НАТО целосно ги поддржува суверенитетот и територијалниот интегритет на Босна и Херцеговина и порачува дека мора да се почитува Дејтонскиот мировен договор, како камен темелник на мирот во земјата, истакна денеска во Сараево генералниот секретар на Алијансата, Марк Руте. 

– Секоја активност што ги поткопува Дејтонскиот договор, уставниот поредок или националните институции, е неприфатлива. Поттикнувачката реторика и активности се опасни. Тие претставуваат директна закана за стабилноста и безбедноста на Босна и Херцеговина, истакна Руте по средбата со членовите на Претседателството на БиХ, Жељка Цвијановиќ, Жељко Комшиќ и Денис Беќировиќ. 

Руте ги повика политичките лидери на Босна и Херцеговина да ја преземат својата одговорност за решавање на проблемите, што, како што рече, ќе и помогне за придвижување напред не само на земјата, туку и на регионот и на цела Европа. 

– Слушам загриженост за безбедносната ситуација. Но, да бидеме на јасно дека ова не е 1992 година и нема да дозволиме да се појави безбедносен вакуум. Меѓународната заедница е тука и посветена на продолжување на нашата силна поддршка, рече Руте. 

Тој додаде дека НАТО заедно со своите меѓународни партнери, вклучително и Европската Унија, ќе продолжи да ја поддржува БиХ на нејзиниот европски и евроатлантски пат, но дека од суштинско значење е и политичките лидери на земјата да придонесат во тие напори.

– Целиот регион ќе има корист од вистинската заложба за помирување и траен мир. Истото им го порачувам на сите актери во регионот, рече Руте, додавајќи дека почитувањето на суверенитетот и територијалниот интегритет на БиХ, онака како што се утврдени со Дејтонскиот договор, е фундаментално и за безбедноста и за стабилноста на целиот регион.

Грчката полиција разби криминална организација за нелегално производство и трговија на тутунски производи, а од понатамошната истрага било откриено дека членовите стојат и зад убиства, изнуди, експлозии, физички напади, при што уапсени се 47 лица, а штетата за земјата е над девет милиони евра поради избегнатите даноци, јави дописничката на МИА од Атина.

Директорот на Управата за борба против организиран криминал, генерал-потполковник Фотиос Дуицис објасни дека првично работеле на разбивање на криминалната организација со меѓународен карактер кои произведувале и пакувале голема количина тутунски производи.

Но, од истрагата произлегло дека не станува збор за обичен случај, посочувајќи дека има јасна поврзаност меѓу незаконските активности, како што е шверцот со цигари, со извршувањето на кривични дела како што се убиства, изнуди и тепања, со цел преовладување и консолидирање на доминацијата на криминалните организации над „потенцијалните конкуренти“.

Портпаролката на грчката полиција Константина Димоглиду, на денешната прес-конференција рече дека на операцијата што била спроведена на 6 и 7 март ѝ претходела повеќемесечна истрага на надлежните служби, а освен уапсните 47 лица, во предметот се вклучени уште 106 други лица.

-Вкупниот износ на избегнати даноци се проценува на 9.740.533 евра, од кои 7.466.995 евра се однесуваат на посебен данок на потрошувачка и 2.273.538 евра за данок на додадена вредност, посочи портпаролката на грчката полиција.

Дополнително, додаде дека при претресите извршени за време на операцијата во Атина, Солун, во Тесалија, во централна и западна Грција биле пронајдени и одземени: 28,2 милиони цигари; 936 килограми тутун; 24,39 тони тутун; 166.039 евра, пет пиштоли; 74 мобилни телефони; 32 автомобили; осум камиони; мотоцикл; машини за преработка и пакување на тутун. 

Претседателот на Србија, Александар Вучиќ, во Главниот одбор на Српската напредна партија изјави дека остануваат уште пет дена до „обидот за нивна револуција“ и рушење на уставниот поредок, што е едно од најтешките злосторства во Србија, објави Н1.

„Главното барање по преземањето на институциите ќе биде формирање преодна влада. Не можат да го соборат претседателот затоа што знаат дека ќе влезат во конфликт со војската и со се останато“, рече Вучиќ.

Вучиќ рече дека „додека е жив“ нема да прифати никаква преодна влада, дека „ќе мора да биде убиен“ и дека тоа е негова заклетва и дека „нема да ја предаде земјата на измамници“, што беше поздравено од толпата која стана и аплаудираше.

Тој најави и дека ќе говори во дневната српска радио телевизија, доколку, како што изјави, не биде спречен во тоа.