Зеленски: „Ќе разговараме за територијални прашања – но само по целосен и безусловен прекин на огнот“

Украинскиот претседател Володимир Зеленски денеска во Киев изјави дека Украина е подготвена да разговара за територијални прашања, но дури по целосен и безусловен прекин на огнот.

„Целосен и безусловен прекин на огнот отвора можност да се зборува за сè“, истакна Зеленски пред новинарите, пренесува Би-би-си.

Зеленски се осврна и на изјавата на Доналд Трамп, кој во интервју за магазинот „Тајм“ рече дека „Крим ќе остане руски“. Украинскиот претседател реагираше на тоа со ставот дека Крим е и останува дел од Украина.

„Она што го кажа претседателот Трамп е точно – денес навистина немаме доволно оружје за да ја вратиме контролата врз Крим. Но, нашиот став не е променет – Крим припаѓа на Украина и само украинскиот народ има право да одлучува за тоа“, порача тој.

Зеленски потенцираше дека Уставот на Украина е јасен и недвосмислен кога станува збор за територијалниот интегритет на државата.

„Сите привремено окупирани територии се украински. Тоа го вели нашиот Устав, и тоа го чувствува секој граѓанин на Украина“, додаде тој.

Берлин: Не може да има мир без согласност од Украина

Германската влада останува цврсто на ставот дека суверенитетот на Украина мора да биде основа за какви било мировни преговори меѓу Русија и САД. Како што изјави во петокот заменик портпаролката на владата, Кристијане Хофман, клучно е „Украина самата да одлучи што е прифатливо за неа – не може да има мир без нејзина согласност“.

Оваа изјава доаѓа во контекст на сè поинтензивните разговори меѓу Вашингтон и Москва за можно прекинување на конфликтот, а Хофман се повика и на сличните пораки што претходно ги испрати украинскиот претседател Володимир Зеленски.

Москва, пак, како услов за мир бара Киев официјално да се откаже од полуостровот Крим и уште четири региони кои Русија ги смета за своја територија.

Зеленски категорично го отфрли ова барање, потсетувајќи дека Уставот на Украина не дозволува отстапување на ниту еден дел од државната територија.

Берлин, и покрај тоа што ги поддржува разговорите меѓу Русија и САД, предупредува дека мирот не смее да биде „наметнат“ на штета на Украина.

„За нас е јасно – не може да се постигне мир под диктат што ќе биде на сметка на Украина“, подвлече Хофман.

Германија верува дека Украина и по евентуалното постигнување на мировен договор ќе мора да задржи силна армија – тоа, како што велат, е нејзината најважна безбедносна гаранција.

Дополнително, Берлин инсистира дека Украина мора да има отворена перспектива за членство во Европската Унија – и тоа треба да остане приоритет и во постконфликтниот период.

Трамп: САД и Русија се блиску до договор 

Американскиот претседател Доналд Трамп денеска, непосредно пред заминувањето за Рим на погребот на папата Франциско, изјави дека Соединетите Американски Држави и Русија се на чекор до постигнување договор кој, според него, би можел да спаси илјадници животи.

„Мислам дека на крајот ќе постигнеме одличен договор… Ќе се обидеме да се извлечеме од овие војни за да спасиме 5.000 животи неделно. Тоа ми е целта. Сакам да спасам 5.000 млади луѓе – главно Украинци и Руси – и би ми било голема чест ако успеам во тоа“, изјави Трамп.

Тој додаде дека преговорите се во напредна фаза и дека „мисли оти се доста блиску“ до конкретен договор, иако не прецизираше од каде доаѓа неговата проценка за бројот на потенцијално спасени животи.

Во изминативе денови, Трамп неколкупати го обвини украинскиот претседател Володимир Зеленски дека ги поткопува мировните обиди со тоа што одбива да признае руски суверенитет над Крим. Вчера, тој упати апел до рускиот претседател Владимир Путин да ги прекине нападите и да се фокусира на постигнување мир.