597 сообраќајни прекршоци вчера на патиштата низ државата, 200 за непрописно паркирање.

Континуирано со секојдневните превентивни активности од страна на полициските службеници од сите сектори за внатрешни работи со цел граѓаните да се потсетат и предупредат за важноста од доследно почитување на сообраќајните правила и прописи, МВР продолжува со интензивните сообраќајни контроли низ патиштата во земјава.

Вчера (27.03.2025), во рамки на тие активностите на полициските службеници на ниво на целата држава, беа издадени 597 платни налози, од кои 200 се однесуваат на непрописно паркирање, а во 92 случаи стануваше збор за непочитување на пропишаната брзина на движење.

Покрај ова, а по однос на прекршоците по основ на неносење сигурносен појас и користење мобилен телефон при возење, евидентирани беа 47, односно 16 прекршоци. Полициските службеници исто така детектираа 50 лица што учествувале во сообраќајот без возачки дозволи, во осум случаи санкционирани се возачи кои управувале под дејство на алкохол, додека пак изречени се и четири мерки за возачи на моторцикли кои неноселе заштитна кацига, а изречени се и 13 санкции за прекршоци што ги прават пешаците. Следствено одредбите од Законот за возила вчера беа детектирани 17 нерегистрирани возила во сообраќајот а седум возила се исклучени од сообраќај поради техничка неисправност.

Сообраќајните контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта.

За опоравување на некои пациенти од несреќата во Кочани сигурно ќе бидат потребни неколку недели, меѓутоа ќе имаме и такви пациенти на кои ќе им биде потребна рехабилитација повеќе месеци, рече министерот за здравство Арбен Таравари. Подготвени сме за секој детал, рече тој, појаснувајќи дека државата ќе се погрижи не само во лекувањето на физичкото здравје, туку и на естетскиот изглед со оглед на тоа што се работи за млади лица.

– Подготвени сме за секој детал, бидејќи не се работи само за физичко здравје, туку и за естетски изглед, бидејќи се работи за млади лица со старосна граница од 15 до 35-40 години. Да се погрижиме за секоја ситница, целта ни е овие деца да продолжат да живеат нормално и да не бидат стигматизирани во општеството поради нивниот изглед, бидејќи изгорениците остануваат со одредени последици, генерално повредите се во рацете и лицата на овие деца, рече Таравари во гостување во вечерашното хуманитарно отворено студио на телевизијата Канал 5 за донирање на настраданите во Кочани.

Појасни дека се работи за 190 повредени, од кои дел се веќе дома, 15 се лекуваат во Скопје, додека 99 пациенти се лекуваат надвор од државата.

– После десет дена среќен сум што немаме ниту еден починат од тие што ја преживеаја несреќата во Кочани. Се работи за 190 пациенти, дел од нив се веќе дома, 15 се лекуваат во Скопје, додека 99 се лекуваат надвор од државата. Полека ги враќаме пациентите и се надевам дека бројките ќе бидат помали во наредниот период. Ние треба континуирано да сме обединети, жалам што треба да се случат вакви трагедии за да сите ние сфатиме дека силата е во единството и дека очајно ни треба како нација и држава, без разлика на нашите етнички и верски разлики. Мислам дека Македонија е обединета, но, за жал беше обединета во тага и болка. Би сакал еден ден сите ние да се обединиме за нешто убаво, што ќе значи живот, радост и иднина, рече Таравари.

Министерката за финансии Гордана Димитриеска Кочоска истакна дека сега приоритет на Владата се пациентите кои се надвор од државата, да им се помогне ним и на нивните семејства и за превоз и за сместување. Во исто време Владата дава максимална поддршка и на Црвениот крст за прибирање на средства за помош на семејствата на настраданите и на повредените во пожарот. -Сите пациенти се згрижени, нема потреба од дополнителни финансиски средства, рече таа.

Димитриеска Кочоска кажа дека во идниот период фокусот ќе биде на Кочани и на младите таму.

Во однос на тоа дали ќе продолжат инспекциските надзори, министерката за финансии рече дека овој случај покажува дека се што има во законите треба да се почитува, но и дека засилени надзори ќе има во континуитет.

Дел од отвореното студио беше и вицепремиерот и министер за животна средина и просторно планирање Изет Меџити, кој посочи дека земјава, за жал, во многу краток период се има соочено со слични случаи за кои потребно е да се изврши ревизија и да се сноси одговорност, бидејќи, како што рече, само така ќе се испрати порака до сите кои имаат надлежности да се однесуваат на ниво на задачата.

– Се работи за тешка трагедија, не знаеш што да кажеш во овие прилики. Ова нè обедини внатре не само како граѓани и политичари, туку и во региониот и пошироко. Сите жалат, тагуваат и речиси никој не можеше да поверува дека во еден миг заминаа многу млади животи. Но, тоа е мора да се продолжи и треба да се извлече поука од сето ова. Добро е што функционира правната држава, има одговорност. Во многу краток период, за жал, имавме вакви случаи за кои мислам дека треба да има ревизија и да се сноси одговорност, бидејќи само така ќе испратиме порака до сите кои што имаат надлежности да се однесуваат на ниво на задачата, бидејќи во моментот можеби изгледа нешто мало, но последиците се големи, рече Меџити.

Denesen.mk

Министерството за животна средина и просторно планирање (МЖСПП) изрече казна од 200.000 денари за компанијата „Булмак“, која управува со рудникот „Тораница“ во Крива Паланка, поради утврдена загадувачка активност. Според извештаите од инспекциските контроли, компанијата направила прекршок од трета категорија.

„Според пријавата од „Булмак“ на 14.03.2025 година, во периодот од 06:30 до 07:00 часот, дошло до инцидент при што пукнал цевководот преку кој технолошката вода од таложното езеро се пренесува до флотациониот погон. Водата не содржи хемикалии, но била заматена поради механички нечистотии. Компанијата пријави дека дефектот е саниран и истекувањето е запрено. Согласно Законот за животна средина, предвидената глоба за големи компании изнесува од 180.000 до 200.000 евра, а за одговорното лице во компанијата до 10.000 евра“, соопштија од Министерството.

Министерот за животна средина и просторно планирање, Изет Меџити, упати јасна порака дека нема да има толеранција за загадувачите:

„Законот мора да се почитува. Секој што го загрозува животната средина ќе се соочи со санкции без исклучок. Инспекциските контроли ќе продолжат со зголемен интензитет, а Министерството ќе инсистира на транспарентност и целосна одговорност. Ова е само еден од многуте чекори што ги преземаме за да обезбедиме чиста и безбедна средина за сите граѓани.“

Од Министерството најавуваат дека засилените контроли ќе продолжат и во наредниот период со цел спречување на загадувачките активности и заштита на животната средина.