Македонија

Груби доби нова позиција – ќе го надгледувал проектот за Коридорот 8

Откако „се облече како Коридорот 8“ и го затвори автопатот Тетово – Гостивар за двочасовната прослава за поставување табла, вицепремиерот и министер Груби доби уште една улога во владата – координатор на активностите поврзани со Коридорот 8. Ќе ги следи работите и ќе ги координира сите активности за изградбата на патните правци Скопје – Блаце, Кичево – Букојчани, железницата Кичево – Лин и заедничките гранични контроли со Албанија и Косово.

Премиерот уверува, проектите се во надлежност и одговорност на Министерот Бочварски, Јавното претпријатие за државни патишта, и Железници. А поради обемноста на проектот имало потреба од мислења и работи од други институции кои не биле во надлежност на Транспорт, туку на Владата.

-Тука спаѓа обезбедување на мислења од страна на Управа за имотно-правни работи, обезбедување на мислења и ефикасна работа на Министерството за земјоделие во трансформација на земјиште, ефикасност и брзо сработување во делот на работите на Министерството за финансии. Во делот на експропријацијата, Јавното Правобранителство, општините, и низа на други институции, вели премиерот Ковачевски.

Уште не почнати да се градат, Коридорите веќе ги тресат скандали. По контроверзниот договор за надзор, вреден 22 милиони евра, според кој хонорарите ќе достигнат и до 300.000 евра постапки отворија и Јавно обвинителство, но и Антикорупциската комисија.

Инаку, пред два дена речиси цела влада присуствуваше на помпезна церемонија на која се откри табла за почеток на изградба на Коридорот 8. Затворен беше автопатот Тетово – Гостивар во двата правци, а ангажирана беше компанијата Арбериа Дизајн. Договор за организацијата нема на Јавни набавки, а премиерот рече дека поради службените патувања во Србија, Словенија и Италија не бил вклучен и не знаел колку пари чинеше церемонијата.

Македонија

15 години борба против насилството врз жени: Хуманитарен настан во МКЦ

Денеска во Кино Фросина при МКЦ ќе се одржи посебен хуманитарен настан со кој ќе се одбележи 15-годишниот јубилеј на Националната мрежа против насилство врз жени и семејно насилство. Настанот започнува во 18:30 часот, а собраните донации ќе бидат наменети за Интервентниот женски фонд, кој обезбедува директна помош на жени-жртви на насилство кои сакаат да ја напуштат опасната средина.

Националната мрежа, која денес брои 25 организации членки, 15 години активно работи на препознавање и заштита на жените од родово базирано насилство и семејни форми на злоупотреба, се залага против фемицид и силно застапува за правата и интересите на жртвите. Овој јубилеј е не само повод за прослава, туку и потсетник за важноста од поддршка и солидарност кон жените кои секојдневно се соочуваат со насилство.

Со купување на билет за настанот, можете да донирате средства за Интервентниот женски фонд: 15 години – Од тишина во глас – Друга страна

Македонија

Во Центар Жупа нема конкуренција: Кампањата за локални избори стартува во 4 општини

Градоначалничките избори во Гостивар, Маврово и Ростуше, Врапчиште и Центар Жупа ќе се повторуваат на 11 јануари 2026 година, откако на локалните избори во 2025 година во овие општини не беше остварен потребниот излез за гласање.

Според Роковникот за изборни дејствија, изборната кампања за првиот круг започна на полноќ на 22 декември и ќе трае до 9 јануари, кога официјално ќе започне молкот пред гласањето.

Во Гостивар конкуренција ќе водат Невзат Бејта, кандидат на коалицијата „Вреди“, и независниот Ваљбон Лимани, поддржан од НАИ. Во Врапчиште, за градоначалничкото место ќе се борат Исен Шабани од НАИ и Зуљхајрат Демири, кој се кандидира преку група избирачи.

Центар Жупа ќе има само еден кандидат – Аријан Ибраим од Демократската партија на Турците, додека во Маврово и Ростуше ќе се сретнат Онер Јакупоски од коалицијата „Твоја Македонија“ предводена од ВМРО-ДПМНЕ и Анес Ахмети од СДСМ.

Причината за повтореното гласање е недоволната излезност на локалните избори на 19 октомври 2025 година. Според податоците од Државната изборна комисија, само во Гостивар се остварени 33,31% од гласачите, додека во Врапчиште излезноста беше 25,18%, во Маврово и Ростуше 30,31%, а во Центар Жупа едвај 21,49%. Законската граница од една третина од запишаните гласачи, која е потребна за изборите да бидат успешни, не беше достигната.

Со овие бројки, четирите општини повторно се соочуваат со неизвесност, а кампањата која започнува сега ќе биде клучна за мотивирање на гласачите да се појават на биралиштата.

Македонија

Снежна покривка до 10 см и поројни врнежи дожд во Македонија

Под влијание на влажни воздушни бранови, од утре навечер и во текот на 24 и 25 декември 2025 година, Македонија ќе биде погодена со повремени локални врнежи од дожд, кои на некои места ќе бидат пообилни и над 25 литри на квадратен метар за 24 часа.

На планинските предели врнежите ќе бидат од снег, со формирање на снежна покривка од 5 до 10 сантиметри. Со спуштањето на постуден воздух од север, снег ќе се појави и на повисоките места во низинските региони. Од петок се очекува стабилизирање на времето.

Во Скопје, утре навечер и во следните два дена се предвидуваат повремени врнежи од дожд, кои на моменти ќе бидат пообилни. Граѓаните се советуваат да бидат внимателни на патиштата и да ги следат официјалните предупредувања за времето.