Илон Маск ѝ дал околу 75 милиони долари на својата организација која се бори за победа на Доналд Трамп на претседателските избори во САД.

Америка ПАК (Политички акционен комитет) се обидува да ја зголеми излезеноста на гласачите кои ќе го поддржат Трамп на изборите во клучните сојузни држави, а во периодот од јули до септември потрошил околу 72 милиони долари, покажуваат податоците доставени до федералната изборна комисија.

Тоа е повеќе од кој било друг ПАК што сака да го мотивира одѕивот на поддржувачите на Трамп. Кампањата на Трамп во голема мера се потпира на надворешни групи за мотивирање на гласачите, што значи дека Супер ПАК основан од Маск – најбогатиот човек на светот – игра извонредно важна улога во изборите меѓу Трамп и Камала Харис.

Во објавата на социјалната мрежа Икс, Маск посочи дека ќе одржи серија разговори низ Пенсилванија. Оваа американска сојузна држава се смета за клучна држава и за Трамп и за Харис во трката за Белата куќа.

Маск, кој изјави дека гласал за демократските претседателски кандидати во минатото, на овие избори направи остар пресврт надесно. Тој го поддржа Трамп во јули и се појави со него на митинг во Пенсилванија претходно овој месец.

Израелскиот премиер Бенјамин Нетанјаху го информирал  американскиот претседател Џо Бајден дека одмаздата на Израел против Иран нема да вклучува напади врз цивилни и индустриски  локации, пишува Вашингтон пост.

Израелскиот премиер ја ограничи планираната акција за да избегне мешање во изборите во САД, изјави официјален претставник.

Извештајот на Вашингтон пост  цитира двајца функционери запознаени со ова прашање, вклучително и еден идентификуван како американски функционер. Во извештајот се сугерира дека Израел го држи отворено времето на одмаздата, но еден официјален претставник рекол дека тоа ќе се случи пред изборите во САД кои се одржуваат на 5 ноември и дека ќе има „повеќе одговори“, што значи повеќе напади врз Иран.

Нетанјаху му рекол на Бајден, меѓу другото, дека Израел планира да го ограничи нападот врз воени локации, објави Вашингтон пост.

Претходно се сметаше дека Израел размислува за напади врз иранската нафтена инфраструктура или нуклеарни локации, на кои САД се спротивставуваат поради нивниот потенцијал за ескалација на борбите.

„Ги слушаме размислувањата  на Соединетите Држави, но ќе ги донесеме нашите конечни одлуки врз основа на нашите национални интереси и безбедност“, се вели во соопштението од канцеларијата на Нетанјаху, цитирано и во написот на Вашингтон пост.

Извор близок до Нетанјаху, цитиран од весникот, изјавил  дека израелскиот  премиер се координира со САД, но нема да чека Белата куќа да даде одобрение пред да започне напад.

Северна Кореја ги разнесе северните делови од меѓукорејските патишта и го обвини својот сосед дека летал дронови над Пјонгјанг, кои фрлале пропагандни летоци. Уништувањето на патиштата е дел од напорите на севернокорејскиот лидер Ким Џонг Ун да ги прекине сите врски со Јужна Кореја, откако претходно се откажа од целта за мирно обединување на полуостровот.

Војската на Јужна Кореја кажа дека испукала предупредувачки истрели како одговор на експлозиите. Таа додаде дека ги засилува надзорот и својата борбена готовност во координација со САД, иако експертите сметаат дека е малку веројатно дека Ким би наредил големи напади врз Јужна Кореја зашто тоа би резултирало со далеку помоќен одговор.

Видео објавено од војската на Јужна Кореја покажува облак од чад како се издигнува над местото на експлозијата на патот кај пограничниот град Каесонг, а слична снимка е објавена и од крајбрежен пат близу источната граница на Кореја.

Минатата недела, Северна Кореја кажа дека трајно ќе ја запечати својата јужна граница како одговор на воените вежби во Јужна Кореја во кои учествуваат и САД.