Дел од втората локомотива на товарен воз што сообраќал од Гевгелија за Солун, синоќа делумно излетал од шините во близина на градот Поликастро во северна Грција, а според генералниот секретар на синдикатот на вработени во Организацијата на грчките железници (ОСЕ) поради нанесената штета на шините за околу два месеци ќе биде затворена рутата Скопје-Солун, јави дописничката на МИА од Атина.

Од грчката компанија „Hellenic train“ денеска кусо соопштија дека вчера во 21:25 часот во близина на Поликастро дошло до „делумно излетување од шините на задната оска на втората локомотива на товарниот воз 45201, кој сообраќаше на релација Гевгелија – Солун“ и додадоа дека не постоела никаква опасност за безбедноста на персоналот, а компанијата соработува со надлежните органи за да се истражат причините за излетувањето од шините.

Од друга страна, генерален секретар на Синдикатот на вработени во ОСЕ Никос Цикалакис за информативниот портал „Карфица“, објаснил дека екипи се на терен за да се процени ситуацијата и можно е да се затвори станицата кај Идомени за да се санира предизвиканата штета.

– Според првичните информации, штетата е над четири километри, па европската рута на земјава од Скопје ќе биде затворена два месеци – рекол Цикалакис и додал дека ќе постои само линијата од Бугарија и само оваа ќе се користи за меѓународен сообраќај.

Информацијата дека поради штетата на шините, меѓународната линија преку Скопје, се очекува да остане затворена околу два месеци ја пренесе и државната телевизија ЕРТ повикувајќи се на извори од ОСЕ. 

Сопругата на веќе уапсениот градоначалник на Тирана Ерион Велиај, Ајола Ѕоѕа за 4 години на фустани и накит потрошила неверојатни 860 илјади евра, пишуваат албанските медиуми.

Имено, во обвинението на Специјалното обвинителство против организиран криминал и корупција, (СПАК) стои дека сопругата на Велиај преку онлајн купувања на накит и фустани за само 4 години потрошила непријавени 860 илијади лекој или неверојатни 860 илјади евра.

На барање на Специјалното обвинителство против организиран криминал и корупција, (СПАК) на градоначалникот на Тирана, Ерион Велиај му е изречена безбедносна мерка затворски притвор, додека на неговата сопруга Ајола Ѕоѕа куќен притвор.

Специјалниот суд определи мерка редовно јавување во судот за пет бизнисмени кои добивале сомнителни тендери од Општина Тирана. Истрага е почната и против пратеничката К.Б. дела кои го спречуваат дознавањето на вистината, се наведува во соопштението на СПАК.

Со одлука на судот на сите лица опфатени во ова досие привремено им е конфискуван недвижен имот, вили, станови, а на сопругата на Велиај, Ѕоѕа и граѓанска организација преку која и биле префрлувани пари, блокирани се средства од околу 900.000 евра во две банки.

СПАК против Велиај водеше истраги поврзани со повеќе обвиненија, како злоупотреба на службената положба, активна корупција, пасивна корупција, непријавување имот и перење пари.

На 6 декември, по налог на Специјалниот суд беше извршен претрес во домот на Велиај, во неговите службени канцеларии, како и работните простории на неговата сопруга, на која и беше земен и мобилниот телефон.

Велиај на распит во СПАК беше неколкупати, а денеска во 13.30 по локално време во Специјалниот суд треба да се оддржи и првата седница.

Градоначалникот на Тирана, Ерион Велиај, реагираше по неговото апсење и мерките за безбедност против неговата сопруга Ајола Џоџа, кој во објава на социјалните мрежи, го изрази своето незадоволство од тековниот процес, нарекувајќи го нефер и апсурден.

-Не ме чуди овој апсурден крај на ова долго поглавје на одолговлекување, и во устите на медиумските манипуланти и во рацете на лудачкиот обвинител, што е жива навреда за човечката интелигенција. Но, ова беше само првото поглавје. Сега веќе не морам да молчам за она што моите очи го видоа во однесувањето со моето семејство и моите уши го слушнаа под покривот на СПАК.

Ја почитував, како и сите други, нашата политичка линија, а не коментари за отворен процес на правдата, пишува тој

Велиај во својата реакција ги споменува перипетиите и жртвите што ги доживеал да молчи во текот на истрагите и покрај тешките обвинувања. Тој изрази жалење за помошта на некои претприемачи кои биле мета, како и за состојбата на неговата сопруга и детето, на кои не им било дозволено да имаат момент на нормалност. Нагласува дека тоа е „навреда за човечката интелигенција и клевета против него и неговото семејство“ додавајќи дека „Јас и моето семејство немаме никаква врска со зборот корупција“.

-Жал ми е за Ајола, на која не ѝ дозволија ниту да го однесе синот, ниту да го врати од училиште, но и тоа не ме чуди. Жал ми е за мајка ми, чие срце беше скршено во секоја битка што ја водев овие 20 години. Жал ми е за сите соработници, колеги и вработени во општина Тирана и сакам да знаат дека немам врска со идиотизмот напишан на хартија и за жал парафиран од Алтин Думани(прв човек на СПАК). Жал ми е за сестрите и браќата од Социјалистичката партија и за претседателот, што после толку години заеднички изборни битки, ако не ме имаат покрај себе оваа кампања, како што изгледа веројатно, додека ме фрлаат во затвор без судење, 3 месеци пред изборите, обвинува Велиај.

Toj беше уапсен вчера под обвинение за пасивна и активна корупција, перење пари и непријавување имот, по што му беше изречена мерка „затворски притвор“. Неговата сопруга доби „куќен притвор“ додека петмина бизнисмени редовно јавување во судот.