскова, беше изненадена на нејзиниот лет Скопје – Бари.

Раководството на аеродромскиот оператор ТАВ Македонија, заедно со вицепремиерот и министер за транспорт, Александар Николоски, приредија емотивно изненадување за госпоѓа Таскова.

Милена Таскова беше облеана во подароци: бесплатни аеродромски услуги од сестринските компании на ТАВ и два бесплатни авионски билета од авиокомпанијата Виз Ер (Wizz Air).

Неџат Курт, генералниот директор на ТАВ Македонија, не ја криеше својата возбуда:

„Го достигнавме тримилионитиот патник во една година! Првпат лета за Бари, и посакав среќа на неа и нејзиното семејство.“

Курт најави дека ова е само почеток. Според оптимистичките прогнози на ТАВ, Скопскиот аеродром до крајот на годината ќе заврши со 3,2 милиони патници, додека аеродромот во Охрид се очекува да достигне 262.000 патници.

Овој успех не само што го потврдува растот на авиосообраќајот во земјата, туку и ја зацврстува позицијата на Скопје како значаен регионален воздушен центар.