Турција и Италија најавија нови заеднички проекти во одбранбената индустрија

Турција и Италија ќе продолжат да ја продлабочуваат соработката во областа на одбранбената индустрија преку нови проекти и партнерства, изјави турскиот претседател Реџеп Таип Ердоган по вчерашната средба со италијанската премиерка Џорџа Мелони во Рим.

„Ќе продолжиме да ја зајакнуваме нашата соработка во одбранбената индустрија, каде што веќе постигнавме значителен напредок. Планирани се нови заеднички проекти и партнерства“, изјави Ердоган на заедничката прес-конференција со Мелони, пренесува Ројтерс.

Двајцата лидери исто така поставиле нов економски таргет – цел од 40 милијарди долари годишна трговска размена меѓу Турција и Италија, што претставува амбициозен чекор напред во економската соработка меѓу двете земји.

Русија објави снимка од севернокорејски војници на обука – Западот изразува загриженост

Руското Министерство за одбрана за првпат објави видео-снимка на која се гледаат севернокорејски војници на обука во Русија, непосредно пред да бидат испратени на борбени мисии во Украина. Снимката, која трае 77 секунди, е пренесена од државните медиуми, а на неа се прикажани различни тактички вежби и користење на современо вооружување.

Севернокорејските војници на видеото се обучуваат за фронтална борба – вежбаат движење низ ровови, пукање од засолништа, користење на рачни гранати и чистење терен. Дел од нив користат јуришни пушки АК-12, петта генерација на модуларно руско оружје кое е во употреба од 2020 година, а некои примероци се опремени со рефлексни нишани. Забележани се и снајперисти со „Драгунов“ СВД пушки, митралези со тракасто полнење (тип ПК), како и војници што користат РПГ-7 гранати за уништување на тенкови.

Интерес предизвикува и употребата на полуавтоматски сачмарки Vepr-12, со продолжени цевки за подобра прецизност при гаѓање на дронови – тактика која веќе ја применуваат и украинските и руските сили.

Согласно украинската воена разузнавачка служба, целата опрема прикажана во видеото е дел од арсеналот што Русија наводно им го доставува на севернокорејските сили од ноември 2024 година.

Руското Министерство тврди дека прикажаните војници се дел од контингентот кој Северна Кореја го распоредила во регионот на Курск. Пјонгјанг, според тврдењата, испратил илјадници војници за да ги зајакне руските редови во борбите против украинската армија.

Меѓународни реакции: Западот и Сеул загрижени

Видеото следува по заедничкото јавно признание на Русија и Северна Кореја, изминатиот викенд, дека севернокорејски сили учествуваат во активни борбени дејства во Украина – потврда која доаѓа по месеци на молк и покрај се поголемиот број докази за вмешаноста на Пјонгјанг.

На Западот и во Јужна Кореја расте загриженоста дека севернокорејските сили стекнуваат значајно борбено искуство, и тоа во директна конфронтација со современо западно оружје и беспилотни летала. Украинските извештаи укажуваат дека првично, севернокорејските единици биле лошо подготвени, со значителни загуби во судирите со дронови и прецизно оружје.

Но, војниците брзо се адаптирале. Украинските сили заплениле цртеж од заробен севернокорејски војник, на кој бил прикажан план за намамување на дрон, користејќи човек како жив мамец.

На бојното поле, Севернокорејците покажуваат значителна упорност – често се испраќаат во фронтални човечки бранови, без соодветна оклопна поддршка. Украински војници сведочат дека е исклучително тешко да се зароби севернокорејски борец, бидејќи тие често се обидуваат да извршат самоубиство наместо да се предадат.

Портпаролот на американскиот Стејт департмент изјави оваа недела дека САД се длабоко загрижени поради активното присуство на Севернокорејци на украинскиот фронт. Според него, учеството на трети земји, како Северна Кореја, само го продолжува конфликтот и ја зголемува одговорноста за страдањето.

On a Russian propaganda channel, they showed how North Korean soldiers were being trained to fight against Ukraine. pic.twitter.com/xCBd6eGyS3

— WarTranslated (@wartranslated) April 28, 2025

Три лица беа убиени во вооружен напад што се случи вчера во фризерски салон во центарот на шведскиот град Упсала, соопшти полицијата. Напаѓачот побегнал на скутер и сè уште не е пронајден.

Инцидентот се случил во близина на плоштадот Ваксала, а полицијата постави кордон околу голем дел од градот и започна истрага за тројно убиство.

Според информациите на шведската национална телевизија SVT, една од жртвите била под истрага поради сомнение за планирање напад врз роднина на водач на банда.

Нападот се случи непосредно пред прославата на Валпургиската ноќ, традиционален пролетен фестивал што секоја година привлекува илјадници посетители во Упсала, познат универзитетски град.

Шведскиот министер за правда, Гунар Стромер, нападот го нарече „брутален акт на насилство“. Полицијата соопшти дека разбира зошто граѓаните се загрижени во пресрет на фестивалот, но дека засега индикациите се дека станува збор за изолиран инцидент и дека нема закана за јавноста.

Во февруари годинава, во сличен напад во едукативен центар во градот Ербру беа убиени десет лица.