Коалицијата Вреди порачува дека разбиениот Европски фронт на чело со ДУИ, исполнет со луѓе од црни листи, нема кредибилитет да зборува за прашања кои ги засегаат Албанците.

Веќе разбиениот Европски фронт на чело со нон грата партијата ДУИ, исполнет со луѓе од црни листи, нема кредибилитет да зборува за прашања кои ги засегаат Албанците. Тие се разобличени и изложени пред очите на албанскиот народ, соопшти коалицијата Вреди.

„Сенката на Али Ахмети, Артан Груби, оваа лоша копија на Груевски, кој зборуваше со полна уста за ОНА, на првиот судир со правдата – побегна. Дојди и соочи се, Артан! Албанците не се научени да бегаат. Албанците, кога се во право, се соочуваат со крената глава и не се плашат. Не ги посрамотувај Албанците, не ги користи како штит за твоите криминални дела!“, соопшти Вреди.

Коалицијата Вреди, се додава во соопштението, одамна предупредува дека ДУИ е партија заробена од криминални структури, предводени од Артан Груби.

„ДУИ не може да повикува на заштита на знамето, јазикот и на Албанците, бидејќи сега е партија без кредибилитет и без сила да ги заштити Албанците. Не можеш секој ден да зборуваш за заштита на правата на Албанците, а во моментот кога ќе бидеш повикан да понесуваш одговорност – да побегнеш“, се вели во соопштението.

Артан Груби, Прпарим Бајрами и нивната клика, се додава, се вистинското лице на криминалот и корупцијата.

„Правната држава се консолидира и никој нема да избега од правдата. Ќе се открие целосната вистина за злоупотребите во Државната лотарија. Тие што украле и го прекршиле законот ќе одговараат. Коалицијата Вреди е цврсто решена да донесе транспарентност, одговорност и да ги заштити интересите на граѓаните. Ние нема да застанеме пред политиките на манипулација и страв, бидејќи иднината на Албанците не смее да остане заложник на криминалот и корупцијата. Никој не е над законот“, порача владејачката коалиција.

Градоначалникот на Кисела Вода и претседател на ЗЕЛС, Орце Ѓорѓиевски, на конференцијата „Современите предизвици на системот за заштита и спасување“, организирана од Дирекцијата за заштита и спасување, ја нагласи важноста од заедничка посветеност на централната и локалната власт во создавање ефикасен и одржлив систем за заштита и спасување.

„Превенцијата е клучна за справување со современите предизвици. Само со приоритетно третирање на реформите во противпожарната заштита и соработка помеѓу сите нивоа на власт можеме да обезбедиме систем кој ќе ги заштити нашите граѓани од кризни ситуации,“ истакна Ѓорѓиевски.

Тој информираше за преземените чекори во Кисела Вода, вклучувајќи:

• Набавка на ново противпожарно возило, кое ќе ја подобри ефикасноста на интервенциите на противпожарната бригада.

• Обезбедување на простории за нова противпожарна станица, која, за жал, сè уште не е функционална поради административни пречки од страна на градоначалничката на Скопје.

• Набавка на мултифункционален багер, наменет за расчистување на речните корита, со што ќе се намали ризикот од поплави.

Ѓорѓиевски истакна дека ЗЕЛС веќе подолго време апелира за реформи во системот за противпожарна заштита и побара од централната власт посериозен ангажман за поддршка на овие иницијативи.

„Нашата цел е јасна – да изградиме функционален систем кој ќе биде подготвен да одговори на сите кризни ситуации и ќе овозможи сигурност за граѓаните,“ додаде тој.

Конференцијата заврши со заклучок дека за ефективно справување со кризни ситуации е потребна посветена и координирана акција на сите нивоа на власт.

Адвокатот Антонио Апостолски ќе го застапува поранешниот директор на „Државна лотарија“ Перпарим Бајрами во случајот за кој тој заедно со поранешниот вицепремиер Артан Груби и уште неколкумина е осомничен за проневера на околу 8 милиони евра во Лотарија.

Информацијата за МИА ја потврди самиот Апостолски, кој рече дека Бајрами не е избеган од државата туку веќе неколку месеци живее надвор од државата.

И премиерот Христијан Мицкоски, говорејќи за овој случај, во гостувањето на емисијата „Кликплус“ рече дека директорот на Државната лотарија подолго време не е во државата.

– Моите информации се дека поранешниот директор на „Државна лотарија“ подолго време не е во земјата. Додека, поранешниот вицепремиер во текот на вчерашниот ден со еден стопанственик, со возило со дипломатски таблици ја напуштил Македонија и се упатил кон нашиот северен сосед Косово – рече Мицкоски.