По повод „4 Ноември“ – Денот на ослободувањето на Битола, во Центарот за култура се одржа Свечена академија на која беа доделени четвртоноемвриските награди. На свеченоста на која присуствуваа голем број делегации и гости, свое обраќање имаше градоначалникот Тони Коњановски, кој направи кратка ретроспектива на значењето на денешниот ден за градот и реализираните проекти од локалната самоуправа во изминатата една година:

„Вечерва се потсетуваме на борбата и храброста на нашите предци, на направените жртви, но и на издржливоста на нашиот народ, во очекувањето на светлината на новата зора, исполнета со надеж и можности.
Оние кои некогаш сонуваа за посветла иднина, презедоа акција за да го направат сонот – реалност. Наследството живее во нашата посветеност да ги поддржуваме вредностите на слободата, правдата и мирот. Наша должност е да се погрижиме нивните жртви никогаш да не се заборават, а лекциите од историјата да не водат во нашата потрага по подобро утре.
Токму затоа, денес продолжуваме да се бориме со нашите интелектуални капацитети за понатамошен раст на Битола, нејзин развој и напредок во сите области, пред се преку активна вклученост на младите во сите области на делување.
Изминатите денови, почнувајќи од 26 октомври направивме едно поврзување на спортот, културата, уметноста, односно се она што е гордост на Битола и за што нашиот град, можам да речам дека е расадник на голем број таленти, покажани и докажани на нашите простори, но и во светски рамки.
Синоќа, добивме и една посебно значајна честитка од нашиот фудбалски клуб „Пелистер“ со победата над екипата на „Вардар“, на првиот ноќен натпревар на Стадионот Петар Милошевски по поставувањето на рефлекторите.
Поддршката на спортот и културата е само дел од она што ни овозможува напредок, додека инфраструктурната изградба е главниот услов за економски просперитет во убав, уреден и град кој нуди многу можности.

Како локална самоуправа, продолжувајќи ја визијата за Битола и изминатата година, се насочивме кон реализација на проекти кои значајно ја подобруваат инфраструктурата, овозможуваат подобри услови за живот на сите граѓани, ја збогатуваат културно – туристичката понуда и придонесуваат за економско заживување на градот и нови инвестиции, што се потврдува со новонајавените инвеститори во Индустриската зона Жабени, новоотворениот трговски центар БЛИС, најавениот ЛИДЛ.
Битола повторно станува привлечно место за инвестиции, како резултат на повеќе капитални проекти со кои веќе се случуваат видливи промени.
Традиционално, на 4 Ноември, правиме краток осврт на она што сме го направиле изминатата година во интерес на Битола.
Во тој контекст изминатата една година:

• Ја започнавме изградбата на влезот во Битола од Прилеп, со кој градот ќе добие влез каков што доликува
• Изградивме нова улица кај новоотворениот трговски центар БЛИС
• Изградбата на нова противпожарна зграда е во полн ек
• Изградивме и реконструираме патна и подземна инфраструктура во должина од над 18 километри, со што ги подобруваме условите во урбаниот и руралниот дел на градот. Направивме нови паркинзи, хуманитарни паркинг простори, реконструирани се спортските игралишта во ОУ „Елпида Караманди“ и Брусничка населба и други инфраструктурни проекти за кои најмногу сакам да Ви се заблагодарам Вас почитувани граѓани за дадените предлози за време на буџетските форуми, но и за вашето трпение во оваа интензивна градежна офанзива на општината, во која работиме на многу локации, со цел колку е можно повеќе да ги подобриме условите во општината и да реализираме повеќе проекти.
  Се грижиме за обезбедување на доволно згрижувачки капацитети за најмладите преку:
• Интензивираната изградба на новата детска градинка во АРМ во партнерство со Кромберг и Шуберт, која е во напредна фаза
• адаптацијата на новата детска градинка во Домот за доенчиња и мали деца,
• Продолжување на изградбата на новата детска градинка кај основното училиште „Свети Климент Охридски“ со поддршка од ресорното министерство.
  Рекреативниот и туристичкиот потенцијал на Битола, исто така мора да биде ставен во функција, затоа:
• Започнавме со изградба на велосипедски патеки во должина над 5 километри со што конечно ја реализираме идејата „Битола вело град“
• Со поддршка на ПСК Пелистер го возообновуваме опожарениот планинарски дом „Копанки“ и веќе со радост и гордост можеме да кажеме дека таму новиот објект е во напредна фаза и ќе се заложиме ова култно место за битолчани конечно повторно да ги отвори вратите за граѓаните
• Уреден е Новиот парк во Нова Битола и поставена е урбана опрема и спортски реквизити
• Изградена е пешачка патека на потегот Тумбе кафе – Смолево, омиленото место за рекреација на битолчани
• По примерот на светските метрополи, осветлени се сите значајни архитектонски градби со што блесна најпознатата и најамбиентална улица во Битола, Широк Сокак, каде е поставена и нова урбана опрема.
  Ги решаваме проблемите и градиме спортска инфраструктура
• Во соработка со ФФМ го подготвивме стадионот „Петар Милошевски“ за ноќни натпревари и таму се одигра првиот натпревар под рефлектори
• Реализирани се и повеќе проекти за подобрување на условите во основните и средните училишта во градот, проекти за поддршка на младите, учениците, студентите.
  После многу напори и долги процедури, отворено е прифатилиштето за бездомни животни „Хачико“, како системски пристап во справувањето со проблемот со уличните кучиња.
• Во делот на енергетската ефикасност, покрај спроведените субвенционирања, до крајот на годината, 10 училишта во Битола ќе добијат фотоволтаици, во процедура е подготвување на комплетна проектна документација за енергетска ефикасност на 3 училишта и една градинка, а преку 16-те проекти од Владата, основното училиште Стив Нумов, ќе добие нова енергетски ефикасна фасада.
• Започнавме со засадување на 1500 различни видови садници, на 10 локации во градот, преку проектот EU4CleanAir. И од овој проект очекуваме дополнителни бенефити околку грејните инсталации на неколку јавни објекти.
• Општина Битола е лидер во транспарентност и отвореност во државата според анализите на повеќе организации, за што континуирано сме насочени кон подобрување на услугите за граѓаните преку постепено воведување на електронски услуги и зголемување на ефективноста и ефикасноста на работата на локалната самоуправа.
  Ова се дел од проектите на кои работевме изминатата една година. За 16 нови проекти веќе добивме владина поддршка во висина од 230 000 000 денари, а подготвуваме и проектна документација за реконструкција на девет спортски игралишта и изградба на две спортски сали во општина Битола.
  Со голема посветеност најавуваме уште една интензивна градежна сезона идната година.
  На ваков начин, со достојна почит кон делото на нашите предци кои се бореле за слободна Битола, денес ја продолжуваме нашата интелектуална борба за поубава и уредена Битола во која преку соживот и соработка, ќе ја градиме иднината на младите генерации.
  Да останеме цврсти во нашата посветеност на принципите на слобода, правда за сите, почитување на човечкото достоинство и изградба на вистински вредности.
  Ви благодариме на сите Вас, што ни се придруживте денес додека го славиме нашето минато и активно работиме за светла иднина.
  Нека ни е честит големиот јубилеј – 80 години слободна Битола“, рече во своето обраќање градоначалникот Коњановски.

Покрај доделувањето на наградите, Програмата беше збогатена и со културно – уметнички перформанс на кој преку настап на културно – уметнички друштва, хорови, актери, новинари, пејачи и изведувачи беа прикажани значајни настани, фестивали и други карактеристични обележја на Битола, кои постоеле во минатото, а многу од нив и денес се значајни промотори на Битола.

Директорот на Јавното претпријатие за државни патишта Коце Трајановски за прифаќањето на договорот со „Бехтел и Енка“, од страна на актуелната власт која како опозиција го критикуваше, вели дека е нормално да прифатат нешто што веќе е договорено и за што е донесен специјален закон во Парламентот.

– Сосема е нормално нешто што е договорено, ние да го прифатиме со оглед на тоа што беше донесен специјален закон во Парламентот на Република Македонија.,Ддадени се големи пари за „Бехтел и Енка“, некаде 227 милиони евра за аванс, подготовка, пред да дојдам за директор. Сепак, влеговме во една финансиска обврска и сметаме дека е подобро да се преиспитаме дали може проектот да го ставиме на брза лента, да не плаќаме пенали, да се ангажира „Бехтел и Енка“ со целокупната нивна машинерија за да се заврши овој проект и видливи се резултатите во последните три месеци, вели Трајановски во интервју за „360 степени“ на МРТ.

Во однос на критиките што ВМРО-ДПМНЕ ги упатуваше како опозиција за овој проект, Трајановски вели тие биле по неколку основи – од фактот дека зад договорот не стои ниту една банка, до плаќањето пенали кон „Бехтел и Енка“ оти од претходната влада не бил испочитуван шестмесечниот рок за реализирање на обврските што ги презела државата, како што се експропријација и деминирање.

Вели дека се откочени одредени процеси и дека во наредните четири години ќе бидат завршени автопатите од коридорите 8 и 10-д.

– Откако успеавме одредени процеси да ги откочиме, одредени неопходни работи да почнат да работат, веќе сме во предност. Прилеп – Битола некаде би требало да биде две до две и пол години, да речеме за три максимум да биде завршен. Слична е ситуацијата со Тетово – Гостивар, а Гостивар – Букојчани можеби една година плус. Така што, тоа ќе бидат роковите, вели Трајановски, додавајќи дека претходната власт бавно ја работела експропријацијата.

Според Трајановски, се разгледуваат начини за ревидирање на договорот за надзор над изградбата на автопатите од „Бехтел и Енка“, кој го доби конзорциум предводен од италијанската компанија „ИРД инженеринг“. Смета дека една од опциите е во надзорот да се вклучи уште една компанија која ќе биде со светско реноме.

– Неколку пати разговарав со „ИРД“. Ако мене лично ме прашувате, јас не сум задоволен од тоа колку пари им се плаќаат врз основа на тоа што го сработуваат. Меѓутоа, тоа е договор што е потпишан и ние сега гледаме начини дали би можеле тоа да го ревидираме. Го викнав одговорниот на „ИРД“ и му реков за конкретна секција, бидејќи ништо не се работи, а во предлогот имаат предложено и ние плаќаме 12 луѓе. Таму 12 луѓе немаат работа, имаат четири до пет луѓе. Во дргата делница слично, во третата делница слично, наведува Трајановски.

На новинарско прашање дали има репреговарање на договорот, Трајановски вели дека тоа прашање треба да биде адресирано лично до премиерот, но според информациите со кои располага, дека се преговара на високо ниво.

Во однос на трајноста на договорот потпишан со „Бехтел и Енка“ што исто така тогашна опозиција го критикуваше, Трајановски вели дека иако тоа е обврска на Владата, тој мисли дека во моментов се разговара за тоа кои делови од документот да бидат јавно достапни и оти има одредено померување.

Во Кабинетот на Претседателот на државата во понеделникот се одржа конститутивната седница на новито состав на Советот за безбедност.
На седницата со која претседаваше претседателката Гордана Сиљановска Давкова, присуствуваа членовите на Советот за безбедност по функција: Африм Гаши, претседател на Собранието, Христијан Мицкоски, претседател на Владата, Панче Тошковски, министер за внатрешни работи, Владо Мисајловски, министер за одбрана и тројцата членови именувани од претседателката: Џевдет Хајредини, Малинка Ристевска Јорданова и Владо Спиридонов.

На покана на претседателката Сиљановска Давкова, во работата на Советот за безбедност учествуваа и реферираа: началникот на Генералштабот на Армијата, генерал-мајор Сашко Лафчиски, директорката на Агенцијата за разузнавање, Габриела Јаковлева и директорот на Агенцијата за национална безбедност, Бојан Христовски.

Советот за безбедност на седницата констатираше дека состојбата во земјата е стабилна и нема индиции за загрозеност на границите, интегритетот и суверенитетот на државата.

Присутните констатираа дека надлежните институции редовно ги следат состојбите во земјата и опкружувањето и дека системот за национална безбедност е функционален и обезбедува рано предупредување за евентуални закани и ризици.

Учеството на Армијата во НАТО-мисиите, ЕУ-мисиите и во мисии во ОН е успешно и продолжува, а бројот на учесниците во мисиите се одредува во зависност од потребите и одлуките на надлежните институции.

Советот за безбедност ќе се состанува на секои тра месеца а по потреба и почесто, известуваат од Кабинетот на шефот на државта.