Претседателот на Србија, Александар Вучиќ, ја посети групата повредени во пожарот што се случи во Кочани.

„За нас, трагедијата во Кочани е како да се случила тука. Верувам дека ќе успееме да им помогнеме на овие луѓе кои пристигнаа со сериозни повреди. На располагање им стоиме на нашите браќа и пријатели Македонци и сме подготвени да примиме повеќе пациенти, бидејќи имаме најсовремени опремени болници“, изјави Вучиќ.

„Нема да им биде лесно на македонскиот народ, но ние секогаш ќе бидеме со нив, како што тие беа со нас“, додаде тој.

Претседателот Вучиќ ја изрази својата подготвеност да помогне во оваа трагична ситуација и да им обезбеди поддршка на повредените.

Градот Чачак денеска истакна македонски знамиња на сите ЛЕД екрани и интерактивни тотеми со кои управува градот во знак на солидарност и сочувство во тага со граѓаните на Северна Македонија по трагедијата во градот Кочани, јави МИА.

Покрај српското знаме, македонското знаме ќе биде истакнато утре и на сите јавни установи во градот.

„Сметаме дека на овој начин најдобро можеме да покажеме колку ни е тешко и жалиме што се случи таква трагедија. Ова е уште една можност да го изразиме нашето длабоко сочувство во името на сите граѓани на градот Чачак во врска со трагедијата што ги погоди нашите пријатели од Северна Македонија“, рече Петковиќ во изјава за српски медиуми.

Тој додаде дека знамињата на Северна Македонија ќе останат на ЛЕД екраните и интерактивните тотеми до сабота.

Денеска, Македонците во општина Пустец им оддадоа почит на трагично загинатите во Кочани. Администрацијата на општина Пустец, наставниците и учениците од Гимназијата и политичката партија Македонска алијанса за европска интеграција (МАЕИ), во Пустец, со едноминутно молчење изразија жалост за жртвите.

На плоштадот “Гоце Делчев” во Пустец, нашите сограѓани запалија свеќи во знак на почит, а свештеникот отец Алекс Темелко се помоли за покој на душите на загинатите и здравје и брзо закрепнување на повредените.

Со искрена болка изразуваме сочувство до семејствата на загинатите. Бог да ги прости и да им подари вечен мир во Царството Небесно.

Македонците од Албанија се молат за душите на загинатите и за брзо закрепнување на повредените.

Во овие тешки моменти, нашите мисли и молитви се со Кочани.

Нека почиваат во мир!