Со почетокот на „Зимска приказна“, манифестацијата која годинава привлече огромно внимание, Битола го доживува својот сјаен момент. Хотелите и сместувачките капацитети во градот се речиси целосно резервирани, што сведочи за успешната организација и влијанието на настанот врз локалната економија.

Хотелиерите задоволни од зголемената посетеност

Сопствениците на хотели и други сместувачки објекти изразуваат големо задоволство од приливот на гости. „Не се сеќаваме на ваква гужва за овој период од годината. Освен домашни туристи, имаме и значителен број гости од странство,“ изјави сопственик на хотел во центарот на Битола. Резервациите започнале уште пред неколку недели, а некои од посетителите престојуваат подолг период, уживајќи во настаните и зимската атмосфера што ја нуди градот.

Интересни приказни од првите посетители

„Зимска приказна“ донесе уникатна можност за многу луѓе да го запознаат шармот на Битола за првпат. Еден од гостите, турист од Грција, сподели: „Слушнав за оваа манифестација од пријател кој беше тука лани. Не можам да поверувам колку овој град има што да понуди – од културни настани до прекрасната храна.“

Локалните водичи истакнуваат дека меѓу туристите се издвојуваат семејства кои доаѓаат да ја доживеат магијата на Широк Сокак, кој оваа година блеска со новогодишно осветлување и празнична декорација.

Економски и културен успех

„Зимска приказна“ не само што ги исполни хотелите туку и даде дополнителен импулс на градскиот живот. Улиците се полни со луѓе, кафулињата и рестораните работат со зголемен капацитет, а локалните уметници добија можност да ги претстават своите дела пред поголема публика.

Со ваквиот успех, „Зимска приказна“ се докажува како клучен фактор за заживување на Битола, што ветува уште подобра иднина за туризмот во регионот.

Градоначалникот на Општина Битола, Тони Коњановски, на седница на Советот на општината, презентираше амбициозен план за капитални инвестиции во 2025 година. Со рекорден буџет од 2.760.088.393 денари, општината ја поставува основата за значителни инфраструктурни проекти, кои се во функција на подобрување на животниот стандард на граѓаните.

„Со поддршка на Владата, која обезбеди над 220 милиони денари, и со нашите сопствени средства, успеавме да креираме најголем буџет досега. Најголемиот дел од средствата ќе бидат насочени кон капитални проекти, вклучувајќи изградба на улици, водовод, канализација и други инфраструктурни зафати“, истакна Коњановски.

Главни инфраструктурни приоритети за 2025 година:

• Изградба на влезот во Битола од Прилеп.

• Реализација на проектот „Битола вело град“, со изградба на велосипедски патеки над 5 км.

• Отворање на новата детска градинка во АРМ и адаптација на објектот на Домот за доенчиња.

• Завршување на обновата на планинарскиот дом „Копанки“.

• Реконструкција на над 18 км патна инфраструктура, вклучувајќи улици во урбани и рурални делови на општината.

Дополнително, се работи на енергетска ефикасност, со поставување фотонапонски централи на 10 училишта и подготовка на нови проекти во соработка со УСАИД.

„Општина Битола стана лидер во транспарентност и отвореност во државата. Сите проекти се јавно достапни, а граѓаните имаат можност да ги следат напредоците преку нашата веб-страница“, додаде Коњановски.

Во текот на 2025 година, се очекува реализација на над 30 нови инфраструктурни проекти, вклучувајќи изградба на спортски игралишта, реконструкција на училишта, и поставување нова урбана опрема.

„Нашата цел е заеднички, преку соработка меѓу Советот и граѓаните, да ја направиме Битола уште поубаво место за живеење“, заклучи Коњановски.

Битола, повторно на врвот на развојните мапи!

Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворска полиција, поднесе кривична пријава против полициските службеници А.А., на работно место во ПС од ОН Гази Баба, А.А. на работно место во ПО Арачиново, Б.Џ., на работно место во ПО Арачиново и В.С., на работно место во ПО Арачиново при СВР Скопје за кривично дело ,,злоупотреба на службената положба и овластувања“ по член 353 од КЗ и за едно кривично дело „измама во службата“ по член 355 став 1 од Кривичниот законик против полицискиот службеник Б.М., на работно место во ПС од ОН Гази Баба при СВР Скопје.

Првопријавениот, како заменик командир на ПС од ОН Гази Баба ја злоупотребил службената положба и овластување на начин што како раководител со несоодветно водење на евиденција за распоред на работа, спротивно на подзаконски пропис со кој се пропишува начинот на евидентирање на реализираните часови на вработените во Министерството за внатрешни работи на 12 полициски службеници- вработени во ПС од ОН Гази Баба им овозможил да се стекнат со право за исплата на бонус плата во 2023 година и без да ги исполнат условите утврдени со Законот за работните односи на секој поединечно им била исплатена бонус плата во износ од 36.614 денари или вкупно 439.368 денари, во кој износ го оштетил буџетот на Министерството за внатрешни работи.

Второпријавениот, како командир на ПО Арачиново, третопријавениот како инспектор во ПО Арачиново и четвртопријавениот како инспектор во ПО Арачиново со несоодветно водење на евиденција за распоред на работа, спротивно на подзаконски пропис со кој се пропишува начинот на евидентирање на реализирани часови на вработените во Министерството за внатрешни работи, ја злоупотребиле службената положба и овластување на начин што на седум полициски службеници вработени во ПО Арачиново им овозможиле да се стекнат со право за исплата на бонус плата во 2023 година и без да ги исполнат условите утврдени со Законот за работните односи на секој поединечно им била исплатена бонус плата во износ од 36.614 денари или вкупно 256.928 денари, во кој износ го оштетиле буџетот на Министерството за внатрешни работи.

Петтопријавениот како вработен во ПС од ОН Гази Баба како службено лице со намера за себе да прибави противправна имотна корист поднел своерачно потпишана изјава со лажна содржина, во која изјавил дека има остварено повеќе од 150 часа прекувремена работа и немал повеќе од 21 ден отсуство од работа во текот на 2023 година, по што му било изготвено решение за утврдено право за исплата на бонус плата во висина од една просечна нето плата во износ од 36.614 денари без да ги исполни предвидените услови утврдени со закон, во кој износ го оштетил буџетот на Министерството за внатрешни работи.

Одделот за внатрешна контрола, криминалистички истраги и професионални стандарди против именуваните полициски службеници ќе поднесе предлог за поведување на постапка за кршење на работниот ред и дисциплина и ќе изрече задолжителна мерка за отстранување на работно место-суспензија до завршување на дисциплинската постапка.