Зголемување на плати, делење на награди, бонуси, можности за работа од дома, скратено и флексибилно работно време. Се смета дека сето ова ќе помогне работниците да се чувствуваат дека се вреднувани, во ситуација кога има одлив на работната сила од државата. Некои работодавачи нудат бонуси за своите вработени по повод верски празници, годишнини од основањето на фирмата и слично. Граѓаните велат дека работниците мора финансиски да бидат стимулирани за да не си заминат од земјава.

„Работникот прво мора да ја сака својата работа, да работи посветено, но и газдата треба да го награди со некој бонус. Не мора секој месец, но кога има некој повод, да додели бонус или нешто како 13-та плата“, вели граѓанка. 

Друг постар човек чии три деца се иселиле, објаснува дека газдите треба да бидат подарежливи и според него, неколкупати годишно треба да ги наградат работниците со бонуси.

Целиот текст на Faktor.mk

Во вторникот, во 17 часот, во просториите на Клиничка болница Битола, полициски службеници од СВР Битола го лишиле од слобода 64-годишниот М.С., лекар во Хируршко одделение во Клиничка болница Битола.

Тој се сомничи дека сторил кривично дело „примање поткуп“ по член 357 од Кривичниот законик, односно дека по завршен хируршки зафат побарал и примил поткуп од лице од битолско.

Кај него биле пронајдени и одземени парите, кои претходно биле обележани.

Основното јавно обвинителство Битола соопшти дека против осомничениот е поведена постапка.

„Основното јавно обвинителство Битола поведе постапка против едно лице поради основано сомнение дека сторило кривично дело – Примање поткуп од член 357 став 6 во врска со став 3 и став 2 од Кривичниот законик“, соопшти ОЈО Битола.

Сомнението произлегува од фактот дека осомничениот, се вели во соопштението, на 27 јануари, како лице кои вршело работи од јавен интерес, односно како доктор – хирург на Одделението за хирургија при ЈЗУ Клиничка болница „Д-р Трифун Пановски“ Битола, извршил интервенција – операција на жолчно ќесе врз пациентка, а потоа индиректно, преку сведок, побарал од синот на пациентката да му даде пари во износ од 150 евра за да се почестел за извршената работа.

Синот во просториите на болницата, во плик му дал на осомничениот 3 банкноти од по 50 евра. Откако осомничениот ги примил, му бил извршен претрес и овластени службени лица од СВР Битола ги пронашле и одзеле парите.

Надлежниот јавен обвинител од Основното јавно обвинителство Битола до судијата на претходна постапка доставил предлог за определување мерка притвор бидејќи постојат околности кои укажуваат на опасност од бегство.

Градоначалникот на Општина Јегуновце, Димитар Костадиновски, ја потврди посветеноста на локалната самоуправа кон унапредување на образовната инфраструктура со целосно реновирање на надворешниот дел на Подрачното основно училиште во село Туденце.

Со средства од општинскиот буџет, успешно беа реновирани сите наставни кабинети, а училиштето доби и целосно нова фасада. Овој проект значително ги подобри условите за учениците и наставниот кадар, овозможувајќи поквалитетна и попријатна средина за едукација и работа.

„Продолжуваме да ги исполнуваме дадените ветувања и да инвестираме во иднината на нашите деца“, изјави Костадиновски.

Овој проект е дел од пошироката стратегија на Општина Јегуновце за подобрување на условите во образовните институции, со цел да се создаде модерна и функционална средина за учениците и наставниот персонал.