Иран подготвен за одбрана: Секој обид за мешање ќе биде третиран со цврст одговор

Иран е подготвен да се брани од какви било надворешни мешања или закани, изјави синоќа министерот за надворешни работи на Иран, Абас Аракчи. Според него, целокупниот ирански воен капацитет е во состојба на подготвеност за заштита на земјата.

– Не сакаме да бидеме закана за регионот, но секоја закана или мешање ќе добие одлучен одговор – истакна Аракчи за време на приемот во иранската амбасада во Москва, по повод Денот на иранската војска. Веста ја пренесе агенцијата РИА Новости.

Оваа изјава доаѓа во чувствителен момент – токму во пресрет на втората рунда индиректни преговори меѓу Иран и САД околу нуклеарната програма, како и по коментарите на американскиот претседател Доналд Трамп, кој најави „невидено бомбардирање“ доколку не се постигне договор.

Аракчи вчера пристигна во Москва, каде што веќе се сретна со рускиот претседател Владимир Путин, кому му ја пренесе пораката од иранскиот врховен лидер, ајатолахот Али Хамнеи. Според него, разговорите со Путин опфатиле теми поврзани со преговорите со САД, како и други регионални прашања. Денеска, Аракчи ќе се сретне и со рускиот министер за надворешни работи, Сергеј Лавров.

Првата рунда индиректни разговори помеѓу специјалниот пратеник на американскиот претседател за Блискиот Исток, Стив Виткоф, и иранскиот министер Аракчи се одржаа на 12 април во Маскат, главниот град на Оман.

И двете страни изјавија дека разговорите биле позитивни и конструктивни. Аракчи посочи дека атмосферата била мирна и фокусирана, и најави дека следната рунда преговори ќе се одржи на 19 април (сабота).

Виткоф со Путін во Санкт Петербург: Русија можеби ќе задржи дел од новите територии

Специјалниот претставник на американскиот претседател, Стив Виткоф, изјави дека во последниот разговор со рускиот претседател Владимир Путин, главен фокус бил ставен на прашањето за териториите во Украина. Според него, Русија можеби ќе успее да задржи „некои од новите региони, но не сите“ како дел од можното мировно решение.

Во интервју за Wall Street Journal, Виткоф истакна дека Украина можеби и не е толку заинтересирана за територии каде што доминантно се зборува руски јазик. Тој додаде дека прашањето за територијалниот суверенитет може делумно да се реши преку преговори.

Средбата помеѓу Виткоф и Путин се одржала на 11 април во Претседателската библиотека во Санкт Петербург и траела околу четири и пол часа, според извори на агенцијата Танјуг.

Исто така, Виткоф посочи дека една од темите во преговорите било и потенцијалното неучество на Украина во НАТО како дел од поширокиот мировен договор.

Од украинска страна, реакциите беа остри – претседателот Володимир Зеленски го обвини Виткоф за злоупотреба на функцијата, посочувајќи дека со прифаќање на можноста за признавање на нови руски региони, тој всушност ја прифаќа стратегијата на Кремљ.

Трамп му постави рок на Путин: Три дена за прекин на огнот во Украина

Американскиот претседател Доналд Трамп денеска изјави дека Вашингтон очекува одговор од Владимир Путин до крајот на неделата во врска со предлогот за прекин на огнот во Украина.

– Ќе го добиеме нивниот одговор многу скоро. Сакаме убиствата да престанат – изјави Трамп на заедничка прес-конференција со италијанската премиерка Џорџа Мелони во Белата куќа.

Во изјавата се осврна и на украинскиот претседател Володимир Зеленски, за кого рече:

– Не сум голем обожавател. Не го обвинувам директно, но мислам дека не ја заврши работата како што треба.

Трамп повторно ја критикуваше администрацијата на Џо Бајден за ескалацијата на конфликтот, и нагласи дека Русија има далеку поголема воена моќ од Украина.

Според него, до 24 април се очекува договор меѓу САД и Украина за експлоатација на природни ресурси, што би овозможил на Америка да си ги надомести трошоците за воената помош. Првичната сума од 300 милијарди долари, според „Блумберг“, била намалена на 100 милијарди за време на преговорите.

Според извори на „Аксиос“, Вашингтон е подготвен да воведе нови санкции против Русија ако до крајот на април не се постигне примирје. Од „Фокс њуз“ дознаваат дека Белата куќа размислува и за санкции кон руската „флота во сенка“, а Трамп навести дека би можел да воведе и тарифи до 500% за земјите кои купуваат руска нафта.