Центарот за управување со кризи (ЦУК) информира дека последното деноноќие имало три пожари на отворен простор во Тетовско и Скопско, и сите биле изгаснати.

Изминатите 24 часа имало вкупно 2 153 повици на Единствениот повикувачки број за итни случаи 112, од коишто „реални“ повици биле 62,98 отсто, а 37,02 отсто биле за други потреби на граѓаните што не биле итни. Од реалните повици, кон Полиција биле упатени 60,31 отсто, кон Итната медицинска помош 31,83 отсто, а кон пожарникарите 3,73 отсто.

РЦУК Битола информира дека во атарот на село Брод, Битола, е пронајдена една стара опасна артилериска граната со калибар 75 mm од Првата светска војна. Гранатата била безбедно подигната од стручно лице од ДЗС Битола, вчера во 10:30 часот за понатамошна постапка за безбедно складирање и уништување.

ЦУК исоопшти дека од денеска ќе има привремена промена во сообраќајот на делот од државниот пат „А2“ – делница Желино – Тетово, помеѓу бензинската станица на „Макпетрол“ и северниот влез на Тетово. На овој дел од патот ќе се врши геодетско снимање, заради што една сообраќајна лента ќе биде затворена во неколку фази. Работите ќе траат до нивно завршување.

Под влијание на распространета плитка фронтална долина над југоисточна Европа и во нашата Република Македонија, и понатами кај нас ќе имаме честа појава на повремени врнежи од дожд, проследени со појава на грмежи.

На повеќе места ќе има поројни врнежи, проследени со електрични празнења и со засилен ветер. Ваквата временска состојба ќе се задржи се до самиот крај од оваа седмица, а гледано одсега и за првомајските празници ќе имаме врнежи и грмежи.

Во ваква ситуација локално Атмосферските процеси ќе бидат интензивни и во форма на невреме, проследено со обилен пороен дожд за кратко време кој може да услови локални поројни поплавувања, силен ветер, силни електрични пранзења и со појава на град.

И во Скопскиот регион ќе има повремени врнежи од дожд кои во делови од котлината ќе бидат поројни и проследени со појава на грмежи и со засилен ветер. Во делови од котлината ќе има услови и за појава на невреме.

Токму поради ваквата временска состојба, апелирам на крајна внимателност кај граѓаните.

Што се однесува до температурите, тие остануваат без промени се до викендот, кога ќе бележат тендеција на постепено опаѓање.

Метео Аларм

Управата за финансиска полиција до Основното јавно обвинителство Скопје поднесе кривична пријава против А.А поради основи на сомнение за сторено кривично дело Даночно затајување по член 279 став 2 од КЗ.

Пријавениот А.А во својство на управител и сопственик на “Друштво за производство, трговија и услуги АРМАН КОМПАНИ ДООЕЛ Скопје”, во периодот од 01.01.2020 година до 25.12.2024 година, свесно и со однапред утврдена намера со цел да се стекне со противправна имотна корист за себе и за правниот субјект, набавената трговска стока (јаткасти производи), евидентирана на залиха во вредност од 53.257.786 денари, неосновано ја присвоил и не ја евидентирал во сметководствената евиденција  како кусок, при што пријавениот не пресметал, не пријавил и не уплатил Данок на Додадена вредност по даночна стапка од 5 % во износ од 2.662.889 денари и Данок на Добивка по даночна стапка од 10 % во износ од 5.325.778 денари, а за застарените обврски кон добавувачи постари од три години во износ од 40.903.524 денари (краткорочни), а кои потекнуваат од 2020 година и не се прикажани како Приходи во Билансот на успех и Даночниот Биланс на правниот субјект за 2023 година, пријавениот  не пресметал, не пријавил и не уплатил Данок на добивка по даночна стапка од 10 % во износ од 4.090.352  денари. Со намера да ги прикрие инкриминираните активности пријавениот не изготвил и не поднел Завршни сметки за 2021 година, 2022 година и 2023 година, до Управата за јавни приходи и до Централниот регистар на Република Северна Македонија со што не пресметал, не пријавил и не уплатил даноци по разни основи во вкупен износ од 12.079.019денари, за кој износ го оштетил Буџетот на Република Северна Македонија.