Претседателот на Република Српска, Милорад Додик, изјави дека нема да се повлече од борбата за Република Српска, дури и по наводните обиди за негова ликвидација од страна на Британците. Тој тврди дека британска единица од околу 40 војници била испратена во Босна и Херцеговина со задача да го елиминираат, со оправдување дека „давал отпор“.

Додик тврди дека оваа информација му ја дале еден премиер и тројца претседатели на европски земји.

„Ми рекоа дека имале наредба да не ме уапсат, туку да ме елиминираат, а приказната била ‘дал отпор’. Очигледно, според мафијашка логика – човекот е проблем, ако нема човек, нема проблем“, изјавил Додик за „Вечерње новости“.

Тој истакнал дека не се чувствува изолиран и дека слободно се движи, додавајќи дека ова е политички процес, а Кристијан Шмит, кој го крши меѓународното право, не бил легитимно избран за да носи одлуки кои треба да ги почитува како претседател на Република Српска.

Додик нагласил дека има достоинство и карактер, кои ги покажува секојдневно, и дека никогаш не го примил Шмит. Тој истакнал дека има намера да се бори за Република Српска додека ја има поддршката од народот.

Како лидер на СНСД, тој е задоволен од поддршката од граѓаните, која, според последната анкета, изнесува 62 отсто за него лично и 40 отсто за СНСД.

На крајот, Додик нагласи дека и некои странски претставници му предложиле да се повлече, но тој јасно порачал: „Не ќе го гледате тој филм. Јас нема да отстапам, дури и ако НАТО дојде да ме уапси.“

Јанез Јанша ослободен од обвиненијата за корупција – „Ова е победа, но борбата не е завршена“

Судот во Словенија вчера донесе првостепена ослободителна пресуда за поранешниот премиер Јанез Јанша и неговите двајца наводни соучесници, ослободувајќи ги од обвиненијата за злоупотреба на службената должност и корупција.

Јанша, лидер на опозициската Словенечка демократска партија, уште од почетокот го негираше случајот, нарекувајќи го политички мотивиран напад со цел да се дискредитира пред општите избори во 2026 година.

„Иако стануваше збор за очигледна фарса, обвинителот побара две години затвор“, изјави Јанша по излегувањето од судот во Целје. „Ова е победа, но борбата не е завршена. Оваа пресуда доаѓа по 15 години на прогон, судски процеси, клевети и лични жртви.“

Ослободителната одлука беше поздравена од неговите поддржувачи, од кои стотици се собраа пред судот, веејќи словенечки знамиња и носејќи транспаренти со критики кон судството.

Обвинителството, сепак, најави жалба откако ќе го добие писменото образложение на пресудата.

Евро-пратеникот Бранко Гримс изјави за РТВ Словенија дека пресудата е единствениот можен исход, бидејќи „немаше како да се оправда ваков случај пред меѓународната јавност“. Според него, судењето било грубо кршење на човековите права и „чисто судско малтретирање“.

Случајот се однесуваше на продажба на парцела сопственост на Јанша во 2005 година, во замена за стан во Љубљана – трансакција за која обвинителството тврдеше дека е незаконска. Заедно со Јанша беа обвинети и бизнисмените Бранко Кастелиќ и Клемен Гантар.

Ова не е првпат Јанша да се соочи со обвиненија – во 2013 година беше осуден на две години затвор поради случајот „Патрија“, но тој и тогаш ги негираше обвинувањата.

Хрватска повторно воведува задолжителен воен рок – првите регрути се очекуваат кон крајот на годината

Во Хрватска е во завршна фаза подготовката на законодавниот пакет кој ќе овозможи повторно воведување на задолжителното основно воено обучување. Според информации добиени од агенцијата Хина, нацрт-законот се очекува да биде претставен во јуни, а изгласан во Собранието до октомври годинава. Тоа значи дека првите регрути би можеле да започнат со обука во касарните во Книн, Слуњ и Пожега уште кон крајот на годинава или најдоцна на почетокот од следната.

Иако инфраструктурата за обука е веќе подготвена, за нејзина реализација неопходни се измени во Законот за одбрана и Законот за служба во вооружените сили. Поголемиот дел од деталите е веќе усогласен, но се уште се финализираат одредби поврзани со цивилното служење за лица кои ќе се повикаат на приговор на службата.

Стратегија, план и законски измени

Овие активности се дел од пошироката стратегија за јакнење на одбранбениот систем, во чии рамки премиерот Андреј Пленковиќ неодамна одржа состанок со министрите за одбрана, внатрешни и надворешни работи, како и со претставници на вооружените сили. Претседателот Зоран Милановиќ веќе ги добил нацрт-стратегијата за одбрана и Долгорочниот план за развој на вооружените сили, со предлог истите да бидат тема на следната седница на Советот за одбрана.

Планот предвидува јавна расправа за законските измени во јуни, прво читање пред летната пауза, второ во септември, и финално усвојување во октомври.

Услови и бенефиции за регрутите

Обуката ќе трае два месеца, за што секој регрут ќе добива месечен надомест од 1100 евра нето, со обезбедено сместување и храна. Важно е да се нагласи дека оваа обука ќе се смета како работен стаж и ќе биде призната како предност при вработување во државните и јавните служби.

Работниците кои ќе бидат повикани на служење нема да смеат да добијат отказ, додека студентите ќе можат да ја одложат обуката до крајот на студиите, но не подоцна од 29-годишна возраст.

Алтернативи за приговор

За оние кои ќе одбијат да служат војска од морални или етички причини, ќе бидат достапни две алтернативи:

Тримесечна обука преку системот за цивилна заштита, со активности во кризни ситуации како пожари, поплави или земјотреси.

Четиримесечна работа во локалната самоуправа, на комунални задачи, осум часа дневно.

Овие алтернативи ќе бидат финансиски помалку исплатливи од воената обука, а деталите се сè уште во доработка.

До 4000 регрути годишно

Државата планира да повикува по 800 регрути во пет различни циклуси во текот на годината, што значи дека годишно би биле опфатени до 4000 млади лица. Целта е да се зајакне националната безбедност, но и да се поттикне општествена одговорност и патриотизам кај младата генерација.