Големиот број случаи на грип во Тетово предизвика значително намалување на присуството на ученици на почетокот на второто полугодие. Според податоците од секторот за образование, повеќе од 250 ученици од основните училишта отсуствуваат поради болеста.

Инфективното одделение во Тетово секојдневно прима меѓу 80 и 100 пациенти со симптоми на грип, главно треска и кашлица, изјави инфектологот Борче Зафироски. Тој советува граѓаните да избегнуваат престој во затворени простории со многу луѓе за да се ограничи ширењето на вирусот.

Најголем број заболени има меѓу децата, што го потврдува и д-р Мерита Елези Рустеми од детското одделение. „Во декември имавме 1.115 прегледи, од кои 150 пациенти беа хоспитализирани. Во јануари до денеска бројот на прегледи изнесува 887, а 142 од нив завршија на болничко лекување. Децата честопати покажуваат потешки симптоми, како што се висока температура, кашлица и отежнато дишење“, изјави таа.

Состојбата останува загрижувачка, а лекарите препорачуваат зголемена претпазливост и следење на мерките за заштита.

Нова градинка „Рилиндја“  при Јавната установа „Младост“ ќе биде отворена денеска во Тетово, соопшти Министерството за социјална политика, демографија и млади.

 По повод отворањето на градинката, најавени се обраќања на ресорниот министер Фатмир Лимани, амбасадорот на ЕУ во Северна Македонија, Михалис Рокас, градоначалникот на Тетово, Билал Касими, и директорка на ЈУ „Младост“ – Тетово, Фатлинда Јаја.

Извор: biznisvesti.mk

Претседателката на Република Македонија, Гордана Сиљановска-Давкова, одржа средба со Џејмс Карафано, виш советник на претседателот на Фондацијата Херитиџ и експерт за национална безбедност и надворешна политика, и Пол МекКарти, регионален директор за Европа на Меѓународниот републикански институт – ИРИ.

На средбата беше презентирана иницијативата „Три мориња“, во која членуваат 13 земји-членки на Европската унија. Главниот фокус на иницијативата е развојот на енергетската, транспортната и дигиталната инфраструктура, како и зајакнување на оска север-југ во Источна Европа.

Претседателката Сиљановска-Давкова изрази уверување дека приклучувањето на Република Македонија кон оваа иницијатива ќе отвори нови можности за интензивирање на регионалната и европската соработка, со што ќе се забрзаат процесите на интеграција во Европската унија.

„Приклучувањето кон ‘Три мориња’ не само што ќе ја зајакне нашата позиција во регионот, туку и ќе создаде основа за побрз економски и инфраструктурен развој. Ова е клучен чекор во нашите напори за постигнување на европските стандарди и промоција на стабилноста во Источна Европа,“ истакна Сиљановска-Давкова.

Иницијативата „Три мориња“ е значаен проект кој го промовира регионалниот развој преку стратешка соработка меѓу членките, додека Република Македонија гледа можност за активно учество и придонес во реализацијата на заедничките цели.