„Во слободните економски зони во источна Македонија се отворени 33 илјади нови работни места, кои обезбедуваат егзистенција за 130 илјади жители, а во албанските зони на земјата има нула инвестиции. Во Македонија се уништува албанството. Албанската младина избега и во државата, според анализите на демографите, нема преостанати повеќе од 220 илјади Албанци, од кои огромно мнозинство се постари од 50 години.“ – вели Мерсел Билали, универзитетски професор и политички аналитичар од Гостивар, во својата статија со наслов „Уништувањето на албанството во * Македонија“, објавена во ревијата „Шења“, која ја пренесе информативната агенција на албански јазик ИНА.

Покрај другото, Билали пишува: Во слободните зони во источна Македонија уште од нивното основање отворени се околу 33 илјади нови работни места. Тие работни места обезбедуваат директна и индиректна егзистенција за близу 130 илјади жители од таа страна, во време кога во северозападниот дел од државата многу нешта се помножени со нула, како и свеста. Сите инвестиции од странство се испраќаат во источниот дел на земјава, додека во албанските делови на земјата тие празни слободни зони сега се претворени во одморалишта за кучињата-скитници и во пасишта за магариња без сопственици.

Северозападна Македонија во аут!

Во северозападниот дел на државата, кој е населен со албанско мнозинство, работат само три странски компании, кои имаат одредена тежина, но и овде вработувањето на Албанците е многу мало, или симболично. Тоа произлегува од незаинтересираноста на албанскиот политички чинител. Државата сега ужасно се празни од албанското население. Целата техника на албанското владеење со години се заснова врз празни пофалби и застарен патриотизам, поддржан од некои корумпирани медиуми и новинари. Тие имаат за цел да ги убедат луѓето дека нивната судбина е врзана со фолклорот и празните зборови, а зборот економија не се појавува воопшто во устата на албанските политичари, кои се занимаваат со цените на компирите и доматите!

Безумната партизација го уништи албанството во Македонија. Овде може да има тежина некојси уличар, којшто снима пациенти без трошка совест, но не и ни чесен и професионален човек! Ова е огледалото на ова преостанато албанство, колку кутро толку и трагично. Демографите анализираат дека во оваа држава нема преостанати повеќе од 220 илјади Албанци, од кои огромно мнозинство се постари од 50 години.

Нема дилема дека Коридорот 8 има голема геополитичка и економска тежина за Албанците во регионот. Додека на Албанците им преостануваат празните фалби, македонските властодршци во тишина ја вршат нивната работа со вековна вредност. Тие не погодуваат да кажат дека протерувањето на Албанците најдобро го вршат самите Албанци! Пијаните политички Албанци продолжуваат да се движат без компас, додека заслужните Албанци или избегале, или им се убиени надежите!