Соединетите Американски Држави се подготвени да ја признаат руската контрола врз украинскиот регион Крим како дел од поширокиот мировен договор меѓу Москва и Киев, велат познавачите на ова прашање, пишува Блумберг.

Таквата потенцијалната отстапка би бил најнов сигнал дека американскиот претседател Доналд Трамп сака да го зацврсти договорот за прекин на огнот и доаѓа кога тој и американскиот државен секретар Марко Рубио сугерираа дека администрацијата е подготвена да се откаже од мировното посредување доколку не се постигне брзо напредок.

Русија го зазеде Крим во 2014 година по инвазијата и последователниот референдум одржан под окупација, а меѓународната заедница се спротивстави на признавањето на полуостровот како руски за да избегне легитимирање на нелегалната анексија, наведува Блумберг.

Медиумот наведува дека таквиот потег ризикува да го поткопа меѓународното право и договорите кои забрануваат насилно одземање на земја.

Украинскиот претседател Володимир Зеленски постојано изјавува дека нема да ѝ отстапи територија на Москва.

Блумберг наведува дека таквиот потег на САД би бил благодет за рускиот претседател Владимир Путин, кој долго време бара меѓународно признавање на рускиот суверенитет на Крим. Путин досега одбиваше да се согласи со предлогот на Трамп за широк мировен договор.

Изворите на Блумберг велат дека конечна одлука за ова прашање сè уште не е донесена.

Руски дрон погоди станбена зграда во Херсон – пет минути пред најавеното велигденско примирје

Само пет минути пред да стапи на сила велигденскиот прекин на огнот што го најави Владимир Путин, руски дрон попладнево удри во станбена зграда во Херсон. Нападот се случил во 17:55 часот, соопшти началникот на кабинетот на украинскиот претседател, Андриј Јермак.

На својот Телеграм-канал, Јермак објави и видео од моментот на нападот, кој според него, уште еднаш го разобличува вистинското лице на руската „грижа за човечки животи“.

Информацијата ја потврди и Дарија Заривна, советничка на Јермак, исто така преку Телеграм, пренесе агенцијата Укринформ. Засега нема информации за евентуални жртви или повредени во нападот.

Инаку, рускиот претседател Владимир Путин неколку часа претходно најави еднострано велигденско примирје кое, според руската страна, треба да трае од 18:00 часот до полноќ во недела.

Овој инцидент уште еднаш го отвора прашањето за искреноста на руските намери кога станува збор за хуманитарни гестови и прекини на огнот во услови на војна.

Зеленски скептичен за велигденското примирје: „Шахеди“ над Украина додека Путин зборува за мир

Украинскиот претседател Володимир Зеленски денеска изрази сериозни сомнежи околу најавеното еднострано велигденско примирје од страна на Русија, оценувајќи го потегот како уште една манипулација од страна на Владимир Путин. Иако не прецизираше дали Киев ќе го прифати примирјето, тој јасно ја истакна недовербата во искреноста на руските намери.

„Додека Путин зборува за прекин на огнот, на нашето небо повторно се појавија руски беспилотни летала. Во 17:15 часот, во повеќе региони на Украина беа активирани сирените за воздушна опасност. Нашата противвоздушна одбрана веќе дејствува за да нè заштити. Присуството на дронови ‘Шахед’ јасно го покажува вистинскиот однос на Путин кон Велигден и кон човечките животи“, напиша Зеленски на платформата Х.

Од другата страна, рускиот претседател Владимир Путин денеска објави дека Русија, од хуманитарни причини, прогласува велигденско примирје. Според неговата наредба, сите воени активности се суспендираат од 18:00 часот по московско време, до полноќ во ноќта меѓу недела и понеделник.

„Наредувам запирање на сите воени дејствија за време на овој период“, изјави Путин на состанокот со началникот на Генералштабот, Валериј Герасимов.

И покрај официјалната најава, досегашните постапки на терен ја засилуваат недовербата кај украинската страна, која се уште не објавила дали ќе возврати со ист чекор.