Македонија

Бурим Латифи: Сите информации за наводно потрошени пари се само лажни вести

По вчерашните обвинувањата на ДУИ за потрошени 15.000 евра на МЕПСО и директорот, денес Бурим Лативи во објава на Фејсбук наведе дека сите информарции за потрошените пари се лажни вести.

„Почитувани пријатели,

Во интерес на објективно информирање на јавноста, ја споделувам фактичката состојба со набавката за хортикултурно уредување спроведена во АД МЕПСО, која стана дел од дневно-политичките настани.

Прво, фамозната набавка за хортикултурно уредување е спроведена од претходниот менаџмент составен од луѓе на ДУИ и Зијадин Села.
Второ, утврдување на потреба за ваква набавка во АД МЕПСО е со потпис на поранешниот министер од ДУИ, Билен Салији, тогаш во својство на член на управен одбор на АД МЕПСО.

Трето, изборот на компанија добитник на постапката за набавка на хортикултурно уредување го направи претходниот директор на АД МЕПСО, Зуди Кока, поставен на таа позиција од Европскиот фронт.

Четврто, соочени со ситуација на немање начин и основ согласно закон за поништување на постапката во оваа финална фаза, договорот беше потпишан за да се избегне евентуална тужба и судски процес од претходно избраната компанија од претходниот менаџмент.

Петто, станува збор за рамковна набавка, која има финансиски импликации само доколку се направи нарачка. АД МЕПСО досега не потрошил ниту еден денар за оваа набавка.
Шестто, АД МЕПСО нема ниту во иднина да троши средства за непотребни набавки за АД МЕПСО.

За да ви биде појасно ќе се обидам да ви опишам и поопширно за што станува збор.

Познатата јавна набавка за хортикултурно уредување, како постапка, датира многу пред да дојдам јас како раководител на институцијата, кога поранешниот министер на ДУИ во својство на член на управниот одбор на АД МЕПСО, Билен Салији, го потпишал барањето за потребата од хортикултурно уредување, односно цвеќиња. Подолу можете да го видите и документот!

Понатаму, треба да ја информирам пошироката јавност дека поранешниот директор на АД МЕПСО, Зуди Кока од коалицијата Европски Фронт, го потпишал одлуката за избор на компанијата победник за јавната набавка на хортикултурно уредување. Ова беше пред јас да стапам на функција. Еве го и документот!

Соочени со оваа ситуација, каде сите рокови за поништување на постапката и жалби беа поминати пред ние да стапиме на функција, како ново раководство бевме поставени пред свршен чин – или да ја спроведеме постапката до крај, или да ризикуваме да бидеме тужени од компанијата победник избрана од претходниот директор.

Сакам да нагласам дека, бидејќи ова е рамковен договор, што значи дека ништо не се плаќа однапред, туку само доколку потенцијално се нарача некој производ, ние го потпишавме предметот за да избегнеме тужба, со силна увереност дека нема да се потроши ниту еден денар од оваа набавка, бидејќи СМЕТАМЕ ДЕКА ТРОШОЦИТЕ СЕ НЕПОТРЕБНИ!
Значи, сите информации за наводно потрошени пари се само ЛАЖНИ ВЕСТИ.

Дополнително, на најтранспарентен начин, ја поканувам пошироката јавност да следи дали во текот на следните 11 месеци, колку што трае договорот, ќе се потроши и еден цент во овој правец, давајќи јавно ветување дека тоа нема да се случи.

Следниот пат, подобро е да читаат и анализираат пред да излезат пред камери и да се посрамат пред целата јавност!

Како што беше кажано и во реакцијата, ја гарантираме јавноста дека ниту еден цент од таа набавка нема да се искористи!

Остануваме решителни да направиме ПРОМЕНА, а не само ПРОМЕНА НА ОДРЕДЕНИ ЛИЦА.

Со почит,
Доц. Др. Бурим Латифи“, напиша Латифи.

Македонија

Стабилно време со магла до понеделник, дожд од вторник

До понеделник се очекува стабилно и претежно тивко време низ земјава, со појава на магла во утринските часови и зголемена облачност на некои места.

Утре, 18 декември, времето ќе биде променливо облачно со сончеви периоди, додека претпладне на одредени места ќе се појави магла. Ветарот ќе биде слаб и променлив.

Во Скопје се очекува слично време, со претежно тивко време и појава на магла во котлинските делови претпладне.

Стабилното време ќе се задржи до понеделник, а од вторник се најавуваат локални врнежи од дожд.

Македонија

Над 40 државни институции преминаа на електронско управување со документи

Повеќе од 40 институции во државата веќе го користат националниот Документ менаџмент систем (ДМС), што овозможува побрзи и поефикасни услуги за граѓаните, соопшти министерот за дигитална трансформација Стефан Андоновски во изјава за медиумите.

Според него, поврзувањето на институциите и општините преку единствен дигитален систем претставува суштинска реформа во функционирањето на државната администрација, со фокус на поедноставени и подостапни јавни услуги.

Андоновски информираше дека за само четири месеци е двојно зголемен бројот на институции кои користат електронска архива и електронски систем за управување со документи. Дополнително, преку државната платформа за интероперабилност, само во ноември биле реализирани 2,6 милиони трансакции, што претставува значителен раст во однос на просекот во текот на 2024 година.

Министерот посочи и дека за 20 проценти е зголемен бројот на институции и компании приклучени на платформата за интероперабилност, што директно придонесува за намалување на административните процедури и потребата граѓаните да доставуваат документи од една до друга институција.

„Овие резултати значат помалку хартија, помалку чекање и помалку простор за корупција. Дигиталната трансформација не ја третираме како ИТ-проект, туку како реформа во корист на граѓаните, со јасни и фер процедури“, истакна Андоновски.

Тој додаде дека целта е институциите да функционираат брзо, разбирливо и еднакво за сите, а Министерството за дигитална трансформација останува посветено принципот „граѓаните на прво место“ да стане стандард во работењето на државата преку конкретни и мерливи резултати.

Македонија

Собранието ги усвои клучните закони за проектот „Безбеден град“

Собранието во рамки на попладневниот дел на 76. седница без расправа ги донесе измените и дополнувањата на повеќе закони кои се дел од пакетот потребен за целосно функционирање на системот „Безбеден град“. Со 65 гласа „за“ и ниту еден „против“ или „воздржан“, пратениците усвоија измени на Законот за извршување на санкциите, Законот за полиција, Законот за возила и Законот за безбедност на сообраќајот на патиштата, сите по скратена постапка.

Пратеникот Бојан Стојановски од ВМРО-ДПМНЕ истакна дека законот е дел од шесте законски измени кои обезбедуваат имплементација на еден од најзначајните проекти во историјата на Македонија, кој започна пред неколку недели и практично ќе стартува од 1 февруари.

Законот за прекршоци, исто така дел од пакетот, воведува посебна постапка за прекршоци констатирани со технички средства и уреди за снимање, вклучително електронска достава преку текстуални пораки или е-пошта, 50% намалување на глобата при доброволно плаќање во рок од осум дена, како и автоматско суспендирање на возачката дозвола по акумулирање на три забрани во четири години. Пратеничката Моника Трајанова од ВМРО-ДПМНЕ објасни дека измените ќе го зголемат ефектот на превенцијата, ќе намалат административни трошоци и ќе ја зголемат ефикасноста на постапките.

Стојановски додаде дека законите овозможуваат одземање на возило на несовесни возачи, како и подобрување на процесот на издавање возачки дозволи, со зголемена транспарентност и контрола врз членовите на комисијата која ги доделува дозволите.

Во рамки на истата седница, пратениците го усвоија и Законот за концесии и јавно-приватно партнерство, исто така по скратена постапка, со што се овозможува поефикасно реализирање на инфраструктурни и други јавни проекти.