Голем метеж на „Богородица“ – патниците чекаат и до 40 минути за влез во Грција

Продолжениот викенд и Велигденските празници создадоа вистинска гужва на граничниот премин „Богородица“, каде што денеска се формираа долги колони од возила. Голем број граѓани решија да ги искористат неработните денови за краток одмор во Грција, што предизвика зголемена фреквенција и подолго чекање на граница.

Иако официјалните податоци на АМСМ наведуваат дека времето на чекање на „Богородица“ и „Дојран“ се движи од 10 до 15 минути, патници кои се на терен пријавуваат дека реалното задржување на „Богородица“ надминува и 40 минути.

Од АМСМ утрово информираа дека на „Табановце“, времето на чекање за влез и излез од државата изнесува 20 до 30 минути, што дополнително ја потврдува зголемената сообраќајна активност на граничните премини.

Главната причина за метежот е продолжениот викенд, бидејќи понеделник е неработен ден. Граѓаните очигледно го искористија празничниот период за кратко патување и релаксација надвор од државата, со што се создадоа застои кои не беа целосно очекувани според официјалните прогнози.

Одземени возила што биле користени во „диви“ трки во Куманово

На 16.04. и 17.04.2025 во СВР Куманово било пријавено дека на автопатот Куманово – Скопје се одвиваат диви трки со патнички моторни возила кои предизвикуваат голема бучава.

Веднаш биле преземени мерки од полициски службеници од Полициската станица за безбедност на патниот сообраќај при СВР Куманово и поради сомнение за стоирен прекршок биле одземени патничко моторно возило „бмв“ со прилепски регистарски ознаки управувано од М.В.(20) од село Долнени, прилепско и патничко моторно возило „фолксваген поло“ со тетовски регистарски ознаки, управувано од Б.Р.(21) од Тетово. По целосно документирање на слуајот, против нив ќе следуваат соодветни поднесоци.

СВР Струмица-ОВР Радовиш, до Основното јавно обвинителство Струмица поднесе кривична пријава против А.Е.(38) од Радовиш поради постоење на сомнение дека сторил кривично дело „неовластено производство и пуштање во промет на наркотични дроги, психотропни супстанции и прекурсори“ по член 215 од Кривичниот закон.

На 17.04.2025 врз основа на судска наредба, полициски службеници од СВР Струмица-ОВР Радовиш извршиле претрес во стан и помошни простории во кои живее и ги користи А.Е. во Радовиш, при што во гаражата биле пронајдени 36 пакувања со марихуана со вкупна тежина од околу 300 грама, а во станот биле пронајдени 498 кутии цигари со грчки бандероли.

Лицето било лишено од слобода и задржано во Полициската станица Радовиш и во службен разговор признал дека продавал марихуана на лица од Радовиш.
За настанот бил запознаен јавен обвинител од Основното јавно обвинителство Струмица, по чии насоки биле преземени мерки за документирање на случајот, по што А.Е. бил изведен пред судија од Основен суд Струмица, кој му определил мерка притвор во траење од 30 дена.