Американскиот претседател Доналд Трамп денеска се закани дека ќе воведе царини од 200 отсто за вино, шампањ и други алкохолни пијалоци од Европската унија.

Трамп во објава на социјалните мрежи предупреди дека ќе воведе царини за европскиот алкохол доколку Европската унија не го укине данокот на американското виски, пишува Блумберг.

Властите во Брисел го оданочија американското виски како одмазда за царините на Трамп за челик и алуминиум кои стапија на сила вчера.

– Доколку оваа тарифа не биде веднаш отстранета, САД наскоро ќе воведат царина од 200 отсто за сите вина, шампањ и жестоки пијалоци кои доаѓаат од Франција и другите земји од Европската унија, напиша Трамп за европските давачки за вискито на „Truth Social“.

Тој додаде дека овој потег ќе биде „одличен“ за американските компании кои произведуваат вино и шампањ.

Здравствената состојба на претседателот на САД, Доналд Трамп (78), веќе некое време е тема во медиумите.

Она што најмногу привлекува внимание се модриците на неговите раце. Оваа тема првпат се појави кога францускиот претседател, Емануел Макрон, ја посетил Белата куќа. Сега, голема модрица на десната рака на Трамп повторно го привлече вниманието на јавноста.

Почнаа да се шират шпекулации дека модрицата може да биде последица на инфузионата терапија, но Белата куќа излезе со објаснување дека таа е резултат на навиката на Трамп постојано да се ракува со луѓето.

„Претседателот Трамп е човек од народот. Има модрици на раката затоа што постојано работи и се ракува со луѓето секој ден, цел ден“, изјавила портпаролката на Белата куќа, Керолајн Левит.

И самиот Трамп претходно тврдел дека неговите модрици се последица на ракувањето со илјадници луѓе.

„Тоа е од ракувањето“, рекол тој за списанието Тајм во декември минатата година.

Американскиот претседател денеска имаше состанок со ирскиот премиер Мајкл Мартин во Овалниот кабинет, а на десната рака повторно имаше модрица со чудна боја.

И покрај претходното ветување дека ќе објави медицински извештај за своето здравје, Трамп тоа сè уште не го направил, што дополнително поттикнува шпекулации за вистинската причина на модрицата.

Помошникот на рускиот претседател, Јуриј Ушаков, изјави дека на американскиот советник за национална безбедност, Мајк Волц, му го пренел ставот на Русија во однос на потребата од долгорочно решение на конфликтот во Украина. Според него, Русија не е заинтересирана за прекин на огнот како што го предложија Украина и САД. Ушаков зборуваше за ова во интервју за програмата „60 минути“ на каналот Русија-1.

„Јас, се разбира, ги коментирав договорените мерки за привремен прекин на огнот и го изразивме нашето гледиште дека тоа не е ништо повеќе од привремен одмор за украинската армија, ништо повеќе“, изјави Ушаков.

„Нашата цел е постигнување на трајно и мирно решение кое ќе ги земе предвид легитимните интереси на нашата страна. Нашите грижи се познати. Мислам дека никому не му се потребни такви чекори кои само ќе ја имитираат мировната динамика“, нагласи тој.

Неговата изјава доаѓа по пристигнувањето на американските преговарачи во Москва, кои разговарале за можни решенија на конфликтот.

Ушаков исто така рече дека „постои нормално разменување на мислења меѓу Русија и САД на мирен начин“ и дека Москва очекува Вашингтон да ја земе предвид нивната позиција во понатамошните преговори. Според него, Вашингтон е свесен дека „членството на Украина во НАТО не е опција“.

„Договоривме дека овие контакти ќе останат затворени за јавноста“, додаде Ушаков.

Според извори во руските медиуми, рускиот претседател Владимир Путин денеска се очекува да даде поконкретни и посуштински оценки за предлогот за привремен прекин на огнот.