Павел Христов, роден 2004 година, е уште еден тивок херој од трагедијата во Кочани за кој јавноста треба многу погласно да зборува.

Ова момче четирипати влегувалo во опожарената дискотека за да помогне и да спаси свои врсници.

Во целиот хаос не се заштитил сам, преовладувала неговата хуманост, не штедејќи се себеси, и сѐ што може да се случи, раскажуваат неговите другари, вели мајката на настраданиот Павел за „Нетпрес“.

Тој во четвртото влегување веќе почнал да ги чувствува последиците на чадот и да се гуши.

-Болката што ја чувствувам како родител е голема, како и кај сите други родители, бидејќи тие деца си имаа избрано пат. Некои се имаа определно да учат за доктори, други за инженери, трети да се посветат на занает, и сите си ја сакаа Македонија. Поради нечии пропусти останавме без децата, без нашите ангели. Тие ни беа светлост и надеж. Се прашувам Гоподи, зошто ги земаш добрите?, вели Валентина Христова.

Нејзината болка е уште поголема, бидејќи и ќерката Марија била исто така во дискотеката. Таа е повредена и е на лекување во Шпанија, а семејството со нетрпение го чека нејзиното враќање.

Ден по кобната ноќ ова семејство требало да замине за Скопје за да купат венчален фустан за ќерката.

После сѐ што се случи, после трагичната загуба на татко му, на само 17 години Павел застанува како столб во фамилијата. Остана разумен, одговорен и хуман кон општеството, ја ширеше својата ведрина кон своите најблиски и спрема секого, со убав збор и добри дела со намера оваа година да се запише на факултет и да си го работи занаетот како бербер, пишува во емотивната објава на истиот портал.

„Секогаш ми велеше, мајко се ќе биде во ред, јас сум тука за сѐ што треба. Се одлучува за берберскиот занает каде што е и омилена личност“.

Хуманите и храбрите луѓе судбината ги поврзува. Така е со Павел и Јован Костадинов од Виница кој спаси над 20 деца и е вистински херој, но тој знаел да се заштити – ставил мокра ткаенина на дишните органи.

Павел и Јован имале страст да возат мотори по нашите убави планини. Чистите души ја сакаат чистата природа, а и таа ги сака нив. И Јован, како и Павел, пред две години изгуби родител, така и тој цврсто се соочил со животните предизвици, а својата големина на непоколеблива храброст и хуманост ја покажува на дело, не жалејќи го својот живот повеќе пати влегува во опожарената дискотека.

Трагедијата што ја потресе Македонија, а која што се случи во Кочани во дискотеката „Пулс“, остави зад себе голема болка, но истовремено ја разбуди солидарноста кај луѓето. Група млади ентузијасти, предводени од Иван Ивановски, граѓанин на Кочани, ја покренаа иницијативата „Поддржи го Кочани“ (supportkochani.com) со цел што побрзо да им помогнат на погодените семејства.

Со над 12 милиони денари собрани за само неколку дена, оваа акција стана симбол на човечката хуманост и сплотеност. За предизвиците, целите и идните планови,ММС разговараше со Ивановски, основачот на иницијативата.

„Сѐ започна од потребата за итна реакција. Видовме дека во вакви трагедии, најважно е да се помогне и истата помош која во случајов е финансиска да стаса што е можно побрзо до оние што ја имаат најголемата потреба. Некои организации имаат подолги административни процедури, па ние решивме преку своја инцијатива да реагираме. Затоа формиравме тим од триесетина луѓе кои веднаш почнаа со работа“, вели Ивановски и објаснува како функционира иницјативата и како можат луѓето да донираат.

„Ја отварате страната, ги гледате сите повредени и починати. Нашиот тим ги контактираше фамилиите и ги праша дали информациите можат да се споделат на страната за луѓето да можат да донираат. Ги земаме податоците, ги ставаме на веб страната со тоа што дури имаше и лажни профили на социјалните мрежи кои се претставуваа дека се од Кочани за да можат да заработат.  Сè е базирано на транспарентност и директна комуникација со јавноста. Секој ден ги информираме граѓаните за тоа колку пари се собрани и како ќе бидат распределени. Досега собравме 12 милиони денари, а благодарение на поддршката од луѓето, локалните фирми и волонтерите, иницијативата функционира одлично“, објаснува тој.

Ивановски зборуваше и за тоа со кои се најголемите предизвици во целиот процес.

„Најголемиот предизвик е да им се помогне на сите што имаат потреба. Парите не можат да ја надоместат болката, но барем можат да помогнат во овој тежок период. Дополнително, емоционалниот товар е огромен, градот е потиштен, улиците се празни, а шокот од оваа трагедија сè уште е присутен“, вели Ивановски.

Примарен фокус на иницијативата е да продолжи со собирањето на средства и да обезбеди поддршка за семејствата.

„Планираме и долгорочни проекти со кои ќе помогнеме во обновата на заедницата. Ова мора да биде моментот од кој ќе се движиме напред, посилни и пообединети. Најголемата мотивација ни се луѓето. Секој ден гледаме солидарност, луѓе донираат, носат храна, пијалоци, се приклучуваат како волонтери. Ова покажува дека во најтешките моменти, знаеме да бидеме заедно“, објасни тој, а на најблиските на настрадните им порача:

„Ова што се случи во Кочани не смее да се повтори, никој не треба да поминува низ оваа болка. Но, барем можеме да покажеме дека сме тука еден за друг. Продолжуваме да помагаме, затоа што сега, повеќе од било кога, треба да бидеме заедно“, дециден е Ивановски.

Извор: mms.mk

Водостојот на Охридско Езеро е триесет сантиметри под просекот за март покажуваат денешните мерења од Управата за хидрометеоролошки работи на Република Македонија (УХМР).

Според мерењата нивото е на кота од 693.19 м.н.в., додека просекот за месец март изнесува 693.49 м.н.в. Нивото на езерото денес е 9 сантиметри над природниот минимум (693.10 м.н.в) и два сантиметри над минималната кота утврдена со Билатералниот договор со Албанија (693.17 м.н.в).

Неделната анализа покажува благо зголемување за по еден сантиметар на нивото од првиот ден кога било на кота од 693.16 м.н.в., до денешното.

Температурата на водата денес е 9 степени што  е над просекот за месецов кој изнесува 7,6 степени.

Во моментов охридскиот регион е зафатен со влажен бран проследен со врнежи од дожд, што зависно од интензитетот на врнежите се очекува да придонесе за подобрување на севкупната хидролошка состојба.